Sɛlɛ 4 - BAEBOLO ANZƐƐ BULUKU NWUANZANWUANZA

Ɛtaneyɛlɛ mɔɔ ɛnyelɛ ɛnla nwo la anwo azubɔdeɛ ne mɔ

¹ Ɛdɛnkɛma zele Mosisi kɛ,

² “Ka kile Yizilayɛma kɛ, saa awie anye ɛnla nwolɛ na ɔyɛ ɛtane, ɔyɛ ninyɛne mɔɔ Ɛdɛnkɛma ɛze kɛ bɛmmayɛ la bie,

³ na saa ahenle le sɛlɛvolɛ mɔɔ bɛkpokpa ye nwole la yɛɛ ɛyɛ ɛtane ɛva evinli ɛha menli ne a, bɛmaa ɔva ɛnlankɛ nyinli edonraa mɔɔ anwo ɛnlɛ dɛne la ɔyɛ azubɔdeɛ ɔmaa Ɛdɛnkɛma wɔ ye ɛtane ne mɔɔ yeyɛ la anwo.

⁴ Ɔwɔ kɛ ɔfa ɛnlankɛ ne ɔba Ɛdɛnkɛma anyunlu wɔ Ɛdɛnkɛma Ndanlɛ Sua ne anuhɔlɛ ne, ɔfa ɔ sa ɔto ɛnlankɛ ne ati zo, na ɔku ye wɔ Ɛdɛnkɛma anyunlu.

⁵ Sɛlɛvolɛ ne bava ɛnlankɛ ne mogya ne bie ahɔ Ɛdɛnkɛma Ndanlɛ Sua ne anu.

⁶ Akee ɔbava ɔ sa ɛrɛlɛsɛka yeabɔ mogya ne anu na yeakponde ye Ɛdɛnkɛma anyunlu ɛkɛ wɔ mgbɛnu ɛdanlɛ ne mɔɔ wɔ nwuanzanwuanza ɛleka ne la anyunlu fane nsuu.

⁷ Sɛlɛvolɛ ne bava mogya ne bie aha ɛyɛlɛ evuanlɛ ɛyelalɛ azukponle ne mɔɔ wɔ Ɛdɛnkɛma Ndanlɛ Sua ne anu la abati kpokpɔkoo ne mɔ azo, na yeawola mɔɔ kɛha la yeagua ɛyelalɛ azukponle ne mɔɔ wɔ Ɛdɛnkɛma Ndanlɛ Sua ne anuhɔlɛ ne la abo ne anwo.

⁸ Akee ɔbayeye ɛnlankɛ ne akunlu ɛnlome ne amuala, ɛnlome ne mɔɔ wɔ ɔ kunlu ninyɛne ne mɔ anwo la,

⁹ ye ɛzizira nwiɔ ne nee nwolɛ ɛnlome ne mɔɔ wɔ ɔ nze nu la, yɛɛ ye ɛbolɛ nwo ninyɛne ne amuala.

¹⁰ Ɔwɔ kɛ ɔyela ɛhye mɔ amuala wɔ ɛyelalɛ azukponle ne azo, kɛmɔ bɛyela anzonudwolɛ azubɔdeɛ nane ne mɔ ɛdeɛ ne bɛbɔ azu la.

^11-12 Akee ɔbava ɛnlankɛ mumua ne: ye nwoma, ye nane ne, ɔ ti, ye ndwɛlɛ, ɔ kunlu ninyɛne nee ye ebinli ne yeavinde yeahɔ ɛleka bɔkɔbɔkɔ wɔ azokoɛleɛ ne kandiba ɛleka mɔɔ bɛgua nzonle ne la yeahɔgua bɛ ɛyɛne zo yeayela bɛ.

