1 KHANGSIALNAK 12 - Ngawm Bible

Benjamin Hinnam Pen David Zuitute

¹ Kish capa Saul cu Israel kumpi hi, a mitmuhah David um tuk ngawlin a hawlvawk nungten, David cu Ziklag ah um hi. A umnakah mi tampi a lakah hung haw in, umbok haw hi. Amuhte cu ngaldo meksa le muantak ngalkap haw hi.

² Kumpi Saul bangin Benjamin hinnam haw hi. Thalcang le saili a nuam babangin, a taklam, veilamin, kap thei haw hi.

³ A hotute cu: Gibeah pen Shemah capa Ahiezer le Joash haw hi. A ngalkapte cu a nuailam bangin hi haw hi. Azmaveth capa Jeziel le Pelet; Anathoth pen Berakah le Jehu

⁴ Ngalkap minthangzet le “Sawm thumte,” sung pen hotu pa khat, Gibeon pen Ishmaiah, Gederah pan Jeremiah, Jahaziel, Johanan le Jozabad

⁵ Harif pan Eluzai, Jerimoth, Bealiah, Shemariah, le Shefatiah

⁶ Korah hinnam pen Elkanah, Isshiah, Azarel, Joezer, le Jashobeam:

⁷ Gedor pan Jehoram capa Joelah le Zebadiah

Gad Hinnam Pen David Zuitute

⁸ Phillawn kulhtianah David a umlaihin, Gad mi ngalkap minthangte hung haw in, a lakah um haw hi. Amuhte cu ngaldo meksa haw in, lumphaw le ceipi mannak lamah thiamzet haw hi; a mitmai haw cu zoh ten kiosa bangin lauhuaizet haw in, a zuanzang daan haw cu mualhum sazuk bang haw hi.

^9-13 Amu lak pen hotu a upabel pen nautabel tian a sasangin: Ezer, Obadiah, Eliab, Mishmannah, Jeremiah, Attai, Eliel, Johanan Elzabad Jeremiah le Machbannai haw hi.

¹⁴ Gad mite hi khenkhatte cu a ngalbawi upa hi haw a, ngalkap thawng khat hotu haw hi, a khen cu ngalbawi nauta deuh hi haw in, za khat hotu hi haw hi.

¹⁵ Kum khat sung a, ha masabel, Jordan Ngun cu tuilunin phaikung a khong laih takin tui cu kaltanin, ngunpi nisuahnak lam hihen, nitumnak lam hihen, a umtu mihingte cu suk le to ah hawlvawk khawng haw hi.

Benjamin le Judah Pen David Zuitute

¹⁶ Ni khatin, Benjamin le Judah hinnam pen mihing khenkhat cu David umnak kulhtian sungah hawh haw hi.

¹⁷ David in muakin, a lak hawah, “Keimah bawm tukin ngualcam pha in, na hung uh tale ka lakah hung un. Mahnaven ka ngal tei lakah zuak tumin, na hung uh ahi tale nangmuh liamsuah tuk cu tum awng ma naveng na tup uhmi cu a pu le pa tei Pathian in mu tuk a, cawh tuk,” ti hi.

¹⁸ “Sawm thumte” tihmi tei lak pen hotu a suak lehmi Amasai humah hawvang hengin, amah in: “Maw David, na mihingte ung hi; Maw Jesse capa, nangmah lamtangte ung hi, Na humah daihnak um hen, Nangmah a bawmtu lakah lawhtinnak um hen, Pathian na lakah um hi,” ti hi. David in amuh cu ama mihingin koihin, a ngalkap sungah hotu in bawl hi.

Manasseh Hinnam Pen David Zuitute

¹⁹ David le Filistin mite cu kumpi Saul do tukin a hawh haw laihin, Manasseh hinnam sung pen ngalkap khenkhatte cu David lakah hung haw hi. David in Filistin mi bawm ma hi, a hawh ten nung haw ten Filistin pen bawi ahi awngmi Saul lakah zuak pang kha haw kawn tih a lau haw hangin David cu Ziklag ah kiktik haw hi.

²⁰ Ziklag ah a kih laihin, Manasseh hinnam a lakah a hungmi ngalkapte cu: Adnah, Jozabad, Jediael, Mikhael, Jozabad, Elihu le Zillethai haw hi. Manasseh ngamah a um haw laihin, ngalkap thawng khat tei hotu haw hi.

²¹ Ngalkap minthangzet a hih haw hangin David ngalkap tei hotu bawi in suak haw hi. Nungdawllam ten Israel ngalkap lakah ngalbawi hi haw hi.

²² Nisialin David lakah midang hung pepel haw in, a ngei ngawlin David ngalkap cu tam ngangai haw hi.

David Ngalkapte

^23-37 Topa i thutepnak bangin David cu Saul ai-in, kumpi suak tukin ngal do mek ngalkap tampi cu Hebron a, David lakah hung susuih haw hi. A hung mite cu a nuailam bangin hi. Judah hinnam pen ngalthuam a cawi cikcek mihing thawng luk le za liat, lumphaw le ceipi cawi tek haw hi. Simeon hinnam pen ngaldo zilsa ngalkap thawng salih le za khat. Levi hinnam pen ngalkap thawng li le za luk. Aaron casuan Jehoiada zuitu ngalkap thawng thum le za salih. Ngaldo thei khangno, Zadok i sangngam mihing sawm nih le pa nih amuhte cu hotu ngeh haw hi. Benjamin hinnam pen ngalkap thawng thum, Saul cu Benjamin hinnam a hih hangin Benjamin mi tam saw ten Saul pan haw hi. Efraim hinnam pen, a hinnam sung haw a, ngalkap minthang thawng sawm nih le za liat. Nitumnak lam Manasseh pen, David kumpi cangtiktu tukin ten mite mihing thawng sawm le thawng liat. Issakhar hinnam pen hotu za nih le a khutnuai ngalkap tek tuah haw hi. Himi cu Israel ca in i a bawl uh ahin, phabel tuk tih le ituk ten bawl tuk tih a theitu haw hi. Zebulun hinnam pen ngaldo napzet le muantakzet, iti bang hiamnam vang a mang thiamtu ngalkap thawng sawm nga. Naftali hinnam pen lumphaw le ceipi tuah a thuammi ngalkap bawi thawng khat le ngalkap thawng sawm thum le thawng salih. Dan hinnam pen ngaldo zilsa ngalkap thawng sawm nih le thawng liat le za luk. Asher hinnam pen ngaldo zilsa ngalkap thawng sawm li. Jordan Ngun pen nisuahnak lam a um, Reuben, Gad le Nisuahnak lam, Manasseh hinnam pen hiamnam a phunkim mangthiam samin zilh sa ngalkap thawng za le thawng sawm nih.

³⁸ Ngalkap hizah cu ngaldo tukin a tuangtim ceng haw ten Hebron ah hawh haw; a tuptah haw mi cu David cu Israel kumpi dektik tuk bek hi. Israel mi dadang vang mah ti bang tuptahnak nei in, um khawng haw hi.

³⁹ Ngamsung mihing tei a vaihawmsa mi tui le ante, in le ei in, mahlai ah David tuah ni thum sung umlangkhat haw hi.

⁴⁰ Saklam cawng a, um Isskhar, Zebulun, le Naftali hinnam tianin laak, kalauk, cipuh le khui ten cangho vam, thei, sabitko, sabittui le olif situi pua haw hi. A eih haw tukin khui le tuute keng haw hi. Hi bangin a hunpihnak haw cu a ngam pumpi in lungdamnak a neih haw mi langtiknak hi.