Sɛlɛ 6 - BAEBOLO ANZƐƐ BULUKU NWUANZANWUANZA

¹ Ɛdɛnkɛma zele Mosisi kɛ,

² “Saa awie yɛ ɛtane na ɔbu ɔ nye ɔgua ye diedi gyima zo ɔtia Ɛdɛnkɛma na ɔbɛlɛbɛla ɔ diema wɔ agyinlanulilɛ anzɛɛ awobazielɛ nwo, anzɛɛ ɔwua ye, anzɛɛ ɔsisi ɔ diema,

³ anzɛɛ yenwu debie mɔɔ ɛminli la na ɔkeda zolɛ ɔbɔ adalɛ, ɔka nwolɛ ndane, wɔ debie biala mɔɔ menli yɛ nwolɛ ɛtane la anu,

⁴ saa awie yɛ ɛtane na ɔdi nwolɛ fɔlɛ a, ɔwɔ kɛ ɔfa deɛ ne mɔɔ ɔwuale la bie, anzɛɛ ɔsisile awie ɔvale, anzɛɛ deɛ ne mɔɔ bɛvale bɛwulale ye lɔ awoba, anzɛɛ asedeɛ ne mɔɔ ɔvale la bie ɔsie ɔ bo zo.

⁵ Anzɛɛ debie biala mɔɔ yeha nwolɛ ndane adalɛ nu la, ɔwɔ kɛ ɔsie ɔ bo zo na ɔfa deɛ holɛ ko ne ngyɛnu nnu ɛkpɔ ko ɔboka nwolɛ ɔmaa ahenle ne mɔɔ deɛ ne le ye ɛdeɛ la, wɔ kenle ko ne mɔɔ ɔfa ye fɔlɛlilɛ azubɔdeɛ ne yeahɔ la.

⁶ Akee ɔwɔ kɛ ɔfa boane nyinli mɔɔ anwo ɛnlɛ dɛne, na wɔnlea wɔpɛ ye bolɛ la ɔyɛ fɔlɛlilɛ azubɔdeɛ ɔbɛlɛ Ɛdɛnkɛma.

⁷ Sɛlɛvolɛ ne bayɛ nzɛlɛlɛ ali ɔ ti mgbɔdalɛ wɔ Ɛdɛnkɛma ɛkɛ, na bɛkɛva debie biala mɔɔ sonla yɛ a ɔdi fɔlɛ la bɛkɛhyɛ ye.”

Nane mumua ɛyelalɛ azubɔlɛ

⁸ Ɛdɛnkɛma zele Mosisi kɛ,

⁹ “Ka kile Aalɔn nee ɔ mra ne mɔ kɛ: Mɛla mɔɔ wɔ ɛyelalɛ azubɔdeɛ nwo la ɛne. Ɔwɔ kɛ ɛyelalɛ azubɔdeɛ ne da azukponle ne azo anyevinle ne nɔe ne toonwo alehyenlɛ, yɛɛ ɔwɔ kɛ azukponle ne azo senle ne sɔ bɔ ye.

¹⁰ Sɛlɛvolɛ ne bawula ye lenen tɛladeɛ tendenle ne nee ye lenen nika ne, na yeavula ɛyelalɛ azubɔdeɛ ne nzonle ne mɔɔ wɔ azukponle ne abo la yeazie azukponle ne foa ko.

¹¹ Akee ɔbakpa ye adɛladeɛ ne mɔ yeagua, yeava adɛladeɛ gyɛne yeawula, na yeava nzonle ne yeahɔ azokoɛleɛ ne kandiba ɛleka mɔɔ le bɔkɔbɔkɔ la.

¹² Ɔwɔ kɛ senle ne mɔɔ wɔ azukponle ne azo la boa nuhua dahuu. Ɔnle kɛ ɔnu. Ɔwɔ kɛ sɛlɛvolɛ ne fa ɛyɛne wula nu nwonlomɔ biala na ɔsiezie ɛyelalɛ azubɔdeɛ ne boɛ wɔ zolɛ, na ɔyela anzonudwolɛ azubɔdeɛ ɛnlome ne.

¹³ Ɔwɔ kɛ senle ne mɔɔ wɔ azukponle ne azo la boa nuhua mekɛ biala; ɔnle kɛ ɔnu.

Ma azubɔdeɛ ne mɔ

¹⁴ “Mɛla mɔɔ wɔ ma azubɔdeɛ nwo noko la ɛne. Aalɔn amra ne mɔ bava azubɔdeɛ ne amaa Ɛdɛnkɛma wɔ azukponle ne anyunlu ɛkɛ.

¹⁵ Bɛ nuhua ko bavula ma azubɔdeɛ ne mɔɔ bɛdi bɛyɛ ye esamo na nwole nee ɛyɛlɛ evuanlɛ wɔ nu la ɔ sa ko, na yeayela ye wɔ azukponle ne azo. Ye evuanlɛ sɔ Ɛdɛnkɛma anye.

