Wulo 10 - BAEBOLO ANZƐƐ BULUKU NWUANZANWUANZA

¹ Me mediema, me kunlu a anrɛɛ bɛlie me menli ne kɔsɔɔti ngoane. Na ɛhye ati mefa me ahonle muala mesɛlɛ Nyamenle wɔ nwolɛ dahuu.

² Mekola medi daselɛ kɛ me menli ne lɛ Nyamenle anwo ɛhulolɛ kpole kpalɛ; noko bɛ ɛhulolɛ mɔɔ bɛlɛ ye wɔ Nyamenle anwo la ɛngyi nɔhalɛ ndelebɛbo kpalɛ zo.

³ Ɔluakɛ bɛgyakyi fɔɔnwoyɛlɛ adenle ne mɔɔ Nyamenle dua zolɛ maa menli sɔ ɔ nye la, na bɛpele bɛva bɛ ngome bɛ fɔɔnwoyɛlɛ adenle ɛdeɛ zo; bɛanva nɔhalɛ fɔɔnwoyɛlɛ adenle ne mɔɔ Nyamenle dua zolɛ maa menli sɔ ɔ nye la azo.

⁴ Ɔluakɛ Kelaese rale la yɛɛ mɛla ne tumi bɔle aze a, amaa mɔɔ kɛlie kɛli la azɔ Nyamenle anye.

Ngoanelielɛ wɔ ɛkɛ maa awie biala

⁵ Wɔ mɛla ne azolilɛ nu, Mosisi hanle kɛ sonla mɔɔ kɛyɛ mɔɔ mɛla ne kpondɛ la balua zolɛ anyia ngoane.

⁶ Na bɛdabɛ mɔɔ ɔlua diedi zo bɛsɔ Nyamenle anye la, kɛ Nyamenle Edwɛkɛ ne se la ɛne, “Ɔnle kɛ ɛka ɛkile ɛ nwo kɛ, ‘Nwane bɔbɔ a kɛhɔ nyamenlezo a?’ ” (Kɛ ɔkava Kelaese yeadwu aze.)

⁷ “Anzɛɛ ɔnle kɛ ɛbiza kɛ, ‘Nwane a kɛdwu kɛhɔ ɛbolɔ maanle nu a?’ ” (Kɛ ɔkava Kelaese yeavi mɔwuamra anu yeara.)

⁸ Mɔɔ ɔka la a le ɛhye, “Nyamenle edwɛkɛ ne ɛbikye bɛ, ɔla bɛ nloa na ɔwɔ bɛ ahonle nu,” na yemɔ a le diedi nwo edwɛkɛ ne mɔɔ yɛbɔ ye nolo yɛkile bɛ la.

⁹ Ɔboalekɛ, saa bɛdie bɛto nu na bɛka ye bɛ nloa kɛ, “Gyisɛse le Awulae” na bɛdie bɛdi wɔ bɛ ahonle nu kɛ Nyamenle dwazole ye vile mɔwuamra anu a, bɛbanyia ngoane.

¹⁰ Ɔluakɛ saa sonla fa ye ahonle die di a yɛɛ ɔka ye diedi ne ɔ nloa na ɔnyia ngoane a.

¹¹ Nyamenle Edwɛkɛ ne se, “Awie biala mɔɔ kɛlie ye kɛli la anyunlu ɛnrɛgua aze.”

¹² Awie biala boka ɛhye anwo, ɔboalekɛ ngakyile biala ɛnle Dwuuma nee bɛdabɛ mɔɔ bɛnle Dwuuma la avinli. Nyamenle le bɛ kɔsɔɔti bɛ Awulae ko ne ala, na ɔyila bɛdabɛ mɔɔ bɛsu bɛfɛlɛ ye la.

¹³ Nyamenle Edwɛkɛ ne se, “Awie biala mɔɔ kɛbɔ Awulae duma kɛzu kɛvɛlɛ ye la kɛnyia ngoane.”

¹⁴ Na kɛ menli kɛyɛ na bɛazu bɛavɛlɛ ye wɔ mekɛ mɔɔ bɛnlie ye bɛnli la ɛ? Na kɛ ɔkɛyɛ na bɛalie mɔɔ bɛtɛtele ɔ nwo edwɛkɛ ɛlɛ la bɛali ɛ? Saa bɛannyia mɔɔ ka maa bɛtie noko la a, kɛ ɔkɛyɛ na bɛade ɛ?

¹⁵ Na kɛ ɔkɛyɛ na bɛabɔ nolo ne wɔ mekɛ mɔɔ bɛtɛsoanle menli kɛ bɛhɔbɔ nolo la ɛ? Mɔɔ Nyamenle Edwɛkɛ ne ka ye wɔ nwolɛ la ɛne, “Soanvolɛma ne mɔɔ fa edwɛkɛ kpalɛ ne ara la ɛralɛ nu le kɛnlɛma na ɔyɛ nwanwane!”

¹⁶ Noko tɛ bɛ muala a bɛlie Edwɛkpa ne bɛli a, ɔluakɛ Ayezaya hanle ye bɛ nwo kɛ, “Awulae, edwɛkɛ ne mɔɔ bɛdele bɛvile yɛ ɛkɛ ne la, nwane a liele lile a?”

¹⁷ Yemɔti, saa yɛte edwɛkɛ ne a yɛɛ yɛnyia diedi a, yɛɛ edwɛkɛ ne a le Kelaese ne anwo Edwɛkpa ne nolobɔlɛ ne.

¹⁸ Na mebiza kɛ, asoo ɔle nɔhalɛ kɛ bɛtɛtele Edwɛkpa ne? Bɛde ye bɔkɔɔ, ɔluakɛ Nyamenle Edwɛkɛ ne se, “Bɛ ne ɛdwu ewiade muleɛ muala azo; bɛ edwɛkɛ ɛdwu azɛlɛ ye kodoka biala anu.”

¹⁹ Eza mebiza bieko kɛ, ɛnee Yizilayɛma ande ɔ bo ɔ? Dumua tie mɔɔ Mosisi hanle la; ɔse, “Mebamaa bɛ nye abolo menli bie mɔɔ ɛnfɛta maanle bɔbɔ la; na mebalua kɔnwɔnema bie maanle zo meamaa bɛava ɛya.”

²⁰ Ayezaya noko si ɔ kɛnra ka kɛ, “Menli mɔɔ ɛnee ɛmkpondɛ me la ɛnwu me; meye me nwo mehile menli mɔɔ ɛmbiza me bo zo la.”

²¹ Noko mɔɔ fane Yizilayɛma anwo la Ayezaya hanle kɛ, “Mendenrɛle me sa alehyenlɛ muala kɛ medie menli ne mɔɔ ɛde atua na bɛ nzo yɛ se la, na ɔyɛle mgbane.”