1 KHANGSIALNAK 22 - Ngawm Bible

¹ David in, “Hilai ah Topa i biakinn cu um tuk hi. Hilai ah Israel miten halkang biakpiaknak pia haw tuk hi,” ti hi.

Biakinn Sa Tukin Timtuah Haw

² David Kumpi in Israel ngam sungah a um mi, hinnam dang hempoh samkhawmin nadektik hi. Suang seekthiam ten Biakinn saknak tukin suangseek haw hi.

³ Tawngkhen le kongkhah letnak tuk thik tampi pia in, daalte ngen cu kuamah i cuai khai theih ngawl tianin pia hi.

⁴ Taiar le Sidon miten Sidar thing pia haw hi.

⁵ David in, “Ka capa Solomon i sak tukmi Topa i Biakinn cu a pha tatakmi le leihum pen minthangmi a hih kul hi. Solomon tale naupangzet laih a hih ten imah a bawl thiam laihngawl hangin, keimah in, a kulmi hempoh ka tuangtip khawng kul hi,” ti hi. Mah hangin David in, a nun sungin na tampi cum hi.

⁶ David in, a capa Solomon cu samin, Topa, Israel i Pathian Biakinn sak tuk thupia hi.

⁷ A pa in, “Ka capa, Topa ka Pathian minthannak tukin biakinn sa nuam ing.”

⁸ Mahnaven, Topa in, “Ngal tam leita na do hangin mi tampi that zo toh ci,” ti hi. Thisan tampi ka luantik zo toh hangin a biakinn sa tuk cu phalma hi.

⁹ Mahnaven thutiamin, ‘Capa nei tuk ci, amah cu a ngal tei khut pen hup tung a, lemdaihnak tuah ngam uk tuk hi. A min cu Solomon hi tuk hi; itahim titale ama uk sungin Israel ngamah lemdaihnak le himnak hengtik tung hi.

¹⁰ Amah in keimata tukin biakinn sa tuk hi. Amah cu ka capa hi tuk a, kei cu a pa hi tung. Ama uknak cu Israel humah kumkhua in khotik tung hi,’ ” ti hi.

¹¹ “Mah hangin ka capa, Topa na Pathian cu na lakah um zal hen; ama thutepnak bangin na Topa i biakinn cu lawhtingno in sa suak zalin hi.

¹² Israel ngam cu ama Daan bangin na uk theihnak tukin Topa na Pathian in cihnak le theihtupnak pia zal tahen.

¹³ Topa in Israel tei zui tukin Moses lakah a piakmi Daante na zui ahi tale na lamtuangin lawhting tuk ci. Ngil zetin le ngalpha zetin um inna, imah in lauthawngnak pia ma hen.

¹⁴ Haksa zetin sui puak thawng za khat le ngun puak million khat cu biakinn saknak tukin khawl zo ing. Mah hum pen daak le thik cu puak sialceng ngawl um hi. Thing le suangte vang khawlham khawng zo ing, mahnaven nang hei in betleh bokin hi.

¹⁵ Nadektu tampi nei ci. Suang cotu, suang sektu, lettama le khutzung thiamnak nei a tawtuam,

¹⁶ Sui le ngun sek thiamtu le daak le thik sekthiamtu tampi um haw hi. Tu pepanin nadeh pan inna, Topa in umpih zal hen,” ti hi.

¹⁷ David in Israel mi puitute cu Solomon bawm tukin thupia hi.

¹⁸ “Topa na Pathian uhin, na ngam buppi uhah lemdaihnak pia hi. Hi ngam a um minam hempoh cu nehtik khawngin, atu-in, na khutnuai uh le Topa i khutnuai ah um khawng zo haw hi.

¹⁹ Atu-in, na lungmu uh venghawng le na tha neih uhmi venghawng tuah Topa i na cu dek un. Topa i Thutiam Kuang le amah biaknak a manmi na thiangthote koihnak tukin le a minthannak tukin Topa i biakinn cu sa un,” ti hi.