1 KORIN 3 - Ngawm Bible

Pathian Nadektute

¹ U le naute aw, thungai ti ahin, nohtei lakah Hawvang mitei lak a, ka hilh bangin hilh thei mang. Hi leihum mite bangin Khristian upnak lamah naupang bangin nohtei lakah ka hilh kul hi.

² An ngai na eih theih uh laih ngawl tak khuinawi pia ing. Tu hei in an ngai ei thei ma laih uh ci,

³ itahim titale tu hei in tisami in nunglaih uh ci. Pa khat le pa khat iksikdunin, na hauhdun uhten leihum tisami na hihnak uh le tisa danin, na nunnak uh lang hi ma maw?

⁴ Nohtei lakah pa khatin, “Kei cu Paul mi ing,” ti in, a dang pa khatin, “Kei cu Apollos mi ing,” a tih bok ten hi leihum mihing na hihnak uh langtik hi ma uh cim?

⁵ Thungai ti ahin, Apollos cu akua him? Paul cu akua him? Kohte cu thu umtu na hihnak tuk uhin Pathian nadektu bek ung hi. Pathian in nadeh tuk dehvo a piakmi khi dek ten hung hi.

⁶ Kei in, a ci cing ing, Apollos in, a potomi tui leih hi, mahnaven a khangtiktu cu Pathian hi.

⁷ Anci cingtu le tui a leihtu cu thupi haw ma hi. A thupibel cu a khangtotiktu Pathian hi.

⁸ A cingtu le tui a leihtu cu lamdang haw ma hi; a nadeh haw bangin Pathian in laksawng pia tuk hi.

⁹ Itahim titale ohte cu Pathian ca in nadek khawmte hung a, nohte cu Pathian nadehnak lo ngam hi uh ci.

¹⁰ Pathian in keimah a piakmi ka covo laksawng mangin innsa thiamzet bangin innkuul khuampi phut ing a, midang ten mahmi humah sa haw hi. Mahnaven itin kaw a sak uh tih cu kua hei in, a ngallin tek uh kul hi.

¹¹ Itahim titale Pathian in Jesuh Khrih cu innkil tawphah hi tukin koih zo a hih tak innkil tawphah dang betleh theih ma toh hi.

¹² Mah innkil tawphah humah inn sa tukin mi khenkhat ten sui le ngun ahimata suang manpha mang haw hi, mi khenkhatin thing maw, hampa maw, ahimata cangkung mang haw hi.

¹³ A nadekte haw iti bang him tih cu Khrih Ni ten langleh tuk hi. Itahim titale mah Ni ten a nadeh haw mi cu mei tuah zohnak um tuk hi; iti bang nadeh him tih cu mei tuah zo ten ciangtik tuk hi.

¹⁴ Innkil tawphah hum a inn sakmi cu mei in, a siatsuah thei ma tale, a satu in dehman ngah tuk hi.

¹⁵ Mahnaven, a kang khawng tale sung tuk hi; mahnaven mei sung pen a suakcami a hih bangin a nunnak cu hupsuak hi tuk hi.

¹⁶ Nohte cu Pathian biakinn hi uh ci a, hawvang na sung uhah a um khi thei ma uh cim? Pathian Hawvang i umnak inn hi uh ci.

¹⁷ Mah hangin kua hei hihen Pathian biakinn a siatsuahtu cu Pathian in siatsuah bok tuk hi. Itahim titale nohte cu a thiangthomi Pathian biakinn hi uh ci.

¹⁸ Kuamah in amah le mah zoldun pahsuh hen. Nohtei lakah pa khatin cip ing tin leihum danin, a ti tale micip tatak hi tukin misil suak masa hen hi.

¹⁹ Itahim titale leihum i cihnak a tihmi cu Pathian mitmuhah misil hi. Lai Thiangtho in, “Pathian in micipte cu amu cihnak lala mangin awkduntik hi,” ti hi.

²⁰ Mah hum pen Lai Thiangtho sungah, “Micip tei ngaihsutnak cu man nei ngawl thong hi tin Pathian in thei hi,” tin ngan hi.

²¹ Mah hangin kuamah in mihing tei bawlmi humah ultung pahsuh hen. Thungai ti ahin, ihempoh hi nangmuta khawng hi;

²² Paul, Apollos, Peter, leihummi, nunnak le thihnak, tu hun le mailam hun hei hihen, a venghawngin nangmuta khawng hi.

²³ Nohte cu Khrih ta hi uh ci, Khrih cu Pathian ta hi.