Sɛlɛ 21 - BAEBOLO ANZƐƐ BULUKU NWUANZANWUANZA

Sɛlɛvolɛma nwuanzanwuanzayɛlɛ

¹ Ɛdɛnkɛma zele Mosisi kɛ, “Tendɛ kile Aalɔn amra sɛlɛvolɛma ne na ka kile bɛ kɛ ɔnle kɛ bɛ biala gua ɔ nwo evinli. Saa awie wu a, ɔnle kɛ bɛ biala kɔ funli ne anwo,

² kyesɛ sonla ne mɔɔ ɛwu la bikye ye kpalɛ kpalɛ: ɔ nli, ɔ ze, ