Pɔɔlo Kɛlata mɔɔ ɔhɛlɛle ɔhɔmanle Taetɛse la 3 - BAEBOLO ANZƐƐ BULUKU NWUANZANWUANZA

Kelaese ɛdoavolɛ ɛbɛlabɔlɛ

¹ Kakye wɔ menli ne kɛ bɛha bɛ nwo aze bɛmaa arelemgbunli nee bɛdabɛ mɔɔ tumi wɔ bɛ sa nu la, bɛdie bɛ edwɛkɛ na bɛbɔ ɛbɛla kpalɛ wɔ adenle biala anu.

² Ka kile bɛ kɛ bɛmmaka awie anwo edwɛkɛ ɛtane anzɛɛ bɛmmadi butule, na bɛva anzonudwolɛ nee agɔnwolɛyɛlɛ bɛdɛnla na bɛli awie biala eni.

³ Ɔluakɛ ɛnee anrɛɛ yɛdayɛ noko yɛle ahɔnwɔne, tufoande, yɛɛ yɛminlinle. Yɛyɛle ngɛkɛlɛ yɛmanle nwonane nu atiakunluwɔzo nee anyelielɛ ngakyile kɔsɔɔti; yɛbɔle yɛ ɛbɛla ne atiakunlutane nee anyebolo nu; menli kpɔle yɛ yɛɛ yɛdayɛ noko yɛkpɔle yɛ nwo ngoko ngoko.

⁴ Na mɔɔ yɛ Ngoanelielɛ Nyamenle ne lale ye atiakunlukɛnlɛma nee ye ɛhulolɛ ne ali la,

⁵ ɔliele yɛ ngoane. Tɛ gyima kpalɛ mɔɔ yɛyɛle la ati ɔ, na ɔse anwunvɔne la ati ɔ. Ɔluale nzule awolɛ fofolɛ ne, mɔɔ le ɛbɛlabɔlɛ fofolɛ ne mɔɔ Sunsum Nwuanzanwuanza ne fa maa la azo a ɔwole yɛ bieko a.

⁶ Ɔluakɛ Nyamenle luale yɛ Ngoanedievolɛ Gyisɛse Kelaese anwo zo wolale Sunsum Nwuanzanwuanza ne guale yɛ nwo zo,

⁷ amaa ɔlua ye ɛlolɛ zo yɛazɔ Nyamenle anye na yɛanyia ngoane ne mɔɔ ɛnlɛ awieleɛ mɔɔ yɛ nye la zolɛ la.

⁸ Edwɛkɛ ɛhye le nɔhalɛ. Mekulo kɛ ɛka edwɛkɛ ɛhye mɔ na ɛsi zo ɛsesebɛ, amaa bɛdabɛ mɔɔ bɛdie Nyamenle bɛdi la anlea zolɛ abɔ ɛbɛla kpalɛ dahuu. Ɔluakɛ ɛhye mɔ le kpalɛ na eza ɔhyia ɔmaa sonla biala.

⁹ Tua ɛhye mɔ: kpolerazulɛ mɔɔ nrɛlɛbɛ ɛnle nu, yɛ nlenya mɔ aluma ngilehilenu, butulelilɛ nee mɛla nwo kpolerazulɛ. Ɛhye mɔ anwo ɛnlɛ nvasoɛ yɛɛ eza bɛle debie mgbane.

¹⁰ Sonla mɔɔ fa mgbakyemgbakye ara la, bɔ ye kɔkɔ fane kɛyɛ nwiɔ, na gyakyi ye maa ɔva ɔ nwo.

¹¹ Ɛkola ɛnwu ye kɛ sonla zɛhae ɛzɛkye, na ye ɛtane ne bua ye fɔlɛ.

Ngilehilelɛ mɔɔ li awieleɛ

¹² Saa mesoa Aatɛmase anzɛɛ Tekekɛse wɔ ɛ nwo lɔ a, bɔ mɔdenle kɛ ɛkɛra me nwo wɔ Nekɔpɔlese, ɔboalekɛ meyɛ me adwenle kɛ ɛkɛ ne a mekali fɔsɛlɛ ne a.

¹³ Bɔ mɔdenle kɛ ɛkɛmaa Zinase mɔɔ le lɔyanli ne nee Apolɔso kɛbɔ bɛ adendulɛ ne abo, na nea kɛ bɛnyia debie biala mɔɔ bɛhyia nwolɛ la.

¹⁴ Maa yɛ menli ne mɔ ɛzukoa ɛyɛ gyima kpalɛ, amaa saa edwɛkɛ bie mɔɔ hyia la si a bɛahola bɛaboa. Ɔnle kɛ bɛbɔ ɛbɛla mɔɔ nvasoɛ biala ɛnle zolɛ la.

¹⁵ Bɛdabɛ mɔɔ bɛ nee me wɔ ɛke la amuala biza wɔ ahye. Yɛbiza yɛ gɔnwo mɔ mɔɔ yɛ muala yɛlɛ diedi ko la ahye. Nyamenle ɛlo bɛ na ɔ nee bɛ ɛdɛnla.