1 KHANGSIALNAK 16 - Ngawm Bible

¹ David i Sakmi puanbukah Thutiam Kuang cu hawhtum pihin, a sungah koih haw hi. Halkang biakpiaknak le pawlkom biakpiaknak cu Topa i lakah pia haw hi.

² David in mah biakpiaknakte cu a celh ten mipite cu Topa i minin muicu pia in,

³ an sem hi. Israel mi venghawngin numei hihen, pano hihen, mihing pa khatah cangho phil khat ten, cik kio tel khat ten le sabitko dawmlaih ten pia hi.

⁴ David in, Levi mi khenkhatte cu Thutiam Kuang mai a, nadektu tukin le thangphatnak le lasaknak tuah Topa Israel Pathian a biatute hotu tukin koih hi.

⁵ Mah tei lak pen a hotu haw cu, Asaf hi in, a bawmtu cu Zekhariah hi. Jeiel, Shemiramoth, Jehiel, Mattithiah, Eliab, Benaiah, Obed Edom le Jeiel hei in bawm haw hi. Amuh cu tingtang tumtu hi haw a, Asaf cu daakkop khengtu hi.

⁶ Thiampi pa nih Benaiah le Jahaziel cu Thutiam Kuang mai ah a hun kim sial ten pengkul tum lelengtu haw hi.

⁷ David in Asaf le a unau Levi mite cu Pathian thangphat tuk dehvo a piak masabelte haw hi.

Topa Thangphatnak La

⁸ Topa cu thangphatnak pia un; A thawm ngengnak cu phuang un. A bawlmi nate cu mi hempoh lakah than un.

⁹ Topa i lakah thangphatnak la sa un, Na lamdang a bawl zo hangin hi.

¹⁰ Amata a hih uh hangin na lung uh dam un, Amah biatu hempoh ten na lung uh dam un.

¹¹ Topa i lakah bopnak ngenin hung un, Cawlngawlin amah bia un.

¹² Thasiahhuai a bawl mite phawk unna, a lamdang thukhennak vang phawk un.

¹³ Pathian salpa Jakob i casuante, Pathian tenmi Israel casuante, ngaisung hem un.

¹⁴ Topa cu a Pathian uh hi, A thupiakmi cu leihum buppi ah dim hi;

¹⁵ Pathian i thutepmi cu phawkngil hihim pahsuh un, Kumkhua phatin, a bawlmi hi;

¹⁶ Abraham lakah a thutepnak le Isaak lakah a thutiamnak.

¹⁷ Topa in Jakob lakah thutepnak bawl hi, Kumkhua phaat tukin bawl hi.

¹⁸ “Kanaan ngam pia tung,” “Nata hi leleng tuk hi,” ti hi.

¹⁹ Pathian i mihingte cu demno haw hi, Kanaan ngamah mikhualin suak haw hi.

²⁰ Ngam khat pen ngam khatah vak haw hi, Uknak mun khat pen mun dangah thawn haw hi.

²¹ Hi naven kuamah nuainem ma hi. Pathian in humhimin, amuh a pat hangin kumpite cu vonek hi.

²² “Ka tenmi ka mihingte cu tawngkha pahsuh un; Ka profet zen kha pahsuh un,” ti hi.

²³ Leihumpi in Topa cu thangphat un; Nisialin ohte a patnak thuthangpha cu phuang un.

²⁴ Minam hempoh lakah a sunloihnak than un; Miphun hempoh tei lakah a huham neihdan hilh un.

²⁵ Topa cu a thawmngengzet hi, pathian dangte sangin nase zetin upat tukmi hi.

²⁶ Miphun dang tei pathian cu a milim bek hi; Mahnaven van a ummi na hempoh cu Topa i semsuah mi haw hi.

²⁷ Amah cu huham le sunloihnak tuah kil khawng hi; A biakinn cu huham le lungdamnak tuah dim hi.

²⁸ Leihum mi hempoh ten Topa cu thangphat un; A huham le a sunloihnak cu pahcawi un.

²⁹ A min sunglawi pahcawi ten un; Biakpiaknak tuah a biakinn ah hung un, Thiangthobel a lang ten a mai ah kun un;

³⁰ Leihum mi hempoh a mai ah cantawtokin um haw hen, Leihumpi a dinmun kho zia hi, thawn theih tuk hi ma toh hi.

³¹ Maw lei le van, na lungdam un; Topa cu kumpi hi tin mi hempoh lakah than un.

³² Au un, tuipi le a sung a ummite, Lungdam un, leingam le a hum a ummite.

³³ Leihum uk tukin Topa a hun ten, Tupi sung thingkungte lungdamin au haw tuk hi,

³⁴ Topa i lakah na lung uh dam un; Amah cu pha hi, a ihnak cu kumkhua in kho hi.

³⁵ A lakah, “Maw Pathian aw, hu pan zalin; Munkhatah khawmdun khawm unna, minam tampi tei khut sung pen hupin; mahten na humah ka lung uh dam tuk a, na min thiangtho cu thangphat tuk ung,” ti un hi.

³⁶ Topa, Israel Pathian cu thangphat un; Amah cu kumkhua pen kumkhua tianin thangphat un, Mahten mipi ten, “Amen” ti haw in, Topa cu thangphat haw hi.

Jerusalem le Gibeon Ah Pathian Biaknak

³⁷ David in Asaf le a unau Levi mite cu Thutiam Kuang koihnak munah nadek lelengtu tukin koih hi. Nisialin, a dehvo haw cu bawlsuak haw tuk hi.

³⁸ Amuh bawmtu tukin Jeduthun capa Obed Edom le a hinpih mihing sawm luk le liat um haw hi. Hosah le Obed Edom cu kongkhah cing tuk vangin dehvo nei haw hi.

³⁹ Thiampi Zadok le a unau thiampite cu Gibeon a um, Topa i biaknak munah nadektu haw hi.

⁴⁰ Topa in Israel tei lakah a piakmi Daan sung a um bangin thiampi ten zing le taksialin halkang biakpiaknak bawl leleng haw hi.

⁴¹ Amuh tuah munkhatin, Heman le Jeduthun le a cuang a ten mite cu Topa i itnak kumkhua a kho mi thangphat tukin um haw hi.

⁴² Thangphatnak la a sak haw ten a tum haw mi pengkul, daak, daakkop le tum theihmi nate cu Heman le Jeduthun ten zo thah bok haw hi. Jeduthun i unaupih ten kongkhah cing haw hi.

⁴³ Mipi cu innah pin haw a, David vang a innah pin bok hi.