1 KHANGSIALNAK 14 - Ngawm Bible

Jerusalem Ah David i Nadehmi

¹ Taiar kumpi Hiram in David lakah palai hahin kumpi innsaknak tukin sidar thingte, suang sektute le lettamate kuat hi.

² Topa in Israel Kumpi in bawl zo a, Ama mihingte hangin ka uknak cu khangto hi, tih cu David in thei hi.

³ Jerusalem khua ah David in zi tampi huai in, canu le capa tampi nei hi.

⁴ Jerusalem pen a hinnam a capa tei min cu: Shammua, Shobab, Nathan, Solomon,

⁵ Ibhar, Elishua, Elpelet,

⁶ Nogah, Nefeg, Jafia,

⁷ Elishama, Beeliada le Elifelet haw hi.

Filistin Ngalnehnak

⁸ Filistin miten Israel ngam buppi humah David cu Kumpi hi zo hi, tih a zak haw ten, amah man tukin a ngalkapte hawh haw hi. Mah thu cu David in, a zak ten Filistin ngalkap do tukin tul hi.

⁹ Filistin mite cu Refaim munlawn heng haw in, mahlai mite cu suam haw hi.

¹⁰ David in Topa i lakah, “Filistin mite hi do nang maw? Neh nang maw?” tin dong hi. Topa in, “Do in hi, neh tuk ci,” ti hi.

¹¹ David in Filistin mite cu Baal Perazim ah do in neh hi. David in, “Ngalte neh tukin Topa in tuilun bangin keimah mang hi,” ti hi. Mah hangin mahlai mun cu, Baal Perazim tin sam hi.

¹² Mahlai ah Filistin miten a milimte taisanin mah milimte haal tukin David in thupia a, haal khawng haw hi.

¹³ A ngei ngawlin munlawn a um Filistin miten hungin, suam leleu haw hi.

¹⁴ David in Topa dong leleu in, Topa in, “Hilai lam pen do pahsun, langkhat lam pen kawn inna, balsam theikung tei umnak lam pen do in hi.

¹⁵ Mah theikung hum a ke thawm bang na zak ten do in; itahim titale Filistin ngalkap nehtu tukin na mai ah Keimah hawh tung hi,” ti hi.

¹⁶ David in Pathian i thupiakmi bangin bawlin, Filistin ngalte cu Gibeon pen Gezer hen tian hawlvawk hi.

¹⁷ David i min cu khua tihkimah thangin, Topa hangin minam hempohin David cu lau haw hi.