Yekile 2 - BAEBOLO ANZƐƐ BULUKU NWUANZANWUANZA

Ɛfɛsɛse nrɛlaleɛ ɛdeɛ ne

¹ “Kɛlɛ ɛhye kɔmaa Ɛfɛsɛse asɔne ne Nyamenle soanvolɛ ne. “Nrɛlaleɛ ɛhye vi mɔɔ lɛ nwɔlɔra nsuu ne mɔ ɔ sa fema ne anu na ɔluolua ezukoa nvutuke kɛnlaneɛ mbaka nsuu ne mɔ avinli la ɛkɛ ne.

² Menwu wɔ gyima ne mɔ mɔɔ wɔli la; meze wɔ ɛvɛlɛ nee wɔ abotane ne amuala. Meze kɛ ɛmkpondɛ amumuyɛma anyunlu ɛnnea yɛɛ wɔzɔ bɛdabɛ mɔɔ bɛse bɛle ɛzoanvolɛma la wɔnlea na wɔnwu kɛ bɛnle ɛzoanvolɛma, na bɛle alane.

³ Meze kɛ ɛlɛ abotane ɛlɛkomo ɛ nwo zo, ɛlɛsɔ amaneɛ sa wɔ me duma ne ati, yɛɛ ɔtɛyɛle wɔ ɛvɛlɛ.

⁴ Noko akee metia wɔ wɔ ɛhye anwo: ɛnɛ ɛnlɛ me nwo ɛhulolɛ kɛ alumua ne la.

⁵ Ɛdawɔ nea na nwu wɔ aze mɔɔ wɔdɔ la. Nu ɛ nwo na twe ɛ nwo fi wɔ ɛtane ne mɔ mɔɔ wɔyɛ la anwo, na yɛ mɔɔ alumua ne ɛyɛle la. Saa wɔannu ɛ nwo, wɔangyakyi ɛtane ɛyɛlɛ a mebara mearaye wɔ kɛnlaneɛ baka ne meavi ɔ bo zo ne.

⁶ Noko ɛlɛ ɛhye gyi ɛ nzi: ɛngulo mɔɔ Nekɔlɔsoma yɛ la. Medame noko mengulo mɔɔ bɛlɛyɛ la.

⁷ “Sonla ne mɔɔ lɛ ɛnzonlɛ la ɛdie mɔɔ Sunsum ne ka kile asɔnema amuala la. Mɔɔ kɛli konim la mebamaa ye adenle meamaa yeali ngoane baka ne mɔɔ gyi Nyamenle tola ne anu la ma ne bie.

Semɛna nrɛlaleɛ ɛdeɛ ne

⁸ “Kɛlɛ ɛhye kɔmaa Semɛna asɔne ne Nyamenle soanvolɛ ne. “Nrɛlaleɛ ɛhye vi alumua ne nee awieleɛ ne, mɔɔ wule na ɔziale ɔrale ngoane nu bieko la ɛkɛ.

⁹ Meze wɔ amaneɛnwunlɛ kpokpoti. Meze wɔ ɛhyianlɛ, noko ɛlɛ anwonyia! Meze munzule edwɛkɛ mɔɔ bɛdabɛ mɔɔ bɛse bɛle Dwuuma noko bɛnle Dwuuma la ɛlɛkeha atia wɔ la. Menli zɔhane mɔ le Seetan eku nu menli.

¹⁰ Mmasulo debie biala mɔɔ bɛbayɛ wɔ la. Tie, Abɔnsam ne bamaa bɛagua bɛ bie mɔ efiade, bɛazɔ bɛ bɛanlea, na bɛanwu amaneɛ dedee kenle bulu. Noko di nɔhalɛ maa me, bɔbɔ kɔdwu ewule nu, na mebabɔ wɔ ngoane abɔtile.

¹¹ “Sonla ne mɔɔ lɛ ɛnzonlɛ la ɛdie mɔɔ Sunsum ne ka kile asɔnema amuala la. Mɔɔ kɛli konim la, ewule ne mɔɔ tɔ zolɛ nwiɔ la bakpa ɔ ti.

Pɛgamɛm nrɛlaleɛ ɛdeɛ ne

¹² “Kɛlɛ ɛhye kɔmaa Pɛgamɛm asɔne ne Nyamenle soanvolɛ ne. “Nrɛlaleɛ ɛhye vi mɔɔ lɛ dadeɛ anye nwiɔ ne mɔɔ yɛ nla la ɛkɛ.

¹³ Meze kɛ ɛleka mɔɔ ɛde la, ɛkɛ ne a Seetan ebia ne gyi a. Noko ɛlɛ me duma ne anu ɛsesebɛ na ɛdi nɔhalɛ ɛmaa me, yɛɛ wɔ diedi amkpo aze, bɔbɔ wɔ mekɛ mɔɔ bɛhunle me nɔhalɛ dasevolɛ Antɛpase wɔ Seetan ebia ne abo la.

