Wulo 5 - BAEBOLO ANZƐƐ BULUKU NWUANZANWUANZA

Nyamenle anye ɛzɔlɛ

¹ Kɛmɔ ɔlua diedi zo yɛzɔ Nyamenle anye la, yɛlua Awulae Gyisɛse Kelaese anwo zo yɛnyia yɛ ti wɔ Nyamenle ɛkɛ.

² Gyisɛse lua yɛ diedi zo ɛva yɛ ɛra Nyamenle ɛlolɛ ne mɔɔ ɛnɛ yɛde nu la abo. Yemɔti yɛdi fɛlɛko anyelazo nu kɛ yɛbanyia Nyamenle anyunlunyia ne.

³ Bɔbɔ wɔ amaneɛnwunlɛ nu yɛbali fɛlɛko, ɔboalekɛ yɛze kɛ nyanelilɛ maa sonla nyia abotane,

⁴ abotanezilɛ wɔ amaneɛnwunlɛ nu maa sonla nyia subane kpalɛ mɔɔ gyi kpundii, yɛɛ subane kpalɛ zɛhae maa ye anyelazo.

⁵ Anyelazo ɛhye ɛnye yɛ anrinli ɛndo yɛ sa nu, ɔluakɛ Nyamenle ɛlua Sunsum Nwuanzanwuanza ne, mɔɔ le Nyamenle ahyɛlɛdeɛ ne azo ɛva ye ɛhulolɛ ɛyi yɛ ahonle ne mɔ tɛkɛɛ.

⁶ Mekɛ mɔɔ ɛnee moalɛ ɛwie bɔkɔɔ la, Kelaese wule manle bɛdabɛ mɔɔ bɛnze Nyamenle la wɔ mekɛ mɔɔ Nyamenle ɔdaye ɔhyehyɛle la anu.

⁷ Ɔyɛ se kɛ awie kɛwu kɛmaa tenlenenli. Ɔyɛ a bie kɛhulo kɛ ɔkɛwu ɔkɛmaa sonlakpalɛ bɔbɔ ɛdeɛ,

⁸ noko Nyamenle ɛhile kɛ ɔsi ɔkulo yɛ la, na yemɔ a le kɛ, mɔɔ ɛnee yɛtɛda nwo yɛtɛde ɛtaneyɛlɛma la, Kelaese wule manle yɛ!

⁹ Nyamenle ɛlua Kelaese ewule zo ɛmaa yɛzɔ ɔ nye; fane nyɛ yɛɛ akee ɔnrɛlua Kelaese anwo zo ɔnrɛlie yɛ ɔnrɛvi ye ɛya ne anu ɛ?

¹⁰ Mɔɔ ɛnee yɛle Nyamenle kpɔvolɛma la, yelua ɔ Ra ne ewule zo ɔ nee yɛ ɛli ngamɔnu na yeyɛ yɛ ɔ gɔnwo mɔ a, ɛnee fane nyɛ yɛɛ akee ɔnrɛlua tease Kelaese ne ati ɔnrɛlie yɛ ngoane ɛ?

¹¹ Noko tɛ ɔ muala ɛ. Yɛdua Awulae Gyisɛse Kelaese anwo zo yɛdi fɛlɛko wɔ Nyamenle anu, ɔluakɛ yeyɛ yɛ Nyamenle agɔnwo mɔ.

Adam nee Kelaese

¹² Yemɔti kɛmɔ ɛtane luale sonla ko anwo zo a rale ewiade, na sonla ko ne ɛtane ne vale ewule rale la, yɛɛ ewule dele kpondenle aleɛabo amra anwo zo a, ɔluakɛ menli kɔsɔɔti ɛyɛ ɛtane.

¹³ Ɛtane rale ewiade kolaa na bɛava mɛla ne bɛamaa, yɛɛ mɔɔ ɛnee mɛla ɛnle ɛkɛ la, bɛmbu ɛtane nwo mgbonda bɛntia awie biala.

¹⁴ Noko ɔvi Adam anwo zo toonwo mɔɔ radwule Mosisi anwo zo la, ewule nyianle sonla nwo zo tumi, bɔbɔ menli mɔɔ bɛ ɛtane ne mɔ ɛnle kɛ Adam mɛladonlɛ ɛdeɛ ne la. Adam le sonla ko ne mɔɔ ɔwɔ kɛ ɔba la sɔhovolɛ.

¹⁵ Noko bɛ mu nwiɔ bɛnle ko, ɔluakɛ Nyamenle ɛlolɛ ahyɛlɛdeɛ ne ɛnle kɛ Adam ɛtane ne la. Ɔle nɔhalɛ kɛ sonla ko ne ɛtane ti menli dɔɔnwo wule ɛdeɛ, noko Nyamenle ɛlolɛ ahyɛlɛdeɛ ne mɔɔ ɔlua sonla ko ne, mɔɔ le Gyisɛse Kelaese ɛlolɛ zo ɔfa ɔkyɛ mgbane la wɔ ɛkɛ maa menli somaa.

¹⁶ Ngakyile wɔ Nyamenle ahyɛlɛdeɛ ne nee mɔɔ sonla ko ne ɛtane ne kola yɛ la anu. Ɔluakɛ sonla ko ne ɛtane ti yɛɛ Nyamenle buale sonla fɔlɛ a; na ɛtaneyɛlɛ somaa ne anzi, ye ɛlolɛ ahyɛlɛdeɛ ne ɛbua yɛ benle.

¹⁷ Sonla ko ne, Adam ɛtane ti yɛɛ ɛtane luale ranyianle sonla nwo zo tumi a. Zɔhane ala yɛɛ bɛdabɛ mɔɔ bɛbalua sonla ko ne, Gyisɛse Kelaese anwo zo bɛanyia ɛlolɛ ne molozo nee pɛlepɛlelilɛ ahyɛlɛdeɛ ne mɔɔ bɛfa bɛmaa mgbane la anwo bazo kpalɛ, na bɛalua ɔ nwo zo bɛali arelemgbunli wɔ bɛ ɛbɛlabɔlɛ nu a.

¹⁸ Zɔhane ati, kɛmɔ sonla ko mɛladonlɛ hwenle menli kɔsɔɔti hɔle ewule nu la, zɔhane ala yɛɛ sonla ko tenleneyɛlɛ babua menli kɔsɔɔti benle na yeamaa bɛ ngoane a.

¹⁹ Kɛmɔ sonla ko anzosesebɛ ti menli muala yɛle ɛtanevolɛma la, zɔhane ala yɛɛ ɔlua sonla ko anzomɛlɛkɛ zo menli somaa bazɔ Nyamenle anye a.

²⁰ Bɛvale mɛla ne bɛrale ala la yɛɛ mɛladonlɛ liele ebia a; noko ɛleka mɔɔ ɛtaneyɛlɛ ne zonle la, Nyamenle ɛlolɛ ne yɛle dɔɔnwo bole zolɛ.

²¹ Zɔhane ati, kɛmɔ ɛtane vale ewule a lile belemgbunli la, zɔhane ala yɛɛ Nyamenle ɛlolɛ ne fa kpalɛyɛlɛ di belemgbunli na ɔfa yɛ ɔdua Gyisɛse Kelaese, yɛ Awulae ne anwo zo ɔkɔ ngoane mɔɔ ɛnlɛ awieleɛ la anu a.