1 KHANGSIALNAK 13 - Ngawm Bible

Thutiam Kuang Cu Kiriath Jearim Pen Thawn Haw

¹ David cu a ngalkap thawng khat hotu le za khat hotu ngalbawite tuah tawkdun khawm haw hi.

² Mahlai ah a hungmi Israel tei lakah, “Noh na lung uh kimin, Topa a Pathian uh vang a lungkim tale, a ngamsung uh a mihingte, thiampi le Levi mitei lakah mi hah nung inna, eimu lakah pumkhawm bok tukin hilh nung hi.

³ Hawh nung inna, Saul kumpi a hih laihin, a paih suahmi Pathian i Thutiam Kuang laleh nung,” tin than hi.

⁴ A thu tihmi cu lungkim tenin, a lungdamzet haw hi.

⁵ David lakah Israel mite cu hanglam pen Izipt ngamngi le saklam pen Hamath Mualkawn a, um mi tianin hung haw hi.

⁶ David le Israel mite cu Judah ngam Kiriath Jearim khuapi, (Baalah khuapi tihmi) ah Cherubim hum sunloihnak munah a khungtu, Topa i min a puatu, Thutiam Kuang cu laleh tukin hawh haw hi.

⁷ Abinadab inn a hen haw ten Thutiam Kuang cu la in, khuileng thak humah koih haw hi. Uzzah le Ahio in khuileng cu kholin,

⁸ David le Israel mite cu Pathian thangphatnakin, a tha neih tawp haw tuah laam haw hi. Lasa in, tingtang, khuang le daak, daakkop le pengkul tum haw hi.

⁹ Khidon a tih haw mun a, cangngawinak mun a hen haw ten Khuicangte a bah haw hangin Uzzah in Thutiam Kuang cu dom hi.

¹⁰ Topa cu Uzzah humah a thinuk vutin, Thutiam Kuang a zen hangin Topa i mai ah thi hi.

¹¹ Mahti bangin Uzzah humah Topa a thinuk hangin David cu a thinukzet bok hi. Mah hangin mah mun cu Perez Uzzah tin sam haw hi.

¹² David in Pathian lau zetin, “Hi Thutiam Kuang cu itin kaw atu-in ka hawhpih ngam tuk?” ti hi.

¹³ David in Thutiam Kuang cu Jerusalem ah hawhpih ma hi. Gath khua mipa Obed Edom a tih haw mi pa i innah zam hi.

¹⁴ Mahlai munah ha thum umin, Topa in, a innkua le a neihmi hempoh cu muicu pia hi.