1 KORIN 16 - Ngawm Bible

Thu Umtu Tei Ca Sumpi

¹ Judah ngam a um Pathian umtu teita tukin sum khon tuk thu ngatmi sungah, Galati pawlpi tei lakah ka thucahmi bangin bawl un hi.

² Nipi nisialin, na ngah uhmi a dem le a tam bangin tangka khon ten unna, khawl ham un. Mahten ka hen ten tangka khon kul tukma toh hi.

³ Ka hen nungten na ten uhmi a kuate him tih theihtiknakin, a khut hawah lai ken tung a, Jerusalem ah na laksawng uh cu puakleh haw tuk hi.

⁴ Ka hawh man um tuk ahi tale hawh tenleh nung.

Paul i Tuptahmi

⁵ Macedonia ngamsung hawh thah tuk ka hih tak ka hawhthah ceng ten nangmu lakah hengkikleh tung hi.

⁶ Na lak uhah hun tawkfang mang tung hi. Phalbi sung hempoh vang hi kha men tuk hi. Mah nungten khual ka zinnak tuk cu ilai lamah hei hi tahen ngaihsut bawmleh tuk uh ci.

⁷ Palvawk thah thong hi ngawlin Topa i khuakhannak ahi tale na lak uhah hun tawkfang mang nuam ing.

⁸ Efesa khua ah Pentecost ni tian um tung hi.

⁹ Langpangtu tampi um haw naven hilai ah a nemcuammi nadeh dek theihnak hunpha um hi.

¹⁰ Nohtei lakah Timote a heng tale phano in, na zo un. Itahim titale amah vang keimah bangin Pathian nadektu hi.

¹¹ Kuamah in nautat pahsuh un. Lungmuang zetin, a khualzinnakah a hawh pepel theihnak tukin bawm un hi. Mahten keima lakah hengleh tuk hi. Hilai ah a hen tuk cu unau dangte tuah ngakhelzet ung hi.

¹² A unau uh Apollos thu ah, unau dangte tuah na lak uhah zin tukin so li naveng atu-in, a hawh tuk cu lungkim ma laih hi. A lemcang ten hawhleh tuk hi.

Thucah Tawpnak

¹³ Lungmu cip zetin, na um un. Na upnak sung uhah kho zetin ding un. Ngalpha in um unna, a ngilmite hi un.

¹⁴ Ihempoh itnak tuah dek un.

¹⁵ Stefanas le a innkuate cu na theih uhmite haw hi. Amuhte cu Akhaia peng sung pen Khristian masabel haw hi. Pathian mihing tei ca in, a lungmu le a thazaang venghawngin pia haw hi. U le naute aw,

¹⁶ amuhte hihen, a nadehpih haw hihen, mi a pui dan haw hi zui zazal un tin ngen ing.

¹⁷ Stefanas, Fortunatus le Akhaikus a hen haw hangin lungdam ing, na um uh ngawl vang thei lawlawm mang.

¹⁸ Na thin uh a noptik haw bangin kei vang ka lungnoptik bok haw hi. Hi mite cu pah tak ngangai haw hi.

¹⁹ Asia ngam a pawlpi ten nuksat haw hi. Aquila le Priscilla ten a inn haw a khawmtu pawlpi ten Khristian itdunnak tuah nuksat haw hi.

²⁰ Hilai unau ten nuksat bok haw hi. Pa khat le pa khat unau itdunnak tuah thutdun un.

²¹ Hi bangin Paul in nuksat ing tih hi keima khut loli in ka ngatmi hi.

²² Kua hei in, Topa a deih ngawltu cu a humah siatnak heng tahen. Maranatha: Topa hung tohin hi.

²³ Topa Jesuh i hehpihnak cu nohtei lakah um zal tahen.

²⁴ Khrih Jesuh hangin nohte ka ihnak cu na venghawng uh humah um tahen. Amen.