¹⁴ Noko melɛ edwɛkɛ ekyi bie metia wɔ. Ɛlɛ menli bie mɔɔ li Beelam ngilehilelɛ ne anzi a. Beelam hilehilele belemgbunli Beelake manle ɔdole Yizilayɛma agyiba, ɔmanle bɛlile aleɛ mɔɔ bɛva bɛzɔ amonle la na bɛbɔle adwɔmane ɛbɛla.

¹⁵ Eza ɛlɛ menli bie mɔɔ bɛdabɛ noko bɛli Nekɔlɔsoma ngilehilelɛ ne anzi a.

¹⁶ Yemɔti nu ɛ nwo! Saa wɔannu ɛ nwo a ɔnrɛhyɛ biala, mebara ɛ nwo lɔ, na meava dadeɛ ne mɔɔ zia me nloa anu la me nee menli zɔhane mɔ araho.

¹⁷ “Sonla ne mɔɔ lɛ ɛnzonlɛ la ɛdie mɔɔ Sunsum ne ka kile asɔnema amuala la. “Mɔɔ kɛli konim la mebamaa ye mana ne mɔɔ vea la bie. Mebamaa ko biala noko bolɛ fufule mɔɔ bɛhɛlɛ duma fofolɛ zolɛ la. Awie biala ɛnrɛhola ɛnrɛnwu duma ne kyesɛ ahenle ne mɔɔ bɛva bɛmaa ye la angomekye.

Tayataela nrɛlaleɛ ɛdeɛ ne

¹⁸ “Kɛlɛ ɛhye kɔmaa Tayataela asɔne ne Nyamenle soanvolɛ ne. “Nrɛlaleɛ ɛhye vi Nyamenle Ara ne mɔɔ lɛ ɛnyelɛ mɔɔ sɔ kɛ senle, na ɔ gyakɛ anwo ta kɛ ayera mɔɔ bɛhwi nwolɛ la ɛkɛ ne.

¹⁹ Meze wɔ gyima. Meze wɔ ɛhulolɛ mɔɔ ɛlɛ ye, wɔ nɔhalɛ mɔɔ ɛdi, wɔ ɛzonlenlɛ mɔɔ ɛsonle, nee wɔ abotane mɔɔ ɛlɛ la amuala. Meze kɛ kɛkala ɛlɛbɔ mɔdenle wɔadɛla alumua ne.

²⁰ Noko melɛ edwɛkɛ ɛhye metia wɔ: ɛdie raalɛ Gyɛzɛbɛle mɔɔ ɛyɛ ɔ nwo Nyamenle kpɔmanvolɛ la ɛto nu. Yeva ye ngilehilelɛ ne yezi me menli ne mɔ anye yemaa bɛlɛbɔ adwɔmane ɛbɛla na bɛdi aleɛ mɔɔ bɛva bɛzɔ amonle la.

²¹ Memanle ye mekɛ kɛ ɔva ɔnlu ɔ nwo, noko ɔngulo kɛ ɔkɛgyakyi ye adwɔmane ɛbɛla ne.

²² Ɛhye ati mebamaa anwonyane abɔ ye na meamaa bɛdabɛ mɔɔ bɛ nee ye donle awuvolɛvalɛ mɛla ne la anwu amaneɛ, kyesɛ bɛnu bɛ nwo wɔ amumuyɛ ne mɔɔ bɛ nee ye yɛle la anwo.

²³ Eza menli mɔɔ li ɔ nzi la, mebahu bɛ muala na asɔnema ne amuala anwu kɛ medame a menwu sonla biala ati anu nee ye ahonle nu a. Me nee bɛ nuhua ko biala bali wɔ mɔɔ yeyɛ la anwo.

²⁴ “Bɛdabɛ noko mɔɔ bɛha, mɔɔ bɛwɔ Tayataela, mɔɔ bɛanli ngilehilelɛ ɛtane zɛhae anzi, bɛanzukoa mɔɔ ɔyɛ a bie mɔ fɛlɛ ye ‘Seetan ngonyia’ la, bɛmɛ yɛɛ meka meahile bɛ kɛ, menrɛva ɛzonle kpole biala menrɛzoa bɛ.

²⁵ Mɔɔ meka meahile bɛ ala la a le kɛ bɛzɔ mɔɔ bɛlɛ ye la anu kpalɛ kɔkpula mekɛ mɔɔ menwɔra la.

^26-28 Mɔɔ kɛli konim, na ɔkɛyɛ mɔɔ mekpondɛ la nɔhalɛ nu kɛhɔ awieleɛ la, mebava tumi ne mɔɔ Egya vale manle me la meamaa ye. Mebamaa yeali maanle maanle dɔɔnwo anwo zo konim, yeava tumi yeazie bɛ, na yeabubu bɛ kɛ abua. Eza mebava nwonlomɔ ɛwɔlɔra ne meamaa ye.

²⁹ “Sonla ne mɔɔ lɛ ɛnzonlɛ la ɛdie mɔɔ Sunsum ne ka kile asɔnema amuala la.