Wulo 2 - BAEBOLO ANZƐƐ BULUKU NWUANZANWUANZA

Nyamenle ndɛnebualɛ ne

¹ Zɔhane ati ayi, wɔmɔ a ɛle nwane bɔbɔ a, ɛnlɛ adenle ɛmbua awie mɔ ndɛne hweledede. Saa ɛbua awie ndɛne wɔ ye nyɛleɛ nwo a, ɛnee ɛlɛbua ɛ nwo fɔlɛ, ɔboalekɛ ɛdawɔ mumua ne mɔɔ ɛlɛbua ndɛne ne la ɛyɛ nyɛleɛ ko ne ala mɔɔ ahenle mɔɔ ɛlɛbua ye ndɛne la yɛ la bie.

² Yɛze kɛ saa Nyamenle tea bɛdabɛ mɔɔ bɛbɔ zezɛhae ɛbɛla la a ɛnee ɔfɛta.

³ Na ayi, ɛdawɔ mumua ne ɛyɛ nyɛleɛ mɔɔ ɛbua awie mɔ nwolɛ fɔlɛ la bie. Ɛnee ɛdwenle kɛ ɛkɛvi nu wɔ Nyamenle ndɛnebualɛ ne anu ɔ?

⁴ Anzɛɛ ɛmbu ye kpalɛyɛlɛ totohyia ne nee ye abotane ne bie ɔ? Ɛnze kɛ Nyamenle atiakunlukɛnlɛmayɛlɛ ne wɔ ɛkɛ ne, ɔlɛkile wɔ yeamaa wɔanlu ɛ nwo ɔ?

⁵ Noko bɛmɛ bɛ nzo yɛ se kpalɛ, yɛɛ bɛsolo. Zɔhane ati bɛlɛmaa bɛ ndeanlɛ ayɛ kpole wɔ Kenle ne mɔɔ Nyamenle ɛya ne nee ye ndɛnebualɛ fɔɔnwo ne kɛdwu la.

⁶ Ɔluakɛ Nyamenle badua awie biala kakɛ, kɛmɔ ye gyima de la.

⁷ Menli bie wɔ ɛkɛ mɔɔ bɛmɛ, abotane nee kpalɛyɛlɛ ala a bɛli ɔ nzi a, na bɛkpondɛ anyunlunyia, enililɛ nee ngoane mɔɔ ɛnlɛ awieleɛ la. Na bɛmɛ noko ala yɛɛ Nyamenle bamaa bɛ ngoane mɔɔ ɛnlɛ awieleɛ a.

⁸ Bie mɔ noko le angomedi, bɛkpo mɔɔ le nɔhalɛ la na bɛdi ɛtane nzi. Bɛ nwo zo yɛɛ Nyamenle bawola ye ɛya kpole ne agua a.

⁹ Bɛdabɛ mɔɔ bɛyɛ amumuyɛ la amuala banwu amaneɛ nee abodelɛ, Dwuuma lumua yɛɛ bɛdabɛ noko mɔɔ bɛnle Dwuuma la doa bɛ.

¹⁰ Nyamenle bava anyunlunyia, enililɛ nee anzonudwolɛ amaa bɛdabɛ mɔɔ bɛdi boɛ la, Dwuuma lumua yɛɛ bɛdabɛ noko mɔɔ bɛnle Dwuuma la doa bɛ.

¹¹ Ɔluakɛ Nyamenle bua menli kɔsɔɔti ndɛne wɔ adenle ko ne ala azo.

¹² Bɛdabɛ mɔɔ bɛnle Dwuuma la ɛnlɛ Mosisi mɛla ne; yemɔti bɛyɛ ɛtane a bɛminli bɔbɔ ɛdeɛ, noko tɛ mɛla ne abo ɔ. Dwuuma a lɛ mɛla ne a, yemɔti bɛyɛ ɛtane a bɛnea mɛla ne azo a bɛbua bɛ ndɛne a.

¹³ Ɔluakɛ tɛ mɛla ne ɛdielɛ a maa sonla sɔ Nyamenle anye a, kyesɛ ɔyɛ mɔɔ mɛla ne se la.

¹⁴ Bɛdabɛ mɔɔ bɛnle Dwuuma la ɛnlɛ Mosisi mɛla ne suzuamgba ɛdeɛ, noko kenle biala mɔɔ bɛkɛyɛ mɔɔ mɛla ne se la bie la, ɛnee bɛyɛ Mosisi mɛla ne bɛmaa bɛ nwo.

¹⁵ Bɛ nyɛleɛ ne kile kɛ mɔɔ Mosisi mɛla ne kpondɛ la, bɛhɛlɛ ye wɔ bɛ ahonle nu, yɛɛ bɛ adwenle die to nu kɛ ɔle nɔhalɛ, ɔluakɛ ɔyɛ a bɛ adwenle nu yɛ bɛ kesee kɛ bɛbali fɔlɛ anzɛɛ bɛbali benle wɔ Kenle ne anu,

¹⁶ kɛmɔ Edwɛkpa ne mɔɔ mebɔ ye nolo la kile la. Na yemɔ a le kɛ, Nyamenle dua Gyisɛse Kelaese anwo zo bua menli kɔsɔɔti ndɛne wɔ adwenle biala mɔɔ bɛfa ye fealera nu la anwo.

Dwuuma nee Mosisi mɛla ne

¹⁷ Na saa ɛfɛlɛ ɛ nwo Dwuunli, ɛgyi Mosisi mɛla ne azo, ɛfa Nyamenle ɛtu ɛ nwo,

¹⁸ ɛze mɔɔ Nyamenle kpondɛ kɛ ɛyɛ la, yɛɛ wɔzukoa mɛla ne la ati, ɛze mɔɔ le kpalɛ mɔɔ ɔwɔ kɛ ɛyɛ la,

¹⁹ ɛze ye wienyi kɛ wɔmɔ a ɛle anyenzinliravolɛma adekilevolɛ a, ɛle kɛnlaneɛ ɛmaa menli mɔɔ lua awozinli nu la,

²⁰ ɛle fotuvo ɛmaa mɔɔ ɛnze nrɛlɛbɛ la, ɛle ngakula kilehilevolɛ, ɛze ye wienyi kɛ mɛla ne ɛbuke wɔ adwenle nu ɛmaa wɔnwu nɔhalɛ ne,

²¹ ɛkilehile ɛ gɔnwo mɔ a, ɛnee duzu ati a ɛngilehile ɛ nwo ɛ? Ɛka kɛ, “Bɛmmawua”, na asoo ɛnle awule?

²² Ɛse, “Bɛmmato awuvolɛvalɛ mɛla ne”, na asoo ɛnva awuvolɛ? Ɛkyi amonle anzɛɛ bozonle, na asoo ɛngɔ amonle nu anzɛɛ bozonle zo ɛngɔnwua?

²³ Ɛtu ɛ nwo kɛ ɛlɛ mɛla ne, na asoo ɛntietia zolɛ, ɛngua Nyamenle anyunlu aze?

²⁴ Nyamenle Edwɛkɛ ne se, “Bɛmɛ Dwuuma bɛ ti, bɛdabɛ mɔɔ bɛnle Dwuuma la tendɛ tia Nyamenle.”

²⁵ Saa bɛdi mɛla ne azo a, ɛnee bɛ mrenyanu nzonlɛyɛlɛ ne le nvasoɛ, na saa bɛnli mɛla ne azo a, ɛnee noko anrɛɛ bɛanyɛ bɛ mrenyanu nzonlɛ bɔbɔ.

²⁶ Na saa awie mɔɔ ɛnle Dwuunli, mɔɔ ɛtɛyɛle ye mrenyanu nzonlɛ la yɛ mɔɔ mɛla ne kpondɛ la a, ɛnee ɛnea a asoo Nyamenle ɛnrɛva sonla zɔhane kɛ asɛɛ yeyɛ ye mrenyanu nzonlɛ?

²⁷ Zɔhane ati menli mɔɔ nwonane nu bɛtɛyɛle bɛ mrenyanu nzonlɛ, noko bɛdi mɛla ne azo la babua bɛdabɛ mɔɔ bɛyɛ bɛ mrenyanu nzonlɛ na bɛlɛ mɛla ne bɛ sa nu, na bɛtietia zolɛ la ndɛne.

²⁸ Nwane a le Dwuunli kpalɛ ne mɔɔ ɛyɛ ye mrenyanu nzonlɛ la a? Dwuunli kpalɛ ne, tɛ yemɔ a le sonla ne mɔɔ nwonane nu yeyɛ ye mrenyanu nzonlɛ la, yɛɛ mrenyanu nzonlɛyɛlɛ kpalɛ ɛnle nwonane nu debie.

²⁹ Dwuunli kpalɛ ne a le sonla ne mɔɔ sunsum nu yeyɛ ye ahonle nu mrenyanu nzonlɛ na ɔnyɛ ye nwonane nu debie la. Sonla ɛhye nyia ye nganvolɛ fi Nyamenle ɛkɛ, ɔnnyia ye ɔnvi menli lɔ.