Sɛlɛ 8 - BAEBOLO ANZƐƐ BULUKU NWUANZANWUANZA

Aalɔn nee ɔ mra ne mɔ sɛlɛvolɛ ɛwulalɛ

¹ Ɛdɛnkɛma zele Mosisi kɛ,

² “Fa Aalɔn nee ɔ mra ne mɔ, adɛladeɛ ne mɔ nee ɛkpokpalɛ nwole ne mɔɔ bɛfa bɛtu sonla bɛmaa Nyamenle la, ɛnlankɛ nyinli mɔɔ bɛfa bɛayɛ ɛtane azubɔdeɛ, mboane nyinli nwiɔ ne, yɛɛ akee kpanwo mɔɔ mgbɔvonle ɛnle nu la kɛndɛne ko ne.

³ Boɔboa menli ne kɔsɔɔti anloa wɔ Ɛdɛnkɛma Ndanlɛ Sua ne anlenkɛ ne anloa.”

⁴ Mosisi yɛle mɔɔ Ɛdɛnkɛma zele ye la, na menli ne amuala rayiale Ɛdɛnkɛma Ndanlɛ Sua ne anlenkɛ ne anloa.

⁵ Na Mosisi hanle hilele menli ne kɛ, “Debie mɔɔ Ɛdɛnkɛma ɛze me kɛ menyɛ la ɛne.”

⁶ Akee Mosisi vale Aalɔn nee ɔ mra ne mɔ rale, na ɔvale nzule ɔbiale bɛ.

⁷ Ɔvale Sɛlɛvolɛ Kpanyinli tɛladeɛ ɔwulale Aalɔn, na ɔvale tabule ne ɔhyele zo, ɔvale tɛladeɛ aguzo ne ɔkpolole ye, ɔvale yifɔdo ne ɔwulale ye na ɔvale ye akyeso ne mɔɔ bɛnwo ye kɛnlɛma bie la ɔhyele zolɛ.

⁸ Akee ɔvale akɛnrazo aguzo ne ɔwulale ye na ɔvale “Yulem” ne nee “Tɛmem” ne ɔguale nu.

⁹ Akee ɔvale ɛdanlɛ abɔtile ne ɔbɔle ye na ɔvale ezukoa nvutuke ɔbɔle abɔtile ne anyunlu, kɛmɔ Ɛdɛnkɛma zele Mosisi la, ɔle belemgbunli kyɛlɛ mɔɔ anwo te a.

¹⁰ Akee Mosisi vale ɛkpokpalɛ nwole ne na ɔvale bie ɔguale Ɛdɛnkɛma Ndanlɛ Sua ne azo, nee debie biala mɔɔ wɔ sua ne anu la azo, ɔdule bɛ muala ɔmanle Nyamenle.

¹¹ Ɔvale bie ɔkpondenle azukponle ne anwo fane nsuu, ɔvale bie ɔkpondenle ahyɛnze nee ninyɛne mɔɔ bɛfa bɛyɛ gyima wɔ azukponle ne azo la anwo ɔdule bɛ ɔmanle Nyamenle.

¹² Ɔwolale bie ɔguale Aalɔn ati zo, na ɔdule ye ɔmanle Nyamenle.

¹³ Mosisi vale Aalɔn amra mrenya ne mɔ rale, ɔwulale bɛ sɛlɛvolɛ adɛladeɛ, ɔvale ndabule ne mɔ ɔhyehyele zo na ɔzoale bɛ ahyɛlɛ, kɛmɔ Ɛdɛnkɛma zele la.

¹⁴ Akee ɔvale ɛnlankɛ nyinli ɛtane azubɔdeɛ ne ɔrale, na Aalɔn nee ɔ mra ne mɔ vale bɛ sa guale ɛnlankɛ ne ati zo.

¹⁵ Mosisi hunle ye na ɔvale mogya ne, ɔvale ɔ sa. ɛrɛlɛsɛka ɔbɔle nu na ɔvale ɔpepenle azukponle ne abati kpokpɔkoo ne mɔ mɔɔ gyigyi zolɛ la azo ɔyiale, ɔvale ɔnluanle azukponle ne, na akee ɔwolale mogya ne mɔɔ hale la ɔguale azukponle ne abo ne anwo, ɔdule ɔmanle Nyamenle ɔyɛle mgbɔdalɛ nzɛlɛlɛ ɔmanle ye.

¹⁶ Akee Mosisi yeyele azubɔdeɛ ne akunlu ɛnlome ne, ye ɛzizira nwiɔ ne nee ye ɛbolɛ ne nee nwolɛ ninyɛne ne amuala, na ɔyelale bɛ wɔ azukponle ne azo.

¹⁷ Na ɛnlankɛ ne nane ne, ye nwoma ne nee ɔ kunlu ninyɛne ne mɔ amuala, Mosisi yelale bɛ wɔ azokoɛleɛ ne kandiba, kɛmɔ Ɛdɛnkɛma zele la.

¹⁸ Akee Mosisi vale boane nyinli ɛyelalɛ azubɔdeɛ ne rale, na Aalɔn nee ɔ mra ne mɔ vale bɛ sa guale ɔ ti zo.

¹⁹ Mosisi hunle boane ne na ɔdole ye mogya ne ɔguale azukponle ne anwo amuala ɔyiale.

²⁰ Bɛbiale boane ne bɛwiele la, Mosisi yelale boane ne ati ne nee nane azinli ne mɔɔ bɛpepɛ la nee ɔ kunlu ɛnlome ne.

²¹ Akee bɛvale nzule bɛnrinzinle nane ne ndwɛlɛ ne nee ɔ kunlu ninyɛne ne mɔ anwo na Mosisi yelale boane mumua ne amuala wɔ azukponle ne azo, kɛ ɛyelalɛ azubɔdeɛ. Ɔbɔ evuanlɛ, na ɔle azu mɔɔ bɛfa senle bɛbɔ bɛmaa Ɛdɛnkɛma, kɛmɔ Ɛdɛnkɛma zele Mosisi la.

²² Akee Mosisi vale boane nyinli ko ne, mɔɔ le sɛlɛvolɛwulalɛ boane ne rale, na Aalɔn nee ɔ mra ne mɔ vale bɛ sa guale boane nyinli ne ati zo.

²³ Mosisi hunle boane ne na ɔvale ye mogya ne bie ɔhanle Aalɔn anzo fema ne ati, ɔ sa fema kokotile yɛɛ ɔ gyakɛ fema kokotile ne mɔ azo.

²⁴ Akee bɛvale Aalɔn amra ne mɔ bɛrale, na Mosisi vale mogya ne bie hanle bɛ nzo fema ne mɔ ati, bɛ sa nee bɛ gyakɛ fema ahohotile ne mɔ azo na akee ɔdole mogya ne ɔguale azukponle ne anwo amuala ɔyiale.

²⁵ Akee Mosisi vale nane ɛnlome ne, ɔ dua dɔlera ne, ɛnlome ne mɔɔ wɔ ɔ kunlu ninyɛne ne mɔ anwo la, ye ɛbolɛ nwo ninyɛne, ye ɛzizira nwiɔ ne nee nwolɛ ɛnlome ne, yɛɛ nane ne ɛzɔlɛ fema ne.

²⁶ Akee Mosisi yele angye kpanwo tɛtɛlɛ ko, angye belɛde mɔɔ nwole wɔ nu la ko, yɛɛ kpanwo ɛdɛbaa kulukulu ko, wɔ angye kpanwo kɛndɛne ko ne mɔɔ gyi Ɛdɛnkɛma anyunlu ɛkɛ la anu na ɔvale ɔguale nane ɛnlome ne nee ɛzɔlɛ fema ne azo,

²⁷ na ɔvale ɔwulale Aalɔn nee ɔ mra ne mɔ asa anu, na ɔdole ninyɛne ne mɔ ehono, kɛ ɔle ehono azubɔdeɛ ɔmaa Ɛdɛnkɛma.

²⁸ Akee Mosisi liele ninyɛne ne bɛ sa nu na ɔvale ɔbokale ɛyelalɛ azubɔdeɛ ne ɔyelale bɛ muala wɔ azukponle ne azo, kɛ sɛlɛvolɛwulalɛ azubɔdeɛ mɔɔ bɛfa senle bɛbɔ ye azu evuanlɛ bɛmaa Ɛdɛnkɛma.

²⁹ Na Mosisi vale azubɔdeɛ ne akɛnra azo ne dole ye ehono kɛ ɔle ehono azubɔdeɛ ɔmaa Ɛdɛnkɛma; Mosisi afoa nu ɛdeɛ mɔɔ wɔ azubɔlɛ boane ne anu la a le ɛhye, kɛmɔ Ɛdɛnkɛma zele la.

³⁰ Akee Mosisi vale nwole ne na ɔvale mogya ne mɔɔ wɔ azukponle ne azo la bie ɔkpotole nuhua na ɔvale ɔkpondenle Aalɔn anwo nee ye adɛladeɛ ne mɔ anu. Ɔvale bie ɔkpondenle ɔ mra ne mɔ anwo na ɔvale bie ɔkpondenle bɛ adɛladeɛ ne mɔ anu. Yemɔti ɔbɔle Aalɔn nee ye adɛladeɛ yɛɛ ɔ mra mrenya ne mɔ nee bɛ adɛladeɛ ne mɔ nu ɔdule bɛ ɔmanle Nyamenle.

³¹ Na Mosisi zele Aalɔn nee ɔ mra ne mɔ kɛ, “Bɛdo nane ne wɔ Ɛdɛnkɛma Ndanlɛ Sua ye anuhɔlɛ lɔ, na bɛli bɛboka kpanwo ne mɔɔ wɔ kɛndɛne ne mɔɔ sɛlɛvolɛwulalɛ azubɔlɛ ninyɛne ne mɔ wɔ nu la, kɛmɔ menzele bɛ la kɛ, ‘Aalɔn nee ɔ mra ne mɔ a bali a.’

³² Nane ne nee kpanwo ne mɔ mɔɔ kɛha la bɛyela bɛ.

³³ Bɛmmabɔ bɛtɛla Ɛdɛnkɛma Ndanlɛ Sua ye anuhɔlɛ ne dedee kenle nsuu, kɔkpula mekɛ ne mɔɔ bɛfa bɛadu bɛ bɛamaa Nyamenle la kɛwie la, ɔluakɛ bɛfa kenle nsuu a bɛadu bɛ bɛamaa Nyamenle a.

³⁴ Kɛmɔ yɛyɛ ye ɛnɛ la, zɔhane ala yɛɛ Ɛdɛnkɛma ɛhyehyɛ kɛ bɛyɛ mgbɔdalɛ nzɛlɛlɛ bɛmaa bɛ a.

³⁵ Bɛdɛnla Ɛdɛnkɛma Ndanlɛ Sua ne anuhɔlɛ ne nɔɔzo nee ewiazo kenle nsuu, bɛyɛ mɔɔ Ɛdɛnkɛma ɛze bɛ la, anrɛɛ bɛkɛwu, ɔluakɛ zɔhane ala yɛɛ Ɛdɛnkɛma ɛze me a.”

³⁶ Na Aalɔn nee ɔ mra ne mɔ yɛle ninyɛne mɔɔ Ɛdɛnkɛma luale Mosisi anwo zo zele bɛ la kɔsɔɔti.