¹³ “Saa Yizilayɛ maanlema kɔsɔɔti andwenle nwolɛ na bɛannwu ye la ati bɛyɛ ɛtane na bɛdi fɔlɛ kɛ bɛyɛ ninyɛne mɔɔ Ɛdɛnkɛma ɛze bɛ kɛ bɛmmayɛ la bie,

¹⁴ na saa bɛmaa bɛnwu bɛ ɛtane ne mɔɔ bɛyɛ la a, bɛ muala bɛbabɔ nu bɛava ɛnlankɛ nyinli edonraa ko bɛayɛ ɛtane azubɔdeɛ na bɛava bɛara Ɛdɛnkɛma Ndanlɛ Sua ne anyunlu.

¹⁵ Mgbanyima mɔɔ wɔ ezuavolɛ ne avinli la bava bɛ sa agua ɛnlankɛ nyinli ne ati zo wɔ Ɛdɛnkɛma anyunlu ɛkɛ, na akee bɛahu ɛnlankɛ ne.

¹⁶ Akee Sɛlɛvolɛ ne bava ɛnlankɛ ne mogya ne bie ahɔ Ndanlɛ Sua ne anu,

¹⁷ na sɛlɛvolɛ ne ava ɔ sa ɛrɛlɛsɛka abɔ mogya ne anu akponde ye wɔ mgbɛnu ɛdanlɛ ne anyunlu wɔ Ɛdɛnkɛma anyunlu fane nsuu.

¹⁸ Sɛlɛvolɛ ne bava mogya ne bie aha azukponle ne mɔɔ gyi Ɛdɛnkɛma Ndanlɛ Sua ne anu la abati kpokpɔkoo ne mɔ azo, na yeawola mɔɔ kɛha la yeagua ɛyelalɛ azukponle ne mɔɔ gyi Ndanlɛ Sua ne anuhɔlɛ ne la abo ne anwo.

¹⁹ Ɔbayeye ɛnlankɛ ne akunlu ɛnlome ne amuala na yeayela ye azukponle ne azo.

²⁰ Kɛ bɛzile bɛyɛle ɛnlankɛ ne mɔɔ bɛvale bɛyɛle ɛtane azubɔdeɛ ne la, zɔhane ala yɛɛ ɔwɔ kɛ bɛyɛ ɛhye noko a. Akee sɛlɛvolɛ ne bayɛ nzɛlɛlɛ ali bɛ ti mgbɔdalɛ, na bɛbava bɛ ɛtane ne mɔ bɛahyɛ bɛ.

²¹ Sɛlɛvolɛ ne bava ɛnlankɛ ne avinde ahɔ azokoɛleɛ ne kandiba na yeayela ye wɔ ɛkɛ, kɛmɔ ɔyelale alumua ɛdeɛ ne la. Ɔle ezuavolɛ ne ɛtane azubɔdeɛ.

²² “Saa maanle kpanyinli bie andwenle nwolɛ na ɔyɛ ɛtane, na ɔdi fɔlɛ kɛ yeyɛ ninyɛne mɔɔ Ɛdɛnkɛma ye Nyamenle ne ɛze kɛ bɛmmayɛ la bie,

²³ na saa bɛmaa ɔnwu ye ɛtane ne mɔɔ yeyɛ la a, ɔwɔ kɛ ɔfa abɔnkye nyinli mɔɔ anwo ɛnlɛ dɛne la ɔba kɛ ɛtane azubɔdeɛ.

²⁴ Akee ɔfa ɔ sa ɔto abɔnkye ne ati zo, na ɔku ye wɔ ɛleka mɔɔ bɛku ɛyelalɛ azubɔdeɛ ne mɔ la wɔ Ɛdɛnkɛma anyunlu Ɔle ɛtane azubɔdeɛ.

²⁵ Akee sɛlɛvolɛ ne ɛva ɔ sa ɛrɛlɛsɛka ɛva ɛtane azubɔdeɛ ne mogya ne bie na ɔva ɔpepe ɛyelalɛ azukponle ne abati kpokpɔkoo ne mɔ azo, na ɔwola mogya ne mɔɔ kɛha la ɔgua ɛyelalɛ azukponle ne abo ne anwo.

