Sɔlɔmɔn Edwɛne 5 - BAEBOLO ANZƐƐ BULUKU NWUANZANWUANZA

Nrenya ne

¹ Me diema raalɛ, me atɔfolɛ, mera me tola ne anu. Melɛboɔboa me alufuanlɛ nee me aledonlɛ ninyɛne evuanlɛ ne mɔ anloa; melɛdi me wolɛ ndɛlamoa nee me wolɛ ne; melɛno me nwanye ne nee me meleke ne. Agɔnwolɛma, bɛli na bɛnlo bɛnlo bɛbo, o kulovolɛma.

Mraalɛ ne mɔ Edwɛne mɔɔ tɔ zo nna Raalɛ ne

² Mɔɔ menlale la ɛnee me ahonle ɛlɛsi. Tie, me kulovolɛ ne ɛlɛbɔ me anlenkɛ nu! Buke anlenkɛ ne, me diema raalɛ, me abubule, me kulovolɛ mɔɔ di munli, ɛbɔlɛ ɛdɔ me ti zo, na me ti enrinli ɛloa tɔfɔɔ.

Nrenya ne Raalɛ ne

³ Meye me nwo dɛbadɛba; duzu ati a ɔwɔ kɛ mekeda me nwo bieko a? Menrinzi me gyakɛ anwo; duzu ati a ɔwɔ kɛ meyɛ bɛ evinli a?

⁴ Me kulovolɛ ne zɔle anlenkɛ ne ɛlakolo ne anu, na me kunlu dele me.

⁵ Mendwazole kɛ mebuke me kulovolɛ ne, na me sa anwo alufuanlɛ ne manle me sa telele; menzɔle kɔlɔkɔlɔ ne anu la, me sa mrɛlɛsɛka anwo alufuanlɛ ne telele.

⁶ Membukele me kulovolɛ ne anlenkɛ ne, na me kulovolɛ ne ɛzia ɛhɔ. Ɛnee me ɛkɛla ɛlɛsu kɛ ɔkɛde ɔ ne. Memkpondɛle ye, na meannwu ye; menvɛlɛle ye, na meande ye nganeɛ.

⁷ Suakpole ne azo sinzavoma mɔɔ ɛnee ɛlɛtudu agyakɛ la nwunle me; bɛbɔle me na bɛbodale me; bɛzale me bɛliele me aguzo ne, sinzavoma mɔɔ sinza bane ne mɔ la.

⁸ O bɛmɛ Gyɛlusalɛm mraalɛ, mese, saa bɛnwu me kulovolɛ ne a, bɛha bɛhile ye kɛ ye ɛhulolɛ ngome ɛbɔ me anwonyane.

Mraalɛ ne mɔ

⁹ Duzu a wɔ wɔ kulovolɛ ne anwo tɛla kulovolɛ biala a, anwofɛlɛko nu raalɛ anwofɛlɛko? Duzu a maa wɔ kulovolɛ ne tɛla kulovolɛ biala, mɔɔ yemɔti ɛse yɛ zɛhae ɛ?

Raalɛ ne

¹⁰ Me kulovolɛ ne anwo yɛ fɛ, eza ɔte kpɔkɛ; saa ɛye menli apenle bulu a ɔdaye ala.

¹¹ Ɔ ti sonle bolɛ kɛ ezukoa nvutuke, ɔ ti enrinli belebele gua zo ɔle duhuduhu kɛ kɔkɔsɛlɛ.

¹² Ɔ nye ma ngɛnlɛma le kɛ abubule mɔɔ bɛbia ye meleke nu, na ɔgyi nzubula nloa la, ɔfɛta ye somaa.

¹³ Ɔ nvoka le ngɛnlɛma kɛ aledonlɛ ninyɛne evuanlɛ kofie mɔɔ zolɛ bɔ evuanlɛ la. Ɔ nloa babonle le kɛ aloa mɔɔ kpu alufuanlɛ nzule la.

¹⁴ Ɔ sa mbaka le kɛ ezukoa nvutuke kpɔma, mgbɔdelera mɔɔ mgbɔba duodua nu la gua ɔ sa. Ye nwonane le tonlotonlo kɛ ɛzɛlɛ mɔɔ ezukoa bolɛ safaya betɛbeta nu la.

¹⁵ Ye ɛzɔlɛ le kɛ alabaseta adoba mɔɔ gyigyi ezukoa nvutuke zo. Ɔgyi zo sengɔɔnwo kɛ Lɛbanɔn awoka nee sida mbaka.

¹⁶ Ye ɛdendɛlɛ yɛ fɛ kpole, ye debie biala twe ahonle. Me kulovolɛ ne nee me gɔnwo ne kɛ de la ɛne, O Gyɛlusalɛm mraalɛ.