1 KHANGSIALNAK 4 - Ngawm Bible

Judah Casuante

¹ Judah casuan khenkhatte cu Pereg, Hezron, Karmi, Hur le Shobal haw hi.

² Shobal cu Reaiah i pa hi; Reaiah cu Jahath i pa hi; Jahath cu Ahumai le Lahad tei pa hi; hi cu Zorah a, um tei cikhaihtute hi.

^3-4 Hur cu a pa Kaleb i zi, Efrath i capa upabel hi; a casuante cu Bethlehem khuasattu hi haw hi. Hur in capa pa thum nei in, Etam, Penuel le Ezer hi haw hi. Etam in capa pa thum nei in, Jezreel, Ishma le Idbash haw hi; canu pa khat vang nei in Hazzelelponi hi. Penuel cu Gedor khuasattu hi, Ezer cu Hushah khuasattu hi.

⁵ Tekoa khuasattu Ashhur in zi pa nih nei in, Helah le Naarah haw hi.

⁶ Naarah tuah capa pa li nei haw in Ahuzzam, Hefer, Temeni le Haahashtari haw hi.

⁷ Helah tuah capa pa thum nei haw in, Zereth, Izhar le Ethanan haw hi.

⁸ Koz cu Anub le Zobebah i pa hi, Harum capa Aharhel hinnam tei cikhaihtu hi.

⁹ Jabez a tih haw mi umin, a innkua haw pen a upatbelmi hi. A nauhinnak nazet hangin a nu in, Jabez tin sa hi.

¹⁰ Jabez in Israel Pathian nelah thungenin, “Topa muicu pia zal inna, ngam zalzet pia in hi. Ka lakah um inna, siatnak le haksatnak ka tawh ngawlnak tukin hupin,” ti hi. Mah hangin Pathian in, a ngetmi bangin pia hi.

Adang Innkuapihte

¹¹ Shuhah unau Kaleb in, capa pa khat Mehir nei hi. Mehir cu Eshton i pa hi,

¹² Eshton in capa pa thum, Bethrafa, Paseah le Tehinnah haw hi. Tehinnah cu Nahash khuapi sattu hi. Himi tei casuante cu Rekah ah um haw hi.

¹³ Kenaz in capa pa nih nei in, Othniel le Seraiah haw hi. Othniel vangin capa pa nih nei in, Hathath le Meonothai haw hi.

¹⁴ Meonothai cu Ofrah i pa hi. Seraiah cu Joab i pa hi, khutzung thiam nguakcang tei umnak khutzungthiam Munlawn khuasattu hi.

¹⁵ Jefunneh capa Kaleb in capa pa thum nei in, Iru, Elah le Naam haw hi. Elah cu Kenaz i pa hi.

¹⁶ Jehallelel in capa pa li nei in, Zif, Zifah, Tiria le Asarel haw hi.

^17-18 Ezrah in capa pa li nei in, Jether, Mered, Efer le Jalon haw hi. Mered in Izipt kumpi canu Bithiah huai in, canu pa khat, Miriam le capa pa nih, Shammai le Ishbah nei haw hi. Ishabah cu Eshtemoa khuasattu hi. Mered in zi dang, Judah hinnam numei huai in, capa pa thum nei haw hi. Jered, Gedor khuasattu; Heber, Soko khua le Jekuthiel, Zanoah khuasattu haw hi.

¹⁹ Hodiah in, Naham celnu huai hi. A canaute cu Keilah khua mi, Garm mite le Eshtemoa khua um Maakah mitei cikhaihtu hi.

²⁰ Shimon in, capa pa li nei in, Amnon, Rinnah, Benhanan le Tilon haw hi. Ishi in capa pa nih nei in, Zoheth le Benzoheth haw hi.

Shelah Casuante

²¹ Shelah cu Judah i capa lak pen pa khat hi. A casuante cu Lekah khuasattu Er, Mereshah khuasattu Laadah, Bethashbea khua um puantaktute hingtu;

²² Kozeba khua a ummite le Jokim, Joash le Saraf, Moab numei huai in, Bethlehem khua ah um haw hi. (Hi tangthu hi lunzet zo hi.)

²³ Amuhte cu beel bawltute haw hi, Netaim le Gederah khua ah um haw in, kumpi nadektu haw hi.

Simeon Casuante

²⁴ Simeon in capa pa nga nei in, Nemuel, Jamin, Jarib, Zerah le Shaul haw hi.

²⁵ Shaul capa cu Shallum hi, a tupa cu Mibsam hi, a tusin cu Mishma hi.

²⁶ Mishma pen a hinnam cikhaihtu Hammuel, Zakhur le Shimei tin, a sasangin um haw hi.

²⁷ Shimei in capa sawm le pa luk le canu pa luk nei hi; mahnaven a innkua dangte cu canau dem saw deuh nei haw in, Simeon hinnam cu Judah hinnam zahin, pung haw ma.

²⁸ David Kumpi khan tian, Simeon casuan cu Beersheba, Moladah, Hazarshual,

²⁹ Bilhah, Ezem, Tolad,

³⁰ Bethuel, Hormah, Ziklag,

³¹ Beth Markaboth, Hazarsusim, Bethbiri le Shaaraim khua ah um haw hi.

³² Adang mun nga hei ah um haw; Etam, Ain, Rimmon, Tokhen le Ashan ah um haw hi.

³³ A elkim khuano le hanglam Baalath khua tian, um haw hi. A innkua le a umnak tei thu cu hi bangin nei haw hi.

^34-38 A hinnam ten haw pen a puitute cu a nuailamte na hi haw hi. Meshobab, Jamlek, Amaziah capa Joshah, Joel, Asiel capa Seraiah, Seraiah capa Joshibiah, Joshibiah capa Jehu, Elioenai, Jaakobah, Jeshohaiah, Asaiah, Adiel, Jesimiel Benaiah, Ziza cu Sifi capa hi, Sifi cu Allon capa hi, Jedaiah, Shimri le Shemaiah tei casuante haw hi. A innkua pungzai in,

³⁹ nisuahnak lam Gerar hen kuan tian, umin, a tuute cu khuapi umnak i nisuahnak lam munlawnah tatik haw hi.

⁴⁰ A ngan tei eih tukin ngampha le ngamzal, lauthawng tuk um ngawlnak mun nei haw hi. Mahlai ah a um masate cu Ham mite hi.

⁴¹ Judah kumpi Hezekiah khanin, a hum a, min ngatte cu Gerar ah hawhin, mah laih a, um tei puanbuk le deute cu siatsuah khawng haw hi. A tuu tei eih tukin ngam phapha a tam hangin mahte cu hawlvawkin, a umnak haw cu luahtum haw hi.

⁴² Simeon hinnam sung pen mihing za nga cu nisuahnak lam Edom ah hawh haw a, Ishi capa Pelatiah, Neariah, Refaiah le Uzziel ten pui haw hi.

⁴³ Mahlai ah a tanglaihmi Amalek mite cu that khawng haw in, a umnak haw cu luahtum hawta hi.