²⁶ Ɔbayela nane ne anu ɛnlome ne amuala wɔ azukponle ne azo, kɛmɔ bɛfa anzonudwolɛ azubɔdeɛ bɛabɔ azu a bɛyɛ ye la Yemɔti sɛlɛvolɛ ne bayɛ nzɛlɛlɛ ali ye ɛtane ne anwo mgbɔdalɛ amaa ye, na bɛkɛva ye ɛtane ne bɛkɛhyɛ ye.

²⁷ “Saa koahweabane bie andwenle nwolɛ na ɔyɛ ɛtane, na ɔdi fɔlɛ kɛ yeyɛ ninyɛne mɔɔ Ɛdɛnkɛma ɛze kɛ bɛmmayɛ la bie,

²⁸ na saa bɛmaa ɔnwu ye ɛtane ne mɔɔ yeyɛ la a, ɔwɔ kɛ ɔfa abɔnkye belɛ mɔɔ anwo ɛnlɛ dɛne la ɔbabɔ azu wɔ ye ɛtane ne mɔɔ yeyɛ la anwo.

²⁹ Ɔwɔ kɛ ɔfa ɔ sa ɔto ɛtane azubɔdeɛ ne ati zo na ɔku ye wɔ ɛyelalɛ azubɔdeɛ ɛleka ne.

³⁰ Sɛlɛvolɛ ne bava ɔ sa ɛrɛlɛsɛka ava mogya ne bie apepe ɛyelalɛ azukponle ne abati kpokpɔkoo ne mɔ azo, na yeawola mɔɔ kɛha la yeagua azukponle ne abo ne anwo.

³¹ Ɔbayeye azubɔdeɛ ne akunlu ɛnlome ne amuala, kɛmɔ bɛyɛ anzonudwolɛ azubɔdeɛ la, na akee yeayela ye wɔ azukponle ne azo. Ye evuanlɛ sɔ Ɛdɛnkɛma anye. Sɛlɛvolɛ ne bayɛ nzɛlɛlɛ ali ye ɛtane ne anwo mgbɔdalɛ amaa ye, na bɛkɛva bɛkɛhyɛ ye.

³² “Saa ahenle fa boane ralɛ ara kɛ ɛtane azubɔdeɛ a, ɔwɔ kɛ ɔfa belɛ mɔɔ anwo ɛnlɛ dɛne la.

³³ Ɔwɔ kɛ ɔfa ɔ sa ɔto azubɔdeɛ ne ati zo na ɔku ye wɔ ɛleka mɔɔ bɛku ɛyelalɛ azubɔdeɛ ne mɔ la.

³⁴ Sɛlɛvolɛ ne bava ɔ sa ɛrɛlɛsɛka ava azubɔdeɛ ne mogya ne bie na yeava yeapepe ɛyelalɛ azukponle ne abati kpokpɔkoo ne mɔ azo, na yeawola mɔɔ kɛha la yeagua azukponle ne abo ne anwo.

³⁵ Ɔbayeye azubɔdeɛ ne akunlu ɛnlome ne amuala, kɛmɔ bɛyeye boane ralɛ ne mɔɔ bɛfa bɛyɛ anzonudwolɛ azubɔlɛ azubɔdeɛ ne mɔ ɛdeɛ ne la. Sɛlɛvolɛ ne bayela ye wɔ azukponle ne azo yeaboka azubɔlɛ ninyɛne mɔɔ bɛyela bɛamaa Ɛdɛnkɛma la anwo. Akee sɛlɛvolɛ ne bayɛ nzɛlɛlɛ ali mgbɔdalɛ amaa ahenle ne wɔ ye ɛtane ne mɔɔ yeyɛ la anwo, na bɛkɛva bɛkɛhyɛ ye.