1 KHANGSIALNAK 10 - Ngawm Bible

Kumpi Saul Thi

¹ Filistin le Israel mi cu Gilboa Mual pen dodun haw ten Israel mi tampi thi haw in, a tangmite cu Kumpi Saul le a capate tuah tai mang khawng haw a, Gilboa Mualhumah lum pelpul haw hi.

² Mahnaven Filistin ngalkap ten Saul le a capate cu pha in, a capa Jonathan, Abinadab le Malkhishua cu that haw hi.

³ Saul i umnak elkim pen thalcang cawi ten pha haw in, nasezet liamsuah haw hi.

⁴ A hiamnam cawitu tangval pa i lakah, “Na ngalnam dok inna, keimah hi thatin, mahma tale Pathian thei ngawl Filistin ten hualnek kha haw tuk,” ti hi. Mahnaven tangvalpa cu in ngam ma hi. Mah hangin Saul in, a ngalnam cu dokin, a namlek hiam lamin sun humdun hi.

⁵ Saul a thih lam tangval pa in, amuh ten a ngalnam dok bokin, a namlek hiam lam tuah sundunin thi bok hi.

⁶ Saul le a capa pa thumte cu munkhatah thi haw in, a ngam uknak vang bo bokta hi.

⁷ Jezreel munlawn a um Israel miten a ngalkapte tai khawngin, Saul le a capate vang thi haw tih a zak haw ten a khua tek pen tulin, sak le hangah taikeh khawng haw hi. Filistin mite cu hungin, a khua cu luahtum haw hi.

⁸ A dodun haw a zingten a thi mitei vante la tukin Filistin mite cu hawh haw a, Saul le a capa tei luang cu Gilboa Mualhumah lum teptupin mu haw hi.

⁹ Saul i lu cu tanin le a ngalthuamte duhsak haw a, a lu le hiamnamte pua in, a pathian dang le a mihing tei lakah thuthangpha hilh tukin mi hah haw hi.

¹⁰ Saul i hiamnamte cu a biakinn ah koih haw in, a lu cu a Dagon biakinn ah khaih haw hi.

¹¹ Filistin miten Saul hum a, mahti bangin, a khaih haw cu Gilead ngam Jabesh miten a zak haw ten,

¹² ngalphabelte tul haw in, Saul le a capa tei luang cu Jabesh khua ah pua haw hi. Mahlai Sasua kungpi nuai ah a nguh haw cu vui in, ni salih sung ancang haw hi.

¹³ Saul cu Topa i humah a sual hangin thihnak tawk hi; Topa i thupiakmi zui ma; Topa in, thusiampih leng napi in,

¹⁴ mipolte leng saw in, mithi hawvangte sam hi. Mah hangin Topa in thatin, a uknak cu Jesse capa David lakah pia hi.