1 KORIN 15 - Ngawm Bible

Khrih Thawhlehnak

¹ U le naute aw, nohtei lakah ka phuanmi Thuthangpha khi tu in theilehtik nuam ing. Mah Thuthangpha cu na pom sa uhmi le na upnak uh kho zetin, a dinnak mun hi.

² Nohtei lakah ka phuan sami Thuthangpha hi khoh zetin, na pom uh tale nunpat mite hi tuk uh ci. Na umkho uh ma tale thu umtu na hihnak uh hi thawnthong hi tuk hi.

³ Ka pom ngah zomi atu-in nohtei lakah a thupibel hi tin ka phuan sawlawn mi cu hi bangin hi. Lai Thiangtho sungah ngatmi bangin, Khrih cu a sualnak uh hangin thi hi.

⁴ Phum haw in Lai Thiangtho sungah ngatmi bangin ni thum nungten thawhlehtikin um hi.

⁵ Peter lakah langin, mah nungten nungzuitu sawm le pa nih tei lakah lang hi.

⁶ Mah hum pen a nungzuite za nga val tei lakah vei khat lang hi. Mah a zuitu mi khenkhatte thi zo haw naven a tam saw cu nung haw laih hi.

⁷ Mahten James lakah langin, mahnung ten tiikmi venghawng tei lakah lang hi.

⁸ A dawltabel ten keima lakah lang bok hi. Kei cu ni le ha kimin, a suakmi hei kha ma naveng!

⁹ Kei cu tiikmi lak pen a neubel, tiikmi tih hei in sam tak ngawlmi ing. Itahim titale Pathian pawlpi bawlsiatu ing.

¹⁰ Mahnaven Pathian hehpihnak hangin tu bangin ka hih theihnak hi. Ka humah a itnak le hehpihnak a neihmi cu a thawnthong hi ma hi. Tiikmi dangte sangin nase saw in, nadek ing. Mahnaven mahmi cu keima dehmi tih tuk hi ma hi. Ka nel a, um Pathian hehpihnak i dehmi hi saw hi.

¹¹ Mahten Thuthang cu ngah uh ci. Ka lak pen na ngah uhmi hihen, a lak haw pen na ngah uhmi hihen, a venghawng uh i phuanmi cu hihi hi, na up uhmi cu hi leleng hi.

Ohtei Thawhlehnak

¹² Thuthang a phuan uhmi cu, Khrih cu thihnak pen thawhlehtik hi zo hi tihmi thu hi. Mahnaven tu in mi khenkhat ten ita a thi mite thawhtikleh hi haw tukma tin ti thei uh cim?

¹³ Mahtin na tih uhmi cu thuman bang ahin, Khrih thawhlehtik hi tukma tihnak hi tuk hi.

¹⁴ Thihnak pen Khrih a tholeh ma tale Thuthang phuan tuk le up tuk imah nei tukma hung hi.

¹⁵ Mah hum pen Pathian thu lamah zolthu son suak tuk hung hi. Itahim titale Khrih cu thihnak pen Pathian in thotikleh zo tih cu hilh leleng hung hi. Mahnaven a thi mite nunnakah thawhlehtik ngawl ngangai ahi tale Pathian in Khrih vang tholehtik tukma hi.

¹⁶ Itahim titale a thi mite thawhlehtik ngawl ahi tale Khrih vang thawhtikleh hi tukma hi.

¹⁷ Mah bangin Khrih thawhlehtik ahimata na upnak uh hi zolthu in suak thong tuk a, sualnak sungah a paithong mite hi tuk uh ci.

¹⁸ Mah hum pen Khrih a umtu, a thi mite vang paithong bok haw tuk hi.

¹⁹ Khrih sungah muansannak a neih uhmi hi imah lai heng ngawlin, hi leihum a nunnak uh ca bek ahi tale mihing lak pen a hehpihhuaibel hi tuk hung hi.

²⁰ Mahnaven thutak cu hi tih hin hi: Khrih cu thihnak pen thawhtikleh hi zo in, a thisa thawhtikleh hi haw tuk tih theihnakin ngah masabel hi.

²¹ Mi pa khat hangin thihnak a um bang bokin mi pa khat hangin thawhlehnak heng bok hi.

²² Adam tuah a pehdunnak haw hangin mi hempoh thihnak a tawh haw bangin, Khrih tuah a pehdunnak haw hangin mi hempoh nunnakah thawhlehtik hi bok haw tuk hi.

²³ Mahnaven a sasangin thawhlehtik hi haw tuk hi. A masabelin Khrih, a hun kikleh ten ama mihingte hi haw tuk hi.

²⁴ Mah nungten a dawltabel hun heng tuk hi. Khrih i Hawvang lam uktute, thuneitute le huham neitute hempoh a neh khawng nungten Uknak cu Pa Pathian nelah ap tuk hi.

²⁵ Itahim titale Pathian in ngal hempoh cu neh khawngin, a ke nuai ah a koih khawng laklawh Khrih in uk tuk hi.

²⁶ Ngal nungdawlbel a neh tukmi cu thihnak hi.

²⁷ Itahim titale Lai Thiangtho in, “Pathian in ihempoh a ke nuai ah koih khawng tuk,” ti hi. “Ihempoh” tih ten Pathian amah tel ma hi tih cu hilh kulma hi. Pathian in, na hempoh cu Khrih i nuai ah koih khawng tuk hi.

²⁸ Mahnaven ihempoh cu Khrih uknak nuai ah a koih khawng ceng ten Capa amah vang mah na hempoh ama nuai ah a koih saktu Pathian i nuai ah koihcop bok tuk a, Pathian cu ihempoh i humah uktu hi tuk hi.

²⁹ Mahten a thi mitei ai-awhin itakaw mi khenkhat ten tuiphumnak a neitute hi itin kaw a hih haw tuk? A tupmi haw cu i kaw? Mi khenkhat tei tihnak bangin a thi mite thawhtikleh ngawl ahi ngangai ahin, ita hi miten mithi tei ai-in tuiphumnak a lak theih haw?

³⁰ Eimuh le eimuh ti ahin, thinsuknak lakah catngawlin itakaw a um nuam lih uh?

³¹ U le naute aw, nisialin thi ing, Khrih Jesuh tuah a pehdunnak uh hangin nohte cu ka tuangkhawnnak hi uh ci. Mah hangin hi bangin awn thei ing.

³² Mahten hi Efesa khua ah “Sahang” tuah sualdun ung hi tihtakin, ka bawlmi hi mihing tumtahnak bek tuah ka bawlmi ahi tale ka nemcuamnak i um tuk him? A thi mi thawhlehtik ahi haw ngangai ma ahin, tehkipnak a um bangin, “Zingten thi tuk thongpoh, in le ei nung hi,” a tih haw bang tuk si hung.

³³ Zolmi hi pahsuh un. Santehnakin, “Ngualcam pha ngawlin ziaza siatik hi,” ti hi.

³⁴ Na lungmu uh khanglo unna, na sualnak uh cawl toh un. Mi khenkhat cu Pathian hei na theih uh ngawl hangin zakca haw hen tin ka tihmi hi.

Thawhlehnak Pumpi

³⁵ Mi khenkhat ten, “Itin kaw mithite cu thawhlehtik a hih haw tuk? Iti bang pumpi kaw a neih haw tuk? tin dong tuk uh ci.”

³⁶ Misilte! Lei sungah anci na cin uhten a thi masa ma tale po thei ma hi.

³⁷ Mahten anci na cin uhten sangvut ci hihen, anci dang hihen a ci bek si na cin uh, a poto tukmi a kung cing awng ma si uh ci.

³⁸ Pathian in mah anci cu a deihmi a kung tuk pia hi, anci hempoh cu a kung tuatuam pia tek hi.

³⁹ Nunnak a neimi hempohin, a neihmi haw taksa bangten ma hi. Mihing taksa cu phun khat hi a, ngamsa i taksa cu phun dang hi. Vano taksa cu dangin, ngasa vang dang hi.

⁴⁰ Mahten vancung luang pumpi le leihum pumpi um hi. Vancung luang pumpi mawinak le leihum luang pumpi mawinak cu dangdun hi.

⁴¹ Ni in ama mawinak nei a, hade hei in mawinak phundang nei hi. Aksi vangin mawinak nei in, a mawinak dang tek nei haw hi.

⁴² Mithite thihnak pen thawhlehtik a hih haw ten mahti bangin hi bok tuk hi. Taksa pum cu vui a hih ten a thi theimi hi. Thawhlehtik a hih ten a thi thei ngawlmi hi tuk hi.

⁴³ Phum a hih ten a mawi ngawlmi le thanemmi hi. Thawhlehtik a hih ten a mawi zetmi le a cak zetmi hi tuk hi.

⁴⁴ Phum ten tisa pumpi hi. Thawhlehtik a hih ten hawvang pumpi hi tuk hi. Tisa pumpi a um bangin hawvang pumpi vang um hi.

⁴⁵ Itahim titale Lai Thiangtho in, “Mihing masabel Adam cu a nungmi mihingin bawl,” ti hi. Mahnaven a dawltabel Adam cu nunnak piatu Hawvang hi.

⁴⁶ A heng masabel cu hawvang hi ma hi, tisa hi. Mah nungten Hawvang heng hi.

⁴⁷ Lei a bawlmi masabel Adam cu lei pen hung hi. A pa nihnak Adam cu van pen hung hi.

⁴⁸ Leihum ta ahi mite cu lei a bawlmi bang haw hi. Vancung ta ahi mite cu van pen a hungmi bang haw hi.

⁴⁹ Lei a bawlmi mihing mel a silh uh bangin van pen a hungmi pa i mel silh tuk hung hi.

⁵⁰ U le naute aw, ka hilhmi cu hi tin hi. Thi le sa tuah bawlmi ten Pathian Uknak cu co thei haw tukma hi. A thi theimi in, a thi thei ngawlmi cu luah thei tukma hi.

^51-52 Thutak ipmi hi ngai kek un. A venghawng uhin, thi khawng tukma hung hi. Mahnaven a nungdawlbel pengkul a tum haw ten mitphelep sungin thekdun tuk hung. Itahim titale pengkul tum thawm a nging ten mithite thawhlehtik hi haw tuk a, thileh haw tukma toh hi. Mahten ohte cu thekdun khawng tuk hung hi.

⁵³ Itahim titale a thi theimi cu a thi thei ngawl tohmi in thek tuk hi, a thi tukmi cu a thi tuk ngawlmi in thek khawng tuk hi.

⁵⁴ Mah bangin a thi theimi cu a thi thei ngawltohin thek a hih ten Lai Thiangtho in, “Thihnak cu bolaltik khawng hi zo hi, nehnak cu cangkim zo hi,” a tihmi cu kim tuk hi.

⁵⁵ “Maw thihnak, na mi nehnak ilai ah him? Maw thihnak, na ngu ilai ah him?”

⁵⁶ Thihnak i ngu cu sualnak hi in, sualnak i huham cu Daan hi.

⁵⁷ Mahnaven a Topa uh Jesuh Khrih hangin nehnak piatu Pathian nelah lungdam hung hi.

⁵⁸ Mah hangin ka ihmi u le naute, lum thong tuk ngawlin khozet ding un. Pathian na cu sonbang tuk ngawlin dek leleng un. Topa i nadeh cu thawnthong awng ma hi tih cu thei uh ci.