Yekile 16 - BAEBOLO ANZƐƐ BULUKU NWUANZANWUANZA

Nyamenle ɛya dwora ne mɔ

¹ Akee mendele ɛnelɛ kpole bie wɔ Ɛzonlenlɛ Sua ne anu kɛ ɔlɛka yeahile Nyamenle soanvolɛma nsuu ne kɛ, “Bɛhɔ, bɛhɔwola Nyamenle ɛya ne mɔɔ wɔ dwora ne mɔ anu la bɛgua azɛlɛ ne azo!”

² Nyamenle soanvolɛ ne mɔɔ lumua la hɔle na ɔhɔwolale ye dwora ɛdeɛ ne anu ɛya ne ɔguale azɛlɛ ne azo. Na nganlɛ mgbole mɔɔ fofo na ɔbɔ la vindele bɛdabɛ mɔɔ bɛlɛ nane ne sɛkɛlɛneɛ ne wɔ bɛ nwo nee bɛdabɛ mɔɔ bɛzonlenle ye ananze ne la anwo.

³ Nyamenle soanvolɛ ne mɔɔ tɔ zolɛ nwiɔ la wolale ye ɛdeɛ ne guale nyevile nu. Nyevile ne hakyile kɛ sonla mɔɔ ɛwu la mogya, na debie biala mɔɔ lɛ ngoane mɔɔ wɔ nyevile nu la wule.

⁴ Nyamenle soanvolɛ ne mɔɔ tɔ zolɛ nsa la wolale ye dwora ɛdeɛ ne anu ɛya ne guale azule nee nzubula nu, na bɛhakyile mogya.

⁵ Mendele kɛ Nyamenle soanvolɛ ne mɔɔ nea nzule zo la se, “O Nwuanzanwuanzanli mɔɔ ɛnee ɛwɔ ɛkɛ na ɛwɔ ɛkɛ dahuu a, wɔli pɛlepɛle bɔkɔɔ wɔ wɔ ndɛnebualɛ nu.

⁶ Bɛhanle Nyamenle menli ne nee kpɔmanvolɛma mogya bɛguale, na ɛdawɔ noko wɔmaa bɛ mogya kɛ bɛnlo. Mɔɔ bɛnyia ye la fɛta bɛ!”

⁷ Na mendele ɛnelɛ bie vi azukponle ne anwo ɛkɛ, ɔse, “Awulae Nyamenle Bedevinli, wɔ ndɛnebualɛ le nɔhalɛ, ɔle fɔɔnwo amgba!”

⁸ Nyamenle soanvolɛ ne mɔɔ tɔ zolɛ nna la noko wolale ye ɛdeɛ ne guale sɛnzɛne ne azo manle ɔnyianle adenle ɔvale ye wuluwulu ne ɔyelɛyelale menli.

⁹ Menli nwo dwele bɛ kpalɛ, na bɛdendɛle ɛtane bɛtiale Nyamenle, mɔɔ lɛ tumi wɔ amaneɛnwunlɛ ngakyile ɛhye mɔ azo la duma ne. Na bɛangyakyi ɛtane ɛyɛlɛ, bɛanye Nyamenle ayɛlɛ kɛ ɔle bedevinli.

¹⁰ Nyamenle soanvolɛ ne mɔɔ tɔ zolɛ nnu la wolale ye dwora ne anu ɛya ne guale nane ne belemgbunli ebia ne azo. Awozinli rahedale nane ne belemgbunlililɛ zo, na menli vale abodelɛ kposale bɛ tafinlima.

¹¹ Bɛbɔle anwuma Nyamenle ne sasa wɔ bɛ nganlɛ ne mɔ nee bɛ abodelɛ ne ati, noko bɛannu bɛ nwo bɛangyakyi ninyɛndane ɛyɛlɛ.

¹² Nyamenle soanvolɛ ne mɔɔ tɔ zolɛ nsia la ɔdaye ɔwolale mɔɔ wɔ ye dwora ɛdeɛ ne anu la ɔguale azukpole “Yufileti” anu. Ɛkɛ ne ala azule ne sesanle, ɔwele resee, amaa arelemgbunli mɔɔ vi aduduleɛ la anyia adenle araze.

¹³ Na menwunle sunsum nsa bie mɔɔ anwo ɛnde na bɛle kɛ ahɛlɛne la kɛ bɛvi nane anwo ɛzulolɛ ne mɔɔ le kɛ ɛlɛnrɛne la anloa anu, nane ko ne noko anloa anu, yɛɛ kpɔmanvolɛ alane ne anloa anu bɛlɛfinde bɛara.

¹⁴ Bɛle sunsum ɛtane mɔɔ kola yɛ nwanwane ninyɛne a. Na bɛluolua nu bɛkpɔsa arelemgbunli mɔɔ wɔ ewiade la amuala anwo zo na bɛboɔboa bɛ nloa kɛ bɛbaho Nyamenle Bedevinli ne Kenle kpole ne anu.

¹⁵ “Bɛdie! Mebara bɛ nwo zo kɛ awule la! Na nyilalɛ ɛha sonla ne mɔɔ ɛnee ɔ nye gyi zolɛ na ɔnea ye ninyɛne boɛ la, amaa yeanlɛ ɔ nwo zɔ wɔ menli nu na ɔ nyunlu angua aze!”

¹⁶ Na sunsum nsa ɛhye mɔ mɔɔ anwo ɛnde la boɔboale arelemgbunli ne mɔ anloa wɔ ɛleka bie mɔɔ bɛfɛlɛ ye Hibulu nu “Amagɛdɔn” la.

¹⁷ Akee Nyamenle soanvolɛ ne mɔɔ tɔ zolɛ nsuu la wolale ye ɛdeɛ ne guale anwoma ne anu. Na ɛnelɛ kpole bie vi belemgbunli ebia kpole ne mɔɔ gyi Ɛzonlenlɛ Sua ne anu la anwo zele kɛ, “Bɛyɛ bɛwie!”

¹⁸ Na ɛsɛlɛmanye kpakyekpakyele, maanle nu hulule, na azɛlɛ kpusule kpole bie. Sumunli kɛ bɛbɔle sonla la, azɛlɛ ɛtɛkpusule kpole zɛhae ɛlɛ; ɛhye le azɛlɛ ɛkpusulɛ mɔɔ bo ɔ muala azo a.

¹⁹ Suakpole ne anu hyɛle nsa, yɛɛ maanle maanle azuamgbole ne mɔ kɔsɔɔti bɔle tɔɔ. Nyamenle hakyele mɔɔ suakpole Babelɔn ɛyɛ la, na ɔkpokpole ye ɛya ne kɔsɔɔti ɔguale ɔ ti zo.

²⁰ Mbɔra muala minlinle, na awoka kɔsɔɔti hanle aze fɛɛnye, bɛ bo zo minlinle.

²¹ Ezuawolɛ mgbole mɔɔ ko to tone nu tɔno ɛya la dɔle bilididi guale menli nwo zo. Yemɔti menli bɔle Nyamenle sasa, ɔboalekɛ nyane ɛhye bole zolɛ.