1 KORIN 2 - Ngawm Bible

Thinglamteh Humah Thahmi Khrih i Thu

¹ U le naute aw, na lak uhah hungin Pathian i thu-ip ka phuan ten awnkam thuk le mihing cihnak mang kha ma ing hi.

² Itahim titale nohtei lakah ka umlaihin, Jesuh Khrih le thinglamteh humah a thihnak sial ngawl a dang ngaihsut tum mang.

³ Na lak uhah ka hen ten thanem zetin lau le cantawtokin heng ing hi;

⁴ ka thuzilhmi le ka thu phuan mite na lungmu uhah tum thei tukin mihing thiamnak le cihnak awnkam tel ma hi, mahnaven Pathian Hawvang le a huham langtiknak bek hi.

⁵ Mah hangin na upnak uh cu mihing cihnak hum a phutmi hi ngawlin Pathian ngilnak hum a phutmi hi saw hi.

Pathian Cihnak

⁶ Mahnaven Hawvang lam a, pitungsa tei lakah cihnak thu hilh ing. Mahnaven mah cihnak thu ka hilhmi cu hi leihum cihnak kha ma hi, leihum uktu pa i huham hei hi ma, mah huhamte cu a bo li tohmi huham bek hi.

⁷ Kei i phuanmi cihnak cu Pathian i thu-ip cihnak, mihing kuamah i theih ngawlmi leipi a pian laih ngawlin Pathian in eimu sunloihnak tukin a tumtahmi cihnak hi.

⁸ Hi leihum a uktu kuamah in mah cihnak cu thei awng haw ma hi. A thei haw ahin a sunglawi Topa cu thinglamteh humah that haw tukma hi.

⁹ Mahnaven Lai Thiangtho in; “Mihing kuamah i muh awng ngawl, theih awng ngawlmi, cangthei tuk hi tin kuamah i ngaihsut awng ngawlmi thu cu, Pathian in, amah a ittu tei ca tukin, a tuptahmi hi,” ti hi.

¹⁰ Mah a thu-ip cu Pathian in ohtei lakah, a Hawvang tuah phuang hi. Hawvangin ihempoh khi zei in, Pathian i tuptahmi a thukbel tianin sawk ngah hi.

¹¹ Mihing i sungah a ummi hawvang bekin a lungmu sung uh a thu cu thei hi. Mahti bang bokin Pathian Hawvang bekin Pathian sung a thu cu thei hi.

¹² A ngah uhmi hawvang cu lei hawvang kha ma hi; Pathian i tiikmi Hawvang hi saw hi. Pathian i ohte a piakmi laksawng hempoh a theih theihnak tuk uhin Pathian Hawvang cu ngah zo hung hi.

¹³ Mah hangin Hawvang a neitu tei lakah Hawvang lam thudik a hilhciang uhten mihing cihnak awnkam mangin hilh ma hung hi. Hawvang i zilhmi awnkam mang hung hi.

¹⁴ Hawvang mi ngawl ten Pathian Hawvang lak pen a hungmi laksawng cu co thei haw ma hi. A thei vang theithei haw ma hi; itahim titale mah laksawng tei manneih dante cu hawvang lungmu bekin a theihtheih hangin amuh tei ca in imah ngawl thong hi.

¹⁵ Hawvang a neitu ten ihempoh theicel khawng haw hi; mahnaven amah cu kuamah in theicel thei haw ma hi.

¹⁶ Lai Thiangtho in; “Topa i lungmu cu akua in thei him? Akua in ngaihsutnak pia thei tuk him?” ti hi. Mahnaven ohte cu Khrih lungmu neitute hung hi.