Sɔlɔmɔn Edwɛne 1 - BAEBOLO ANZƐƐ BULUKU NWUANZANWUANZA

¹ Edwɛne nu edwɛne mɔɔ yɛ fɛ kpalɛ kpalɛ mɔɔ bɛdole bɛmanle Sɔlɔmɔn.

Edwɛne mɔɔ lumua Raalɛ ne

² O, anrɛɛ wɔavo me nloa anwo! Ɔluakɛ wɔ ɛhulolɛ ne le kpalɛ tɛla nwanye.

³ Wɔ nwole ne mɔɔ ɛkpokpa la bɔ evuanlɛ, Wɔ duma le kɛ nwole mɔɔ bɛlɛwola, yemɔti mbɛlɛra ne mɔ kulo wɔ.

⁴ Fa me bɔ ɛ nwo na maa yɛnriandi yɛhɔ. Belemgbunli ne ɛva me ɛra ye sua kunlu. Yɛ mu nwiɔ yɛ nye balie, yɛbahanvo wɔ ɛhulolɛ fɛlɛko ne yɛadɛla nwanye. Ɔnyɛ ɛzulolɛ kɛ mraalɛ kɔsɔɔti kulo wɔ a.

⁵ Gyɛlusalɛm mraalɛ, mele bile duhuduhu, na me nwo yɛ fɛ, mele duhuduhu kɛ Kidaa ndanlɛ azua, me kɛnlɛma le kɛ Sɔlɔmɔn suakunlu mgbɛnu ndanlɛ.

⁶ Mmafa ɛ nye foa ko ɛnea me kɛ medu a, ɔboalekɛ sɛnzɛne ne a ɛmaa melu a. Me mediema mrenya ne mɔ vale me nwo ɛya, bɛmanle menyɛle gyima wɔ bɛ vanye egyinli ne mɔ anu; mengyakyile medame me vanye egyinli ɛdeɛ ne.

⁷ Me kulovolɛ, ka kile me, nienwu a ɛbava wɔ nyɛmoa wɔahɔ adidi a? Ɔdwu sɛnzɛnegyinla a nienwu a bɛbalie bɛ ɛnwomenle a? Duzu ati a ɔwɔ kɛ mekpɔsa mekpondɛ wɔ wɔ ɛ gɔnwo mɔ nyɛmoa avinli a?

Nrenya ne

⁸ Wɔmɔ mɔɔ ɛ nwo yɛ fɛ tɛla mraalɛ kɔsɔɔti, ɛnze ɛleka ne ɔ? Dua nyɛmoa ne mɔ agyakɛ abo zo ne, na maa wɔ mbɔnkye ne mɔ ɛdidi mboaneneavolɛma ndanlɛ azua ne mɔ anwo.

⁹ Me kulovolɛ, mefa wɔ meto Yigyibiti belemgbunli ɛkpɔnwɔ belɛ mɔɔ twe ye ehwili ne mɔ la anwo.

¹⁰ Ɛ nzo tɛba nu nee anwoneɛ le kɛnlɛma, ɛ kɔme nee ndweabane kɛnlɛma bɛnga.

¹¹ Yɛbayɛ ezukoa nvutuke anwoneɛ yɛamaa wɔ, yɛava dwɛtɛ fufule yɛaduodua nu.

Raalɛ ne

¹² Mekɛ mɔɔ belemgbunli ne la ye ebia ne anu la, me nwo anatele ne evuanlɛ yile sua ne tɛkɛɛ.

¹³ Me kulovolɛ ne le kɛ alufuanlɛ kodoku mɔɔ la me kanra anu la.

¹⁴ Me kulovolɛ ne le kɛ “hɛna” ndotolo siakɛ mɔɔ kpakye Ɛngidae vanye egyinli ne mɔ anu la.

Nrenya ne

¹⁵ Nea, ɛ nwo yɛ fɛ, me kulovolɛ; nea, ɛ nwo yɛ fɛ; ɛ nye ma le kɛ abubule nye.

Raalɛ ne

¹⁶ Nea, ɛ nwo yɛ fɛ kpole, me kulovolɛ; nɔhalɛ nu, ɛmaa me nye die kpole! Yɛ ɛkpa mɔɔ yɛda zo la le asuomenle.

¹⁷ Yɛ sua ne aakɔ ne mɔ le sida mbaka, yɛɛ sepelɛse mbaka a yɛva yɛzɛ ɔ nye a.