Pɔɔlo Kɛlata mɔɔ ɔhɛlɛle ɔhɔmanle Taetɛse la 1 - BAEBOLO ANZƐƐ BULUKU NWUANZANWUANZA

¹ Medame Pɔɔlo, mɔɔ mele Nyamenle sonvolɛ nee Gyisɛse Kelaese ɛzoanvolɛ la yɛɛ melɛkɛlɛ kɛlata ɛhye a. Bɛyele me na bɛzoanle me kɛ mengɔmboa Nyamenle menli ne mɔɔ yekpa nu yeye bɛ la wɔ bɛ diedi nu, na mengilehile bɛ memaa bɛnwu nɔhalɛ ne mɔɔ wɔ yɛ nyamenlezonlenlɛ ne anu la.

² Yɛ nyamenlezonlenlɛ ne gyi anyelazo zo kɛ kenle bie yɛbanyia ngoane mɔɔ ɛnlɛ awieleɛ la. Nyamenle, mɔɔ ɔmbɔ adalɛ ɛlɛ la, vale ngoane ɛhye bɔle yɛ ɛwɔkɛ kolaa na yeabɔ ewiade.

³ Mekɛ ne dwule la ɔvale nrɛlaleɛ ne ɔdole gua, na ɛhye yɛɛ yɛ Ngoanedievolɛ Nyamenle ne, ɛva ɛwula me sa nu kɛ membɔ ye nolo a.

⁴ Melɛkɛlɛ wɔ, Taetɛse, mɔɔ ɛle me ra kpalɛ la wɔ diedi ne mɔɔ yɛlɛ nu la ati. Egya Nyamenle nee Kelaese Gyisɛse, yɛ Ngoanedievolɛ ne ɛlo wɔ na ɔmaa wɔ anzonudwolɛ.

Taetɛse gyimalilɛ wɔ Kiliti

⁵ Mengyakyile wɔ wɔ Kiliti kɛ ɛnlea ɛmaa debie biala mɔɔ tɔ sinli la ɛyɛ boɛ, na ɛye mgbanyima ɛmaa bɛnlea asɔne ne mɔ mɔɔ wɔ sua biala azo la azo, kɛmɔ mengilehilele wɔ la.

⁶ Ɔnle kɛ asɔne neavolɛ biala di ɛzonle; ɔwɔ kɛ ɔgya raalɛ ko ala; ɔwɔ kɛ ɔ mra nyia diedi yɛɛ ɔnle kɛ bɛdie duma kɛ bɛle wowawowa anzɛɛ anzosesebɛ.

⁷ Ɔluakɛ, kɛmɔ asɔne neavolɛ ne gyi Nyamenle gyima ne ati la, ɔnle kɛ ɔ nwo nyia ngehanleɛ, ɔnle kɛ ɔmemaa ɔ nwo zo anzɛɛ ɔnyia ahonle kpole. Ɔnle kɛ ɔyɛ nzanli anzɛɛ ɔ sa yɛ kpokpo, ɔnle kɛ ɔ nye bolo ezukoa.

⁸ Ɔwɔ kɛ awie biala kola wolo ye na ɔkulo kpalɛyɛlɛ, ɔwɔ kɛ ɔkola ɔsɔ ɔ nwo, ɔyɛ sonla mɔɔ ye subane le kpalɛ, ɔ nwo te na ɔdi ɔ nwo eni.

⁹ Ɔwɔ kɛ ɔsɔ Nyamenle edwɛkɛ ne mɔɔ bɛkola bɛfa bɛ rɛle bɛto zo na eza ɔ nee yɛ ngilehilelɛ ne kɔ zolɛ la anu kyengye. Adenle ɛhye azo yɛɛ ɔbamaa yeahola yeamaa menli anwosesebɛ na yeahilehile bɛ na eza yeamaa bɛdabɛ mɔɔ bɛtia ngilehilelɛ ne la anwu bɛ nvonleɛ a.

¹⁰ Menli mɔɔ anzo yɛ se la dɔɔnwo wɔ ɛkɛ mɔɔ ko tia ngilehilelɛ ɛhye a. Bɛ nuhua titile a le bɛdabɛ mɔɔ ɛnee bɛli Dwuuma nyamenlezonlenlɛ ne anzi na bɛhakyi bɛrayɛ Kelaese ɛdoavolɛma la. Bɛka mgbole na bɛbɛlɛbɛla awie mɔ.

¹¹ Ɔwɔ kɛ ɛtua bɛ, ɔboalekɛ ɔlua ezukoakpondɛlɛ ti bɛlɛkilehile mɔɔ ɔnle kɛ bɛkilehile la, na bɛlɛsɛkye mbusua dɔɔnwo bɛabɔ bɛ awuke.

¹² Kilitinli bie mɔɔ bɛdabɛ bɛse ɔle bɛ Nyamenle kpɔmanvolɛ la ɛha kɛ, “Kilitima dahuu bɔ adalɛ, bɛle nane amumuyɛ, bɛle mgbovonle adidikpokuma.”

¹³ Na mɔɔ ɔhanle la le nɔhalɛ. Ɔlua ɛhye ati ɔwɔ kɛ ɛtwi bɛ nyunlu kpalɛ, amaa bɛanyia diedi mɔɔ yɛ nla la,

¹⁴ na bɛandoa Dwuuma amaamuo dɛba ne nee bɛ mɛla ne mɔ mɔɔ vi menli mɔɔ ɛkpo nɔhalɛ ne la ɛkɛ ne la abo zo.

¹⁵ Debie biala anwo te maa menli mɔɔ anwo te la, na ɛtanevolɛma nee menli mɔɔ ɛnlɛ diedi la, debie biala anwo ɛnde, ɔboalekɛ bɛ adwenle nee bɛ ti anu kɛkɛba ne ɛkpɔlɔ.

¹⁶ Bɛdabɛ bɛse bɛze Nyamenle, noko bɛ nyɛleɛ ɛngile zɔhane. Ɛkpɔlɛ nee anzosesebɛ ɛyi bɛ tɛkɛɛ, yɛɛ bɛnze debie kpalɛ biala yɛ.