¹⁶ Aalɔn nee ɔ mra mrenya ne mɔ bali mɔɔ kɛha la. Ɔnle kɛ bɛfa mgbɔvonle bɛwula nu na bɛali, yɛɛ ɔwɔ kɛ bɛdi ye ɛleka mɔɔ te la. Ɛdɛnkɛma Ndanlɛ Sua ne alie ne anwo a ɔwɔ kɛ bɛdi zɔhane aleɛ ne a.

¹⁷ Ɔnle kɛ bɛfa mgbɔvonle bɛwula nuhua na bɛado. Meva memaa bɛ kɛ ɛyelalɛ azubɔdeɛ mɔɔ le nwuanzanwuanza kpalɛ kpalɛ, kɛ ɛtane azubɔdeɛ nee fɔlɛlilɛ azubɔdeɛ la.

¹⁸ Aalɔn abo zo amra mrenya biala kola di bie. Meyɛ ɛhye mɛla mɔɔ wɔ ɛkɛ ne dahuu, wɔ awolɛndoazo biala anu na ɔfane ɛyelalɛ azubɔdeɛ mɔɔ bɛva bɛrɛlɛ Ɛdɛnkɛma la anwo. Awie biala mɔɔ anwo kɛha bie la anwo kɛde saanwu.”

¹⁹ Ɛdɛnkɛma zele Mosisi kɛ,

²⁰ “Azubɔdeɛ mɔɔ ɔwɔ kɛ Aalɔn nee ɔ mra mrenya ne mɔ fa bɛlɛ Ɛdɛnkɛma wɔ kenle mɔɔ bɛkɛkpokpa ye nwole kɛ ɔle sɛlɛvolɛ la ɛne. Ɔwɔ kɛ ɔfa esamo kilo ko ɔyɛ ma azubɔdeɛ dahuu biala. Ɔbava foa ko nwonlomɔ na yeava foa ko ne nɔsolɛ.

²¹ Ɔwɔ kɛ bɛfa nwole bɛfɔtɔ na bɛdoa ye wɔ bulalɛ ɛyɛba fulonvule nu. Ɔwɔ kɛ bɛfɔtɔ ye kpalɛ na bɛbɔ ye ngyikyi ngyikyi bɛdoa kɛ ma azubɔdeɛ mɔɔ ye evuanlɛ sɔ Ɛdɛnkɛma anye la bɛbɛlɛ ye.

²² Sɛlɛvolɛ ne mɔɔ bɛbaye ye wɔ Aalɔn amra mrenya ne mɔ anu bɛamaa yeali ye agya la babɔ zɔhane azu ne amaa Ɛdɛnkɛma, kɛmɔ meyɛ ye mɛla na ɔla ɛkɛ ne dahuu la. Ɔwɔ kɛ bɛyela bɛ muala.

²³ Ɔwɔ kɛ bɛyela sɛlɛvolɛ biala ma azubɔdeɛ. Ɔnle kɛ bɛdi.”

Ɛtane azubɔdeɛ ne mɔ

²⁴ Ɛdɛnkɛma zele Mosisi kɛ,

²⁵ “Ka kile Aalɔn nee ɔ mra ne mɔ kɛ, mɛla mɔɔ wɔ ɛtane azubɔdeɛ nwo la ɛne: Ɛleka mɔɔ bɛku ɛyelalɛ azubɔdeɛ ne la, ɛkɛ ne ala yɛɛ ɔwɔ kɛ bɛku ɛtane azubɔdeɛ ne a, wɔ Ɛdɛnkɛma anyunlu. Ɔle nwuanzanwuanza kpalɛ kpalɛ.

²⁶ Sɛlɛvolɛ ne mɔɔ kɛbɔ ɛtane azu ne la ɔwɔ kɛ di ye wɔ ɛleka mɔɔ te la, wɔ Ɛdɛnkɛma Ndanlɛ Sua ne alie ne anwo.

²⁷ Debie biala mɔɔ anwo kɛha azubɔdeɛ ne nane ne bie la anwo bade nwuanzaanwu. Saa bɛkponde ye mogya ne bie wɔ tɛladeɛ nu a, ɔwɔ kɛ bɛkpo tɛladeɛ ne mɔɔ bɛkponde ye nu la wɔ ɛleka mɔɔ te la.

²⁸ Siase ne mɔɔ bɛkɛdo ye nu la, ɔwɔ kɛ bɛbɔ ye. Na saa bɛto ye wɔ kɔbele siase nu a, ɔwɔ kɛ bɛtwi nu na bɛfa nzule bɛnrinzi nu.

²⁹ Nrenya biala mɔɔ wɔ sɛlɛvolɛma ne anu la kola di bie Ɔle nwuanzanwuanza kpalɛ kpalɛ.

³⁰ Noko ɔnle kɛ bɛdi ɛtane azubɔdeɛ biala mɔɔ bɛkɛva ye mogya ne bie bɛkɛhɔ Ɛdɛnkɛma Ndanlɛ Sua ne anu kɛ bɛkazɛlɛ mgbɔdalɛ wɔ ɛleka nwuanzanwuanza ne la bie. Ɔwɔ kɛ bɛyela ye.