Wulo 7 - BAEBOLO ANZƐƐ BULUKU NWUANZANWUANZA

Ndonwo

¹ Me mediema, melɛtendɛ meahile bɛ kɛ bɛle menli mɔɔ ze mɛla deɛ holɛ a. Se bɛze kɛ mɛla kyekye sonla wɔ mekɛ mɔɔ ɔde aze la?

² Bɛnlea kɛ, raalɛ mɔɔ wɔ agyalɛ la, mɛla kyekye ye beta ɔ hu anwo wɔ mekɛ mɔɔ ɔ hu de ngoane nu la; na saa ɔ hu wu a, mɛla ɛnkyekye ye bieko.

³ Mekɛ mɔɔ ɔ hu de aze la saa ɔkɔ nrenya gyɛne nwo a, ɛnee yedo awuvolɛvalɛ mɛla ne; noko saa ɔ hu wu a, zɔhane mɛla ne ɛnkyekye ye bieko, yemɔti saa ɔkɔ agyalɛ fofolɛ a ɔndo awuvolɛvalɛ mɛla ne.

⁴ Mediema, kɛ bɛ edwɛkɛ ne de la ɛne. Kɛmɔ ɔlua Kelaese anwo zo yɛwu la, Mosisi mɛla ne ɛnlɛ yɛ nwo zo tumi bieko, na yɛle Kelaese mɔɔ bɛdwazo ye bɛvi ewule nu la ɛdeɛ, amaa yɛ nwo ara nvasoɛ amaa Nyamenle.

⁵ Ɔluakɛ mɔɔ ɛnee yɛde yɛmaa yɛ nwo la, yɛ atiakunluwɔzo ɛtane ne mɔ manle mɛla ne dwazole yɛle gyima wɔ yɛ nu, na ɔlua zolɛ yɛ nwo rale nvasoɛ manle ewule.

⁶ Na kɛkala mɔɔ yɛnle mɛla ne tumi bo, na yɛwu yɛvi mɔɔ bɔle yɛ kpanwu la asa anu la, yɛnzonle kɛmɔ ɛnee yɛwɔ mɛla ne abo la. Yɛsonle wɔ adenle fofolɛ ne mɔɔ Sunsum Nwuanzanwuanza ne kile la anu.

Mɛla nee ɛtane

⁷ Ɛnee kɛ yɛha yɛze ɛ? Kɛ mɛla ne le ɛtane ɔ? Kyɛkyɛ, ɔnle zɔhane. Mɛla ne a manle menwunle kɛ ɛtane si de la a. Saa mɛla ne anga kɛ “Mmayɛ anyebolo” a, anrɛɛ menze kɛ bɛsi bɛyɛ anyebolo la.

⁸ Ɛtane nyianle adenle wɔ mɛla ne anu na ɔvale anyebolo ngakyile muala ɔluale ndenle ngakyile nu ɔwulale me nu. Ɛtane mumua ne, saa ɛye mɛla ne ɛsie ahane a, ɔle debie wulera.

⁹ Mekɛ bie mɔɔ ɛnee menze mɛla deɛ holɛ la ɛnee melɛ ngoane, na mɔɔ mɛla rale la, ɛtane dwazole gyinlanle,

¹⁰ na menwule. Na mɛla ko ne ala mɔɔ anrɛɛ ɔwɔ kɛ bɛlɛ me ngoane la, rayɛle ewule manle me.

¹¹ Ɛtane nyianle adenle vale mɛla bɛlɛbɛlale me, na ɔluale zolɛ ɔhunle me.

¹² Zɔhane ati, Mosisi mɛla mumua ne le nwuanzanwuanza, yɛɛ ngyehyɛlɛ ne le nwuanzanwuanza, ɔle kpalɛ, ɔtenrɛ.

¹³ Na ɛnee ɛhye kile kɛ debie kpalɛ a hunle me la ɔ? Kyɛkyɛ! Ɛtane a hunle me a. Ɔvale kpalɛ ɔlile ɔ nyunlu ɔhunle me, amaa ye su dɛba ne avinde kɛ ɔle ɛtane. Yemɔti, bɛlua mɛla ne azo bɛhile kɛ ɛtane le kakadane kpalɛ kpalɛ.

Sonla nu mgbeleralilɛ

¹⁴ Yɛze kɛ mɛla ne le sunsum nu debie; mame, mele nwonane nu debie mɔɔ bɛdɔne me kɛ kanranli bɛmaa ɛtane a.

¹⁵ Debie mɔɔ meyɛ la mende ɔ bo, ɔluakɛ mɔɔ mekpondɛ kɛ meyɛ la, mengola menyɛ, na meyɛ deɛ ko ne ala mɔɔ mengulo kɛ meyɛ la.

¹⁶ Na saa meyɛ mɔɔ ɔnle kɛ meyɛ la a, ɛnee ɔkile kɛ medie meto nu kɛ mɛla ne le kpalɛ.

¹⁷ Yemɔti tɛ me nye fuu yɛɛ meyɛ a, na ɛtane ne mɔɔ de me nu la a maa meyɛ a.

¹⁸ Meze kɛ kpalɛ biala ɛnle me sonlabaka ye anu. Ɔluakɛ me kunlu a anrɛɛ meyɛ kpalɛ, noko mengola menyɛ.

¹⁹ Mengola menyɛ kpalɛ ne mɔɔ mekulo kɛ meyɛ la, na ɛtane ne mɔɔ mengulo kɛ meyɛ la yɛɛ meyɛ a.

²⁰ Na saa meyɛ mɔɔ mengulo kɛ meyɛ la a, ɛnee ɔkile kɛ tɛ me nye fuu ɔ, na ɛtane ne mɔɔ de me nu la ɔ.

²¹ Yemɔti ɛnee menwu kɛ mɛla ɛhye ɛlɛyɛ gyima wɔ me nu. Mɔɔ mekulo kɛ meyɛ kpalɛ la, ɛnee ɛtane ala a gyi me nye zo a.

²² Wɔ me nuhua a ɛnee me nye die Nyamenle mɛla ne anwo kpalɛ.

²³ Na menwu mɛla fofolɛ bie wɔ me sonlabaka ye nvɛyeba ne mɔ amuala anu. Mɛla ɛhye ko tia mɔɔ me adwenle kulo kɛ ɔyɛ la, na ɔmaa meyɛ kanranli memaa ɛtane mɛla ne mɔɔ ɛlɛdi gyima wɔ me sonlabaka ne anu la.

²⁴ Me nwo yɛ anwunvɔne kpole! Na nwane a kɛlie me kɛvi nwonane ɛhye asa nu, mɔɔ ɔ nee me ɛlɛkɔ ewule nu a?

²⁵ Melua yɛ Awulae Gyisɛse Kelaese anwo zo meyɛ Nyamenle mo. Ɛhye yɛɛ megyi nwo a; mefa me adwenle muala medi Nyamenle mɛla ne azo mesonle ye, na me sonlabaka ye anu a, ɛnee meli ɛtane mɛla nzi.