Sɛlɛ 5 - BAEBOLO ANZƐƐ BULUKU NWUANZANWUANZA

Ɛtaneyɛlɛ mɔɔ hyia ɛtane azubɔdeɛ la

¹ “Saa awie yɛ ɛtane mɔɔ kile kɛ bɛvɛlɛ ye kɛ ɔrali daselɛ wɔ mɔɔ ɔnwunle ye nee mɔɔ ɔdele wɔ edwɛkɛ mɔɔ zile bagua nu na ɔdi nwolɛ daselɛ la anwo, na yeanga a, ɔdaye ɔ ngome ye ɛtane zo ye.

² “Anzɛɛ saa awie annwu ye na ɔ nwo ka debie mɔɔ anwo ɛnde la, saa nane bie funli o, saa ɛnlankɛ funli o, saa ngɛkɛba mɔɔ tu la bie funli o, na saa nzinlii ɔnwu ye a, ɔdi fɔlɛ; evinli ɛha ye.

³ “Anzɛɛ saa ɔ nwo ka awie mɔɔ anwo ɛnde la, saa duzu debie yɛɛ manle evinli hanle ahenle ne bɔbɔ a, saa ɔnze na nzinlii ɔnwu ye a, ɔdi fɔlɛ.

⁴ “Anzɛɛ saa awie buke ɔ nloa di amonle kɛ ɔdi ɛtane anzɛɛ ɔyɛ boɛ a, amonle ɛtane biala mɔɔ ahenle ne kɛli la, saa ɔnze bɔbɔ na nzinlii ɔnwu ye a, ɔdi ko biala anwo fɔlɛ.

⁵ “Saa awie di fɔlɛ wɔ ɛhye mɔ biala anwo a, ɔwɔ kɛ ɔka ye ɛtane ne mɔɔ yeyɛ la wɔ bagua nu,

⁶ na ɔfa fɔlɛlilɛ azubɔdeɛ ɔbɛlɛ Ɛdɛnkɛma wɔ ɛtane ne mɔɔ yeyɛ la anwo. Ɔwɔ kɛ ɔfa boane ralɛ belɛ anzɛɛ abɔnkye belɛ ɔyɛ ɛtane azubɔdeɛ, na sɛlɛvolɛ ne yɛ nzɛlɛlɛ di ɔ ti mgbɔdalɛ wɔ ye ɛtane ne anwo.

⁷ “Na saa ahenle ne ɛnlɛ bie la ati ɔnrɛhola boane anzɛɛ abɔnkye fa a, ɔwɔ kɛ ɔfa abubule anzɛɛ mɔlɔnoma nwiɔ ɔyɛ fɔlɛlilɛ azubɔdeɛ ɔmaa Ɛdɛnkɛma. Nloma nwiɔ ne ko bayɛ ɛtane azubɔdeɛ na ko ayɛ ɛyelalɛ azubɔdeɛ.

⁸ Ɔwɔ kɛ ɔfa ɔbɛlɛ sɛlɛvolɛ ne na sɛlɛvolɛ ne alumua ava ɛtane azubɔdeɛ ne abɔ azu; ɔbahyiba anloma ne ati yeabu ɔ kɔme noko ɔnrɛde ye ɔnrɛvi zolɛ.

⁹ Akee ɔbava ɛtane azubɔdeɛ ne mogya ne bie yeakponde azukponle ne foa ko, na yeahwi mogya ne mɔɔ kɛha la yeagua azukponle ne abo ne anwo. Ɔle ɛtane azubɔdeɛ.

¹⁰ Akee sɛlɛvolɛ ne bava mɔɔ tɔ zolɛ nwiɔ la abɔ ɛyelalɛ azu, kɛmɔ mɛla ne kile la. Sɛlɛvolɛ ne bayɛ nzɛlɛlɛ ali ɔ ti mgbɔdalɛ amaa ye wɔ ye ɛtane ne mɔɔ yeyɛ la anwo, na bɛkɛva bɛkɛhyɛ ye.

¹¹ “Na saa ahenle ne angola abubule nwiɔ ne anzɛɛ mɔlɔnoma nwiɔ ne fa a, ɛnee ɔwɔ kɛ ɔfa esamo kilo nwiɔ ɔyɛ ɛtane azubɔdeɛ. Ɔnle kɛ ɔfa nwole ɔgua nu anzɛɛ ɔfa ɛyɛlɛ evuanlɛ biala ɔgua zolɛ, ɔluakɛ ɔle ɛtane azubɔdeɛ.

¹² Ɔwɔ kɛ ɔfa ɔbɛlɛ sɛlɛvolɛ ne, na sɛlɛvolɛ ne avula ɔ sa ko, na yeayela ye wɔ azukponle ne azo yeaboka ɛyelalɛ. azubɔdeɛ mɔɔ le Ɛdɛnkɛma ɛdeɛ la anwo. Ɔle ɛtane azubɔdeɛ.

¹³ Akee sɛlɛvolɛ ne bazɛlɛ ɔ ti mgbɔdalɛ amaa ye wɔ ye ɛtane ne mɔɔ yeyɛ la anwo, na bɛbava bɛahyɛ ye. Esamo ne mɔɔ kɛha la le sɛlɛvolɛ ne ɛdeɛ, kɛmɔ ma azubɔdeɛ de la.”

Abozozielɛ azubɔdeɛ ne mɔ

¹⁴ Ɛdɛnkɛma zele Mosisi kɛ,

¹⁵ “Saa awie anye ɛnla nwolɛ na ɔyɛ ɛtane kɛ yebu ɔ nye yegua ye diedi gyima zo, mɔɔ fane Ɛdɛnkɛma ninyɛne nwuanzanwuanza ne mɔ anwo a, ɔwɔ kɛ ɔfa fɔlɛlilɛ azubɔdeɛ ɔbɛlɛ Ɛdɛnkɛma. Ɔwɔ kɛ ɔfa boane nyinli mɔɔ anwo ɛnlɛ dɛne, na ɛdawɔ ɛkɛnlea ɛkɛpɛ ye bolɛ wɔ dwɛtɛ fufule nu, kɛmɔ bɛdi ye wɔ ɛleka nwuanzanwuanza ne la; ɔle fɔlɛlilɛ azubɔdeɛ.

¹⁶ Eza ɔwɔ kɛ ɔsie mɔɔ ɔyɛle a yeanyɛ ye boɛ wɔ ninyɛne nwuanzanwuanza ne mɔ anwo la abo zo, na ɔfa mɔɔ ɔ nee ye rale la ngyɛnu nnu ɛkpɔ ko ɔboka nwolɛ ɔmaa sɛlɛvolɛ ne; na sɛlɛvolɛ ne bava boane azubɔdeɛ ne ayɛ nzɛlɛlɛ ali mgbɔdalɛ amaa ye, na bɛkɛva ye ɛtane bɛkɛhyɛ ye.

¹⁷ “Saa awie anye ɛnla nwolɛ na ɔyɛ ninyɛne mɔɔ Ɛdɛnkɛma ɛze kɛ bɛmmayɛ la bie a, yeyɛ ɛtane, yɛɛ ɔdi fɔlɛ, na ye ɛtane zo ye.

¹⁸ Ɔwɔ kɛ ɔfa boane nyinli mɔɔ anwo ɛnlɛ dɛne, na ɛdawɔ wɔnlea wɔpɛ ye bolɛ mɔɔ nee ɛtane azubɔdeɛ bolɛ sɛ la ɔbɛlɛ sɛlɛvolɛ ne. Na sɛlɛvolɛ ne bayɛ nzɛlɛlɛ ali ɔ ti mgbɔdalɛ amaa ye wɔ ye ɛtane ne mɔɔ ɔ nye ɛnla nwolɛ na yeyɛ la anwo, na bɛkɛva bɛkɛhyɛ ye.

¹⁹ Ɔle fɔlɛlilɛ azubɔdeɛ, ɔluakɛ ɔdi fɔlɛ wɔ Ɛdɛnkɛma anyunlu.”