1 KORIN 1 - Ngawm Bible

¹ Jesuh Khrih i nungzuitu hi tukin Pathian lungkimnak tuah sammi keimah Paul le a unau uh Sosthenes in,

² Pathian mithiang hi tukin sammi le Jesuh Khrih tuah na pehzopnak uh hangin amata a himi, Korin khua a um Pathian i miphun thiangtho, a Topa uh le Jesuh Khrih a biatu mun dadang a umte hempoh tei lakah laikuat ing.

³ Pathian a Pa uh le Topa Jesuh Khrih in hehpihnak le lemdaihnak thupha pia zal tahen.

Khrih Sungah Thupha Muicu

⁴ Jesuh Khrih hangin hehpihnak cu na lak uhah piak a hih zo hangin ka Pathian cu thangphat leleng ing.

⁵ Itahim titale Khrih tuah na pehzomnak uh hu le thawmin ihempoh cangkimin piak hi zo uh ci, thuhilh thiamnak le theihnak lam hei ah cangkim zo uh ci.

⁶ Khrih i thula a phuan uhmi hi na sung uhah khimzet zo hi tih cu langin,

⁷ Jesuh Khrih a Topa uh a lang tukmi na ngah uh laihin, na co ngawl uhmi hawvang lam laksawng pa khat hei umma hi.

⁸ A tawpnak tian Amah in cingkhawi tuk a, mahten a Topa uh Jesuh Khrih i Ni ten sualnak nei ngawlmi hi tuk uh ci.

⁹ A Capa Jesuh Khrih a Topa uh tuah pawlkomnak nei tukin a samtu Pathian cu muantak hi.

Pawlpi Sung Khenkheknak

¹⁰ U le naute aw, nangmu sungah khenkheknak um tuk ngawlin na lungmu uh ailemno in um un, tin a Topa uh Jesuh Khrih minin ngen ing. Lemdunzet le lungmu munkhatno in tuptahnak bangtenno in, na um un.

¹¹ Ka u le naute aw, nangmu sung pen hauhdunnak um leleng hi tih cu Chloes i unaupih ten ciang zetin hilh haw hi.

¹² Ka hilh nuammi cu mi khenkhat ten, “Kohte cu Paul i nungzuitute ung hi,” tin ti uh ci; khenkhatin, “Kohte cu Apollos i nungzuite ung hi,” tin ti uh ci; khenkhat ten, “Kohte cu Peter i nungzuite ung hi,” tin ti uh ci; mi khenkhatin, “Kohte cu Khrih i nungzuitute ung hi,” tin, a tumtekin ti uh ci.

¹³ Khrih cu a khenkhekmi maw? Nohtei ca in thinglamtehah a thah haw mi cu Paul maw i him? Paul minin maw tuiphumnak na lak uh?

¹⁴ Nohtei lakah Krispas le Kaias sial ngawl kuamah tuiphumnak ka piak ngawl hangin Pathian humah ka lungdam ing.

¹⁵ Mah hangin kuamah in, “Kei cu Paul minin tuiphum ing,” ti thei haw tukma hi.

¹⁶ (Hizuh hi, Stefanas le a innkuapihte tuiphumnak pia ngai ing; midang tuiphumnak ka piak thei mang.)

¹⁷ Khrih in midang tuiphumnak pia tukin keimah hah ma hi, Thuthangpha hilh tukin a tiikmi ing hi, tin ka tihmi hi mihing cihnak awnkam mangin hilh mang hi, itahim titale leihum cihnak awnkam mangin ka hilh ahi tale Khrih i thinglamteh humah a thihnak hi mualnei ngawlin um tuk hi.

Khrih Cu Pathian i Huham le Cihnak

¹⁸ Thinglamteh humah Khrih i thihnak thu hi a lalthong li toh tei ca in silhahzet hi; mahnaven nunpat lih laih ohtei ca tukin Pathian i huham hi.

¹⁹ Lai Thiangtho in, “Micip tei cihnak cu siatsuah tung a, mithiam tei thiamnak cu vawk tung hi,” ti hi.

²⁰ Mah hangin micipte ilai ah kaw a um haw? Mithiamte ilai ah um haw kaw? Leihum thu el thiamte ilai ah kaw a um haw? Leihum cihnak cu silhahzet tih cu Pathian in langtik zo hi.

²¹ Mihing ten amu cihnak tuah Pathian a theih ngawlnak haw tukin Pathian in ama cihnak tuah bawlhamsa zo hi. “Sil thu” hi tin, a ngaihsut haw mi Thuthangpha a umtute nunpan tukin Pathian i bawlmi hi.

²² Judah miten a up theihnak haw tukin thasiahhuai nalamdang mu nuam haw a; Grik miten cihnak zei haw hi.

²³ Mahnaven oh ten thinglamtehah khenin, a tak haw mi Khrih phuang hung a, mah thu cu Judah tei ca in lupbahnak hi a, Grik tei ca in sil thu a tih haw mi hi.

²⁴ Mahnaven Pathian i a samsa tei ca in Judah mi hihen, Grik mi hihen, a phuan uhmi cu Khrih hi. Khrih cu Pathian ngilnak le cihnak hi.

²⁵ Itahim titale Pathian i silnak bang a tih uhmi cu mihing i cihnak sangin cip saw hi; mahten Pathian i thanemnak bang a tih uhmi cu mihing i ngilnak sangin ngil saw hi.

²⁶ U le naute, Pathian in nohte a sam laihin iti bang ung ngim, tih thei leleng un hi. Mihing tei mitin, a zo uh tale, micip, thuneitu le upat tak mihing demno bek uh ci.

²⁷ Mahnaven micip tei zahcaknak tukin leihum mitei misil a tih haw mi cu Pathian in teng him hi. Mi ngil le huham nei tei zahcaknak tukin leihum mitei mi thanem tihmi cu Pathian in teng him hi.

²⁸ Leihum miten thupi zetin, a ngaihsut haw mi siatsuah tukin leihum mitei zotsak le nautatmi, imah simsial ngawlmite Pathian in teng him hi.

²⁹ Mahtibang a hih hangin Pathian mai ah kuamah in tuangkhawng thei haw tukma hi.

³⁰ Khrih Jesuh cu na nunnak uhah a bulpantu cu amah Pathian hi. Pathian in Khrih cu eimu cihnak tukin bawl hi. Khrih i hangin ohte cu Pathian tuah lemdun zo hung. Pathian mi thiangtho in suak zo hung a, a suakcami hi zo hung hi.

³¹ Mah hangin Lai Thiangtho in; “Akua hei hihen a tuangkhawng nuam ten, Topa i bawlmi hum bekah, tuangkhawng hen,” ti hi.