Yekile 8 - BAEBOLO ANZƐƐ BULUKU NWUANZANWUANZA

Bɛwayele ɛyɛlɛ ne mɔɔ tɔ zo nsuu la

¹ Mɔɔ Boaneralɛ ne wayele ɛyɛlɛ ne mɔɔ tɔ zolɛ nsuu mɔɔ bɛvale bɛzɔle nwoma ne anloa la, anwuma lɔ amuala yɛle diinyi kɛyɛ dɔnehwele foa ko.

² Akee menwunle Nyamenle soanvolɛma nsuu ne mɔɔ gyigyi Nyamenle anyunlu ɛkɛ ne la, na bɛvale aweɛne ndendenle nsuu bɛmanle bɛ.

³ Nyamenle soanvolɛ ko noko mɔɔ lɛ ezukoa nvutuke dwora mɔɔ bɛyela ɛyɛlɛ evuanlɛ nu la ragyinlanle azukponle ne anwo. Bɛmanle ye ɛyɛlɛ dɔɔnwo kɛ ɔva ɔboka Nyamenle menli ne nzɛlɛlɛ ne anwo na ɔkpu ye wɔ ezukoa nvutuke azukponle ne mɔɔ gyi belemgbunli ebia kpole ne anyunlu la azo.

⁴ Ɛyɛlɛ ne esike ne nee Nyamenle menli ne nzɛlɛlɛ ne vi Nyamenle soanvolɛ ne asa nu hɔle Nyamenle anyunlu wɔ anwuma.

⁵ Nyamenle soanvolɛ ne akee vale azu mokyea ne anu samɛnlankɛ ne bie guale ɛyɛlɛ dwora ne anu na ɔvuandinle dwora ne ɔdole azɛlɛ ye azo. Na maanle nu hulule mgbole bie, ɛsɛlɛmanye kpakyele, na azɛlɛ kpusule.

Aweɛne ndendenle ne mɔ

⁶ Akee Nyamenle soanvolɛma nsuu ne boɔboale bɛ nwo kɛ bɛbɔ bɛ aweɛne ndendenle nsuu ne mɔ anu.

⁷ Nyamenle soanvolɛ ne mɔɔ lumua la bɔle ye aweɛne tendenle ne anu. Na bɛwolale ezuawolɛ nee senle, mɔɔ bɛva mogya bɛfonla ye la bɛguale azɛlɛ ye azo. Azɛlɛ ye anu hyɛle nsa, na ko yelale bɔkɔɔ manle mbaka nee ndile mɔɔ wɔ zolɛ la dɔle nzonle.

^8-9 Nyamenle soanvolɛ ne mɔɔ tɔ zolɛ nwiɔ la bɔle ye aweɛne tendenle ne anu. Na bɛvuandinle debie bie mɔɔ le kɛ boka kpole bie, mɔɔ senle la nu la bɛdole nyevile ne anu. Nyevile ne anu hyɛle nsa, na ko hakyile mogya manle nuhua ninyɛne wule, na nlɛne mɔɔ gua ɔ nye la zɛkyele bɔkɔɔ.

¹⁰ Nyamenle soanvolɛ ne mɔɔ tɔ zolɛ nsa la bɔle ye aweɛne tendenle ne anu. Na ɛwɔlɔra kpole bie, mɔɔ ɛlɛsɔ kɛ tɛkɛ la dule vi anwomanyunlu radɔle azudenle, nzubula nee tandane nu.

¹¹ Ɛwɔlɔra ne duma a le “Subo.” Na azule, nzubula nee tandane mɔɔ wɔ ewiade la anu hyɛle nsa, na ko yɛle kɛ subo, na ye ɛnwonle manle menli dɔɔnwo mɔɔ nlonle bie la wule.

¹² Akee Nyamenle soanvolɛ ne mɔɔ tɔ zolɛ nna la bɔle ye aweɛne tendenle ne. Sɛnzɛne ne anu hyɛle nsa, bɛbɔle ko, na ye ɛdalɛ ne nlunle; siane ne anu hyɛle nsa, yɛɛ nwɔlɔra ne mɔ anu hyɛle nsa na bɛ nuhua ngoko nlunle. Yemɔti alehyenlɛ nu hyɛle nsa mɔɔ sɛnzɛne ɛnvinde ko anu a, yɛɛ aledwolɛ noko anu hyɛle nsa mɔɔ siane nee nwɔlɔra ɛnda ko anu a.

¹³ Na memanle me ti zo la, mendele kɔleɛ kpole bie mɔɔ ɛdu faa la ane wɔ nyamenle ne ako abo nehane kɛ ɔlɛtea nu yeaha kɛ, “Bɛ gyakɔ! Bɛ gyakɔ! Bɛ gyakɔ! Saa Nyamenle soanvolɛma nsa ne mɔɔ ɛha la bɔ bɛ aweɛne ndendenle ne mɔ anu a, bɛdabɛ mɔɔ bɛde azɛlɛ ye azo la, bɛ gyakɔ!”