Etingi Nsidi Nkeri Luk Asenging 1 - Ndoe

Luk asenging ake Tiofilus abangang Jisɔs

¹ Minen Tiofilus, Bane jugijugi alem boted obubɔ arɔ bɔ aseng bachɔd ma nggom bi bemarɔ tɛb wa erɔng eyida.

² Bɔ ba to wa botog bu enud ale bɔtese yi bagban ba balem ma Ɔsɔwɔ ale bane ba ajoging ake sɔ.

³ Yi yifa wa nted ama, yi me minfɔni nkun nten nkɔi gɔgigɔgi feb nggom bifa to wa botog bu enud, me erɔng nseng bokobi abun ntimitimi nke we, minen Tiofilus,

⁴ eru afa we ɔmai ɔrɔ nggom bi arannen akɔi we bele ekonekon.

Nsidi abangang ogwe wu Jɔn mi pogag mmai

⁵ Wa nten yu Erɔd minen wu Judia ekwe minsingag besingi bi Ɔsɔwɔ wu mpi oyu akamag arɔ Sekaria. We ale efugi yi Abija, basingag ba besingi bi Ɔsɔwɔ. Minkai owu Elisabed, we erɔng arun enudi nju yi Erɔn.

⁶ Bɔ bafaibafai bale kɔng wa boso bu Ɔsɔwɔ, bɔ anungag beben feb bi Minfɔni aken.

⁷ Ka bɔ afɔning mmɔn kpe wud wa ntagi Elisabed ale mingom, obodi afa erɔng, bɔ bafaibafai bakoi gbɔg.

⁸ Epo yid yi efugi yi basingag ba besingi yi Sekaria ale erom ka ali lemag erom eyi ala minsingag besingi wa boso bu Ɔsɔwɔ,

⁹ asanging we wa erɔ yi arobing nkeri egweni eyibɔ yi basingag ba besingi ele, achag wa nju yu Minfɔni aka yegi etɛbag mmu.

¹⁰ Yi nten asin yu ayegag etɛbag mmu wa nju Ɔsɔwɔ, bane ba afuging ale efi asoag nsɔm.

¹¹ Nyining minkamag befong bi Minfɔni atɛb boso obu, alami ebad yi obolom wu nchori yu esingi yi ayegag etɛbag mmu.

¹² Yi Sekaria arɔn we, anig botig bɔkɔ we.

¹³ Ka minkamag befong bi Ɔsɔwɔ atɔ we arɔ, “Kan re botig, Sekaria, awog nsɔm ɔya. Minkai ɔwa Elisabed ting agwe mmɔni minine ake we, we ting ɔlang we mpi ɔrɔ Jɔn.

¹⁴ We ting akɛmi bochoba bu nted obuna, ka jugijugi ting afɔn bochoba bu nted wantag yu ogwe owu.

¹⁵ Da we ting akɛmi etɛmi mine wa boso bu Minfɔni. Ka we tabara ahɔ yɔ barog kpe barog ma abumobum, erɔng Nyɔganyɔ yu Ɔsɔwɔ ting akɛmi yi we ka agwe we.

¹⁶ We ting atu bane ba Isrel jugijugi atisɛm ɔmɔ Minfɔni Ɔsɔwɔ owubɔ.

¹⁷ Ka we ting arannen ka Minfɔni, wa nyɔganyɔ yi ɔsa wu Elaija, akpedi boted bu bansi yi banyen akɔni yi mbɔn abibɔ ka yi bakebag ba befong ajɔdi bɔ banyedi okoeken wu bamag ba nggom ba ale kɔng yi Ɔsɔwɔ, enugi eruafa we aloni bane ba Ɔsɔwɔ anungi Minfɔni.”

¹⁸ Sekaria abeb minkamag befong bi Ɔsɔwɔ arɔ, “Elemag lan me nkam ndɔ yi ɔchɔding ala ele ekonekon? Me nle ekokoi mine, ka minkai ama erɔng nya eyi erab.”

¹⁹ Minkamag befong bi Ɔsɔwɔ abɔri we arɔ, “Me nle Gabrel. Me nlag ekpenyid yi Ɔsɔwɔ, ka we afonging me arɔ nchɔd yi we erɔng nsidi we etingi nsidi yufa.

²⁰ Ka fafa we ɔnɔngɔ ɔchɔ emama ɔkɔngɔman ɔchɔd minchɔd tata epo yi nyum yifa etɛbag, wantagi we ɔkaming yi balem angama ma atɛbag ekonekon wa nten yu akɔning.”

²¹ Nten ayua yud, bane ale efi aworag Sekaria erɔng akerag wa ekɛkɛmi yi we amarɔ kɛmi wa nju Ɔsɔwɔ eken erab.

²² Yi we ahɔ tɛb aba efi, we ahɔman achɔd yi bɔ. Bɔ aba mai arɔ we arɔ nnɔd yu mbed wa nju Ɔsɔwɔ, wantagi we ali chɔdag babɔ yi bɔ we chang ahɔman ɔchɔd yi minyɔ.

²³ Yi nten yu erom eyi emaning we abugag wa nju oyu.

²⁴ Yi bifa behɔ king, minkai owu Elisabed aba bob bɔla awobi lɔ wa nju tata asi bafeng arɔn.

²⁵ We arɔ, “Minfɔni alem yifa ake me. Wa ndu yifa we atɔngi me bɔnɔ obu atisɛm alɔb me enyi wa boso bu bane.”

Barebi abangang egweag yi Jisɔs

²⁶ Yi bɔla bu Elisabed bosin bafeng arabara, Ɔsɔwɔ afong minkamag befong ebi Gabrel achag Nasaret, mpam yu ale eboi yi Galili,

²⁷ ɔmɔ mmɔni minkani wu akan mai minine wu akam arɔ anɔngɔ ke we ebai ɔmɔ minine wu ayenag we arɔ Josef, wu arun enudi nju yi Debid. Mpi yu mmɔni mindig awun akamag arɔ Meri.

²⁸ Minkamag befong bi Ɔsɔwɔ achin ɔmɔ owu aka tɔ we arɔ, “Nkobo, we wu atɔngi we bɔnɔ jugijugi, Minfɔni ale yi we.”

²⁹ Minchɔd wufa ɔrɛbing Meri. Ka we ato ɔkeri nkeri ekan ekob yifa etɛbing.

³⁰ Ka minkamag befong bi Ɔsɔwɔ atɔ we arɔ, “Meri, kan re botig, wantag yu we ote bɔnɔ bu Ɔsɔwɔ.

³¹ We ɔnɔngɔ bob-bɔla ogwe mmɔni minine ka we ɔlangag we mpi ɔrɔ Jisɔs.

³² We akɛmag etɛmi mine ka ting ayen we Mmɔn wu Ɔsɔwɔ wu achiming nlag aking. Minfɔni Ɔsɔwɔ ting ake we bɔlen bu nsi eyi Debid.

³³ We akɛmag minen wu enud nju yi Jekɔb yibanya. Bɔlen obu bɔhɔ fɔn nkuri.”

³⁴ Meri abeb minkamag befong bi Ɔsɔwɔ arɔ, “Elemag lan ekɛmi alafa? Me akan mai minine.”

³⁵ Minkamag befong bi Ɔsɔwɔ abɔri we arɔ, “Nyɔganyɔ yu Ɔsɔwɔ ting aba ɔwa yi ɔsa wu Ɔsɔwɔ wu ɔchiming nlag oking ɔkɛmi yi we. Ka Mmɔn wu we ɔnɔngɔ ogwe ahɔ fɔn bobe ka ayenag we Mmɔn wu Ɔsɔwɔ.

³⁶ Kpe Elisabed wu arun enudi nju eya anɔngɔ fɔn mmɔn wa bokonag obu, ka we wu arɔ ahɔman abob bɔla ale yi bɔla bu bowei bafeng arabara.

³⁷ Da elem chang yi erun Ɔsɔwɔ yi yibanya elɛmag.”

³⁸ Meri abɔri arɔ, “Me nle mingban wu Minfɔni. Nungi elem eya ekɛmi ala yi me nkeri we ɔmarɔ chɔd.” Nyining Minkamag befong bi Ɔsɔwɔ achai we.

Meri alo beyad ɔmɔ Elisabed

³⁹ Wa ndu ayia, Meri aloni beke asubi aloag ebad yi ele mpam yu ale bopup wa Judia,

⁴⁰ we awei nju yu Sekaria ka akob Elisabed.

⁴¹ Yi Elisabed awoging ekob yi Meri, mmɔn wu ale etengi bɔla obu alo belag ka Nyɔganyɔ yu Ɔsɔwɔ awei Elisabed asoi.

⁴² Yi elem esɔ we arɔ, “Erienɔ ele yi we erɔng yi bakani, erienɔ erɔng ele yi mmɔn wu we ɔnɔngɔ ogwe.

⁴³ Ye ka ajegi me la yi nyeni we wu Afɔning me abag ɔmɔma?

⁴⁴ Ebuyid yi me nwoging ekob eya, mmɔn wu ale me bɔla alo belag wa bochobag bu nted.

⁴⁵ Erienɔ yi we wu akaming arɔ yi Minfɔni amarɔ osidi we ting etɛb ala.”

Meri akag Ɔsɔwɔ yi ebɛn

⁴⁶ Ka Meri arɔ: “Mmɛd ma nted ama akag Minfɔni

⁴⁷ ka nyɔganyɔ ama asoi yi bochobag bu nted yi Ɔsɔwɔ Minyanyangi ama,

⁴⁸ wantagi we akeri abangang me ni minsob owu wu ale eboi eboi. To fafa chog baku feb ayenag me minkani wu erienɔ,

⁴⁹ wantagi we wu agan babɔ alem betɛm bi nggom ake me. Mpi oyu akɔning yi ejeg yi bakag.

⁵⁰ Nsɔn oyu asai asi bane ba areag we, to oku wufa osi oku wuntad.

⁵¹ We alem betɛm bi nggom yi ɔsa owu; we achad bɔ ba atamag beke erɔng ba akerag betɛm bi nggom abangang lɔ.

⁵² We abi balen eboi bɔlen obubɔ ka we atam bɔ esɔ ba apoding lɔ.

⁵³ We ake bɔ ba ale bɔsɔng betingi bi nggom, ka befang bi bane we akeb bɔ babɔ mmbɛd.

⁵⁴ We anyangi mingban owu Isrel, atedag afɔn nsɔn

⁵⁵ ake Ebraham yi enudi nju eyi yibanya, kpe nkeri we achɔn enyɔ ake bansi abida.”

⁵⁶ Meri akɛming yi Elisabed ala bafeng ara ka we atisɛm abugag nju oyu.

Ogwe wu Jɔn mipogag mmai

⁵⁷ Yi nten ahɔsi yu Elisabed agweag we aba gwe mmɔni minine.

⁵⁸ Bolom ba bale ekpen yid yi bane ba enudi nju oyu ahɔwog arɔ Minfɔni atɔngi we bɔnɔ gbɔg, ka bɔ atɔp we achob nted.

⁵⁹ Wa ndu enyebenye, bɔ aba aba sob mmɔn edɔga, ka erɔng anɔngɔ lang we mpi yu nsi eyi Sekaria,

⁶⁰ ka nyeni eyi akpei elem arɔ, “Chang! Ayen we Jɔn.”

⁶¹ Bɔ atɔ we arɔ, “Mine kpe wud chang erɔng enudi nju eya wu ali kamag mpi ayua.”

⁶² Nyining bɔ achɔd babɔ yi nsi mmɔn, amai mpi yu we aken arɔ alang mmɔn.

⁶³ We abeb arɔ ake we ekpara yi botiti, ka wa ɔmanag beke wu bane we aseng afa arɔ, “Mpi oyu ale Jɔn.”

⁶⁴ Ebuyid minyɔ owu ɔrɛbi elebi ewadi ka we ahoto minchɔd ɔchɔd akerag Ɔsɔwɔ bakag.

⁶⁵ Bane ba ale ekpen yid yi bɔ botig bɔ kɔ bɔ, yi feb bekpen wa mpup yu mpami Judia bane achɔdag abangang feb nggom bifa bi betɛbing

⁶⁶ Kpeicha mine wu awoging yi etɛbing beke bemaning we, abebag, “Mmɔn wufa abag ɔkɛmi ye?” Waoye ɔsa wu Minfɔni ole yi we.

Ebɛn yi Sekaria

⁶⁷ Nyɔganyɔ yu Ɔsɔwɔ asoi Sekaria ka we asidi eyammɛd yi Ɔsɔwɔ arɔ:

⁶⁸ “Bakag akɛmi yi Minfɔni, Ɔsɔwɔ wu Isrel, wantagi we aba ɔmɔ bane abi aba anyangi bɔ.

⁶⁹ We afong etɛmi Minyanyangi ake sɔ wu arun enudi nju yi mingban owu Debid,

⁷⁰ nkeri we achɔding wa balem ma barɔag ba eyammɛd abi ba ale kɔng eken erab,

⁷¹ arɔ we ting atudi sɔ wa babɔ ma bane ba ojing abida yi feb ba ajingag sɔ.

⁷² Atɔn arɔ we ting are bansi abida ba nyanya nsɔn yi etedang enyɔ eyi yi ele kɔng,

⁷³ ɔnwɔngɔ wu we anwɔnging yi nsi eyida Ebraham:

⁷⁴ atudi sɔ babɔ ma bane ba ojing abida, elem sɔ etug we ekan fɔn botig

⁷⁵ wa ekwen yi kɔng, yi elemang yi ele kɔng wa boso bu Ɔsɔwɔ feb ndu eyida yi ele ekwen.

⁷⁶ Ka we, mmɔn ama, ting ayen we arɔ minrɔag eyammɛd yi Ɔsɔwɔ wu ɔchiming nlag oking, wantag yu we ting ɔranen ka Minfɔni ɔka loni nnen onungi we,

⁷⁷ alem bane abi amai enyangang yi eruag wa eloang acha bɔ wa bobe obubɔ,

⁷⁸ wantagi Ɔsɔwɔ owuda ɔkwei nsɔn we ting ake sɔ minyanyangi, wu abag owuda ala etɛbang yi nsoi yu epo yu arun esɔ

⁷⁹ abad bɔ ba ali kwenag wa ejiri yi wa babɔ ma eko, Ɔsɔwɔ ting atɔngi sɔ nnen yu ekunakuna.”

⁸⁰ Ka mmɔn akoi akori wa nyɔganyɔ, we akɛming wa ekpen yi bane chang akɛmag tata we atɛb jai wa Isrel.