1 JOHAN 1 - Ngawm Bible

Nunnak Thu

¹ A pat pepan a um sami nunnak Thu cu nangmu lakah lai tuah ngan ing. Mah thu cu za ung a, mit tuah ka muh cilcel uhmi le khut tuah ka zen uhmi loli hi.

² Hi nunnak cu muhtheihin, a cansuak ten oh ten mu hung hi. Mah hangin mah thu cu nangmuh tei lakah son ung a, Pa tuah a ummi kumkhua nunnak, keimu tei lakah a theihtikmi Thu khi nangmu lakah hilh ung hi.

³ Pa le a Capa Jesuh Khrih tuah pawlkomnak a neih uhmi sungah na tel theihnak tuk uhin ka muh uhmi le ka zak uhmi cu nangmuh tei lakah phuang ung hi.

⁴ Ka lungdamnak uh kim hen tin, hilai hi nangmuh tei lakah ngan ung hi.

Pathian Cu Vaaknak Hi

⁵ A Capa i lak pen a theih uhmi thu le nangmu lakah ka phuan uhmi cu hi thu hihi; Pathian cu vaknak hi, a sungah thimnak umma hi.

⁶ Mah hangin amah tuah pawlkomnak nei hung ti thah lengin, thimnak sungah a um uh tale, a ot dan uh hihen, a deh dan uh hihen zolthu son hung hi.

⁷ Mahnaven amah cu vaknak sungah a um bangin, eimuhte vang vaknak sungah a um uh tale pa khat le pa khat pawlkomnak nei in, a Capa Jesuh Khrih i thisanin, a sualnak uh hempoh thiangtik zo hi.

⁸ Sualnak nei ma ung a ti uh tale eimuh le eimuh a zoldun copin a sung uhah thutak umma hi.

⁹ Mahnaven Pathian nelah a sualnak uh a phuang uh tale amah cu muantak le a dikmi a hih bangin a khelhnak uhte zah tuk a, a sualnak uh hempoh thiangtik tuk hi.

¹⁰ Mahnaven sualnak bawl ma ung a ti uh tale Pathian cu zolthusonin cangtik hung a, a thu cu ohtei sungah umma hi.