Pɔɔlo Kɛlata mɔɔ ɔhɛlɛle ɔhɔmanle Taetɛse la 2 - BAEBOLO ANZƐƐ BULUKU NWUANZANWUANZA

Diedi nee ngilehilelɛ saanwu

¹ Na wɔmɔ, ɔwɔ kɛ ɛkilehile diedi ne mɔɔ le saanwu la.

² Kilehile mrenya mgbanyinli ne mɔ maa bɛyɛ bɛ nye gyɛlɛmgbɛɛnye, bɛdwenle, bɛzie bɛ nwo diinyi, bɛmaa bɛ diedi ɛyɛ nla, na bɛnyia ɛhulolɛ nee abotane.

³ Zɔhane ala noko yɛɛ maa mraalɛ mgbanyinli ne mɔ ɛnwu ye na bɛbɔ ɛbɛla mɔɔ kile kɛ bɛze Nyamenle la a. Bɛmmayɛ ngunzi anzɛɛ bɛmmayɛ bɛ nwo akɛlɛ bɛmaa nza. Ɔwɔ kɛ bɛkilehile mɔɔ le kpalɛ la,

⁴ amaa bɛahola bɛatete mbɛlɛra ne mɔ bɛamaa bɛahulo bɛ hu mɔ nee bɛ mra.

⁵ amaa bɛanwu nrɛlɛbɛ, bɛazie bɛ nwo diinyi, bɛayɛ atiakunlukɛnlɛma, bɛ nwo ade saanwu, na bɛayɛ yelɛma kpalɛ mɔɔ tie bɛ hu mɔ ane a, amaa awie anga Nyamenle edwɛkɛ ne anwo edwɛkɛ ɛtane.

⁶ Zɔhane ala yɛɛ ka kile mgbavolɛ ne mɔ maa bɛzɔ bɛ nwo a.

⁷ Wɔ ninyɛne muala anu, ɛdawɔ mumua ne pɛ kelemunli kpalɛ wɔ gyima kpalɛ ɛyɛlɛ nu to ɛkɛ. Maa ɛ nye ɛbolo wɔ ngilehilelɛ ne anwo na di nɔhalɛ.

⁸ Fa ɛdendɛlɛ kpalɛ mɔɔ menli ɛnrɛha nwolɛ edwɛkɛ la kilehile, amaa wɔ agbɔvolɛ asa aha bɛ gye nu, na bɛannyia edwɛkɛ ɛtane bɛanga wɔ yɛ nwo.

⁹ Kilehile bɛdabɛ mɔɔ bɛle ahanra la maa bɛdie bɛ menle mɔ edwɛkɛ na bɛmaa bɛ menle mɔ akunlu ɛdwo bɛ nwo wɔ ninyɛne muala anu. Saa bɛ menle mɔ tendɛ bɛ nyunlu a, bɛmmayeye bɛ nloa azo.

¹⁰ Bɛmmayɛ awule ndɛbandɛba biala. Ɔwɔ kɛ dahuu bɛkile kɛ bɛle kpalɛ, bɛdi nɔhalɛ, amaa ngilehilelɛ ne mɔɔ fane Nyamenle yɛ Ngoanedievolɛ ne anwo la ayɛ nvasoɛ wɔ debie biala mɔɔ bɛyɛ la anu.

¹¹ Ɔluakɛ Nyamenle ɛye ye ɛlolɛ ne ɛhile wɔ menli kɔsɔɔti bɛ ngoanelielɛ ti.

¹² Zɔhane ɛlolɛ ne kilehile yɛ kɛ yɛvuandi ɛbɛla mgbane mgbane nee ewiade atiakunluwɔzo ne mɔ yɛgua, na yɛyɛ yɛ nye gyɛlɛmgbɛɛnye, yɛnlea boɛ na yɛbɔ Nyamenlezulolɛ ɛbɛla fɔɔnwo ne wɔ ewiade ye anu,

¹³ yɛva yɛhendɛ saleɛ Kenle ne mɔɔ yɛ nye la ye adenle wɔ melɛ mɔɔ yɛ Nyamenle bedevinli ne nee Ngoanedievolɛ Gyisɛse Kelaese bɛ anyunlunyia ne kɛra la.

¹⁴ Gyisɛse Kelaese vale ɔ nwo manle wɔ yɛ ti kɛ ɔbaye yɛ yeavi amumuyɛ muala anu, na yeayɛ yɛ ye menli mɔɔ anwo te na yɛle ɔ ngomekye ye ɛdeɛ la, amaa yɛ nye abolo kɛ yɛkɛyɛ kpalɛ.

¹⁵ Kilehile ɛhye mɔ amuala na fa wɔ tumi ne kpokpoti wula wɔ ngilehilelɛ nee bɛ nyunlu ɛhwilɛ nu. Mmamaa awie biala fa ɛ nyunlu kyikyi aze.