1 KORIN 4 - Ngawm Bible

Khrih i Nungzuitu

¹ Kohte cu Khrih nadektu, Pathian thu-ip kemtu in, na ngaihsut tuk mite ung hi.

² Mahti bang thu-ip kemtu le dektu tei ca in, a thupibel pa khat cu a bawipa i lakah muantakmi a hih tuk uh khi hi.

³ Tu in nangmuh hihen, midang hei hihen mihing danin keima thu na khencat tuk uh launak nei mang. Keimah le keimah hei thukhendun mang.

⁴ Ka lungmungil cu thiang hi; Mahnaven a thiang ka tih ten sual mang ka tihnak hi ma hi. Ka hum a thukhennak a bawltu tuk pa ngangai cu Topa bek hi.

⁵ Mah hangin a hun a kim laih ngawlin kuamah in, a thu haw son pahsuh un hi. Topa a hun ten dawlbel thukhennak um tuk hi. Amah in khuathim sung a selmi thukuhte cu khuavak sungah tulpih tukin, mihing tei lungmu sung a ngaihsut kuhte cu phuanglang khawng tuk hi. Kuakua hei in Pathian lak pen a co haw tukmi covo thangphatnak cu ngah haw tuk hi.

⁶ U le naute aw, nohtei nemcuamnak tukin hi thu hempoh cu keimah le Apollos in tehkipnak mangin hilh ing. Hiti bangin ka hilh ten, “A valthau in ngamta pahsuh un,” tihmi tehkipnak na theihnak tukin hi. A kuakua na hi uh hei in, mi pa khat thupitikin a dangte zawnsak pahsuh un hi.

⁷ Kua in kaw midang sangin cuangcung deuh tukin a bawl? Na neihmi hempoh hi Pathian piakmi hi khawng ma maw? Mahti bangin laksawngin, na ngahmi ahi tale itin kaw na ultung theihnak a um?

⁸ Na deihmi hempoh uh ngah khawng toh uh cim? Hauzet toh uh cim? Kumpi bawi hi toh uh cim? Kohte cu hi ma ung. Kumpi tatak hi in, ukmi hei nei tatak le uh ci deih na veng hi. Munkhatin uk kawm tuk nave hung.

⁹ Kohtei tiikmite hi Pathian in nautabelin koih hi tin ngaisung ing; puai zohnak mun mipi mai pen thah tak mihing, vancungmite le leihum mitei mai ah nuihsuak bawlnak thongin manmi mihing ung hi.

¹⁰ Kohte cu Khrih ca in misilte ung hi; nohte cu Khrih sungah micipzet uh ci. Kohte cu thanemmi ung a; nohte cu ngilzet uh ci; kohte cu mitei zotsakmi ung a; nohte cu upat takzet mite uh ci.

¹¹ Tuni tian ngilkial le dangdumin um ung. Ka puan uhte cu dahcopmi hi; munkhat pen mundangah vakvai ung; vah le den tawk ung;

¹² Ka tisa uh i thuakzawh ngawl tianin ka khut uh tuah nadek ung. A tamsiat haw ten muicu thupha pia ung; bawlsiatnak ka tawh uhten thuak lo poh ung;

¹³ Zotsaknak ka tawh uhten awnnemno in don ung. Kohte cu leihum a buaknawn bang thongpoh ung hi; tuni tianin mitei lakah a deih haw ngawlmi le a vawk haw mite poh ung hi.

¹⁴ Hiti bangin nohtei lakah lai ka kuatmi hi nangmuh zakcatik tukin kuat mang hi; ka ih zetmi ka cano bangin hilhhawl ka nuam hangin hi.

¹⁵ Itahim titale Khrih sung a nundan lamah zilhtu thawng tampi na nei uh hei in, pa ngangai cu pa khat bek nei uh ci. Thuthangpha na lak uhah ka phuan hangin Jesuh Khrih tuah na pehzomdunnak lam uhah na pa uh ing.

¹⁶ Mah hangin ka nundan hi zui un tin so ing.

¹⁷ Hi thu hangin Timote vang nohtei lakah hah ing. Amah cu Topa i sungah ka ihmi le ka muanmi ka capa hi. Amah in Jesuh Khrih sung a ka zuimi ka nunnak lampi le khua hempoh a pawlpi tei lakah mahti bangin ka nunnak lampi ka zilhmite na hilh tuk hi.

¹⁸ Mi khenkhat ten, “Oh tei lakah hungleh tukma toh,” tin ngaisungin pualthau li uh ci.

¹⁹ Topa i lungkimnak ahi tale heng pal tung a, hi mi pualthau tei mukkam haw i huham neihdante le a phuanmi haw bek sial ngawl iti bangin bawl theihnak nei tatak haw him tih cu keimah loli in mu tung hi.

²⁰ Itahim titale Pathian Uknak cu awnkam thong hi ngawlin ngilnak huham nei hi.

²¹ Mah hangin i saw kaw na ten uh? Ngolh tuah hung tung maw, ahimata itnak le nemnak lungmu tuah kaw ka hun tuk?