Wulo 3 - BAEBOLO ANZƐƐ BULUKU NWUANZANWUANZA

¹ Asoo Dwuuma gyi boɛ tɛla bɛdabɛ mɔɔ bɛnle Dwuuma la? Anzɛɛ nvasoɛ bie wɔ mrenyanu nzonlɛyɛlɛ zo ɔ?

² Nɔhalɛ bɔkɔɔ, wɔ adenle biala azo! Ɔboalekɛ alumua ne, bɛmɛ yɛɛ Nyamenle vale ye ngilehilelɛ ne wulale bɛ sa nu a.

³ Na saa yera kɛ menli ne bie mɔ anli nɔhalɛ a, ɛnee ɔkile kɛ Nyamenle ɔdaye ɔnrɛli nɔhalɛ ɔ?

⁴ Kyɛkyɛ, ɔnle zɔhane fee. Saa menli ɛnli nɔhalɛ bɔbɔ a Nyamenle bahɔ zolɛ ali nɔhalɛ dahuu. Nyamenle Edwɛkɛ ne se, “Ɔwɔ kɛ bɛkile wɔ bɛmaa ɛka nɔhalɛ; na bɛdi wɔ edwɛkɛ a wɔali benle.”

⁵ Saa yɛ nyɛleɛ ɛtane ɛtane ne mɔ maa yɛnwu Nyamenle pɛlepɛlelilɛ ne wienyi a, ɛnee kɛ yɛse ɛ? Saa yɛyɛ ɛtane na Nyamenle tea yɛ a, ɛnee Nyamenle ɔdaye yeyɛ ɛtane ɔ? (Melɛtendɛ kɛ sonla ala la.)

⁶ Ɔnle nɔhalɛ! Saa Nyamenle ɛnli pɛlepɛle a, ɛnee kɛ ɔkɛzi ɔkɛbua ewiade ndɛne ɛ?

⁷ Saa me adalɛ mɔɔ mele la kile maa Nyamenle anyunlunyia ne nee ye nɔhalɛ ne da ali wienyi a, ɛnee duzu ati yɛɛ bɛbua me fɔlɛ kɛ mele ɛtanenli ɛ?

⁸ Duzu ati yɛɛ bɛnga kɛ, “Bɛmaa yɛli ɛtane amaa kpalɛ ara ɛ?” Nɔhalɛ, ɛzonle mɔɔ menli ne bie mɔ ɛva ɛdo yɛ nwo zo la ɛne. Na bɛdabɛ bɛ munzule doa bɛ!

Sonla biala ɛnle tenlenenli

⁹ Saa ye zɛhae a, ɛnee yɛdayɛ Dwuuma yɛgyi boɛ yɛtɛla bɛdabɛ mɔɔ bɛnle Dwuuma la ɔ? Kyɛkyɛ, ɔnle zɔhane fee. Mehile nuhua dɛba kɛ Dwuuma nee bɛdabɛ mɔɔ bɛnle Dwuuma la amuala zo ɛtane.

¹⁰ Nyamenle Edwɛkɛ ne se, “Awie biala ɛnle ɛkɛ mɔɔ le tenlenenli a, Kyɛkyɛ ko bɔbɔ ɛnle ɛkɛ.

¹¹ Biala ɛnlɛ ndelebɛbo, biala ɛmkpondɛ Nyamenle abo zo.

¹² Menli kɔsɔɔti ɛde Nyamenle anwo atua; biala ɛvo, yɛɛ biala ɛnli boɛ, kyɛkyɛ, ko bɔbɔ ɛnle ɛkɛ.

¹³ Bɛ nloa deda nwolɛ kɛ sɛka mɔɔ ɛbubu, adalɛ yɛɛ vi bɛ nloa anu finde a. Bɛ nloa edwɛkɛ yɛ nla tɛla ɛwɔlɛ gye.

¹⁴ Amowa nee nzɛnvunli wɔ bɛ nloa anu.

¹⁵ Bɛle ahɔdiawu,

¹⁶ ɛleka biala mɔɔ bɛkɛhɔ la bɛtwehwe amaneɛnwunlɛ nee nyanelilɛ bɛmaa.

¹⁷ Bɛnze anzonudwolɛ adenle ne

¹⁸ yɛɛ Nyamenle ɛzulolɛ biala ɛnle bɛ nu.”

¹⁹ Mɔɔ yɛnwu ye la a le kɛ, debie biala mɔɔ wɔ mɛla ne anu la wɔ ɛkɛ ne maa bɛdabɛ mɔɔ bɛwɔ mɛla ne abo la, amaa menli muala aha bɛ nloa ado nuhua kɛ bɛdi fɔlɛ wɔ Nyamenle ndɛnebualɛ ne anu.

²⁰ Ɔluakɛ awie biala mɔɔ di Mosisi mɛla ne azo la ɛngola ɛnzɔ Nyamenle anye. Mɛla ne gyima a le kɛ, ɔmaa sonla nwu ye ɛtane mɔɔ yeyɛ la.

Kɛ Nyamenle si maa menli sɔ ɔ nye la

²¹ Kɛkala, adenle mɔɔ Nyamenle dua zo maa menli sɔ ɔ nye la ɛrala ɛkɛ wienyi, yɛɛ ɔnvane mɛla ne anwo hweledede. Mɛla mumua ne nee Nyamenle kpɔmanvolɛma di ɛhye anwo daselɛ.

²² Nyamenle dua menli diedi mɔɔ lɛ ye wɔ Gyisɛse Kelaese anu la azo a maa bɛsɔ ɔ nye a. Nyamenle yɛ ɛhye maa bɛdabɛ mɔɔ bɛdie Kelaese bɛdi la amuala, ɔboalekɛ ngakyile fee ɛnle nuhua;

²³ menli kɔsɔɔti ɛyɛ ɛtane na bɛnfɛta Nyamenle anyunlunyia ne.

²⁴ Ɔlua mgbɔdalɛ mɔɔ Gyisɛse Kelaese ɛva ɔ nwo ɛli la azo, Nyamenle ɛlolɛ ne mɔɔ ɔfa ɔkyɛ mgbane la maa menli muala sɔ ɔ nye.

²⁵ Nyamenle ɔdaye ɔvale Gyisɛse ɔmanle, amaa ɔlua ye ewule ne azo yeayɛ menli ɛtane nwo mgbɔdalɛ boane, wɔ bɛ diedi mɔɔ bɛkɛnyia ye wɔ ye nu la azo. Nyamenle yɛle ɛhye vale hilele ye tenleneyɛlɛ ne. Mɔmoane, ɔzile abotane na ɔbule ɔ nye ɔguale menli ɛtane zo;

²⁶ na kɛkala ɔ nee menli di wɔ bɛ ɛtane nwo, ɔfa ɔkile ye tenleneyɛlɛ ne. Nyamenle dua adenle ɛhye azo kile kɛ ɔle tenlenenli na ɔmaa awie biala mɔɔ die Gyisɛse di la sɔ ɔ nye.

²⁷ Ɛnee akee duzu a yɛfa yɛtu yɛ nwo a? Yɛnlɛ ɛhwee! Na ɛnee akee duzu ati ɔ? Ɛnee yɛ gyima kpalɛ nwo anzɛɛ? Kyɛkyɛ. Na yɛdie yɛdi la ati ɔ.

²⁸ Ɔluakɛ yɛnwu kɛ sonla mɔɔ die Nyamenle di la yɛɛ Nyamenle maa ɔsɔ ɔ nye a, na tɛ mɔɔ di mɛla ne azo la ɔ.

²⁹ Na Nyamenle le Dwuuma angome Nyamenle ɔ? Anzɛɛ ɔnle bɛdabɛ noko mɔɔ bɛnle Dwuuma la Nyamenle ɔ? Kɛmɔti ɛ, ɔle bɛdabɛ noko bɛ Nyamenle!

³⁰ Nyamenle le kokye yɛɛ ɔbalua diedi zo a yeamaa Dwuuma azɔ ɔ nye a; zɔhane ala yɛɛ ɔbalua bɛdabɛ mɔɔ bɛnle Dwuuma la noko diedi zo yeamaa bɛazɔ ɔ nye a.

³¹ Na ɛnee ɛhye kile kɛ yɛdua diedi zo yɛavuandi mɛla ne yɛagua ɔ? Kyɛkyɛ! Ɔnle zɔhane fee. Yɛdua yɛ diedi zo yɛkpogya mɛla ne zo.