1 KORIN 13 - Ngawm Bible

Itnak

¹ Mihing awn a phunkim hihen, vancungmi tei awn hei hihen, ka awn thei vangin itnak ka nei ma tale ka awn cu a nging tul thongmi daak le a nging leilui thei daakkop bang hi.

² Profet thuhilh thiamnak laksawng nei in, cihnak a phunkim le thukuh a phunkim theih theihnak vang nei in, mualpi thawn tham thei tianin upnak ka nei vangin itnak ka nei ma tale a phukthong ing hi.

³ Ka neihmi hempoh midangte pia khawngin, ka pumpi hi mei ah halkang tuk tianin, ka pia ngam vangin itnak ka nei ma tale kei ca in imah nemcuam ma hi.

⁴ Itnak cu a thinsau in, mi hehpihnak nei hi. Itnakin mi iksik ma, tuangkhawng ma, pualthau bokma hi.

⁵ Itnak cu a nuncan sia ma, ama ca bek ngaisung ma, a thin vang com ma hi.

⁶ Itnakin, a bawl sualmite cing leleng ma hi. Itnak cu na pha ngawl humah lungdam awng ma hi, Mahnaven thutak hum bekah a lungdam hi.

⁷ Itnak cu lungkiam tih nei ma hi, a upnak, muansanmi le thinsaunak cu bo ni nei ma hi.

⁸ Itnak cu bo thei ma hi. Thuhilh thiamnak a um hei in bo tuk hi, awn phundang tuah ot theihnak a um vangin bo tuk hi. Thiamnak le theihnakte lalthong khawng tuk hi.

⁹ Itahim titale thiamnak laksawng a ngah uhmi le thuhilh thiamnak a comi uhte hi a langkhen bek hi.

¹⁰ Mahnaven a cangkimmi a hen ten a cangkim ngawl mite cu pai khawng tuk laih hi.

¹¹ Naupang ka hih laihin ka otdan, ka muhdan le ka thu ngaihsut dan cu naupang ngangai hi. Mahnaven atu-in upa zo ka hih tak naupang dan cu zui nuam lehma toh ing.

¹² Atu-in, amuhdan uhte hi limlang sung a, ciang ngawlin a lim bek amuh uh bang hi. Mahnaven mah hun ten, maitonin mu tuk hung hi. Tu a ka theihnakte hi cangkim ma hi, mahnaven mah hun ten cangkim tuk hi. Pathian in kei a theihnak a cangkim bangin ka theihnak vang cangkimzet tuk laih hi.

¹³ A bo thei ngawlmi na pa thum um hi. Mahte cu upnak, muansannak le itnakte haw hi, hi tei lak pen a ngengbel cu itnak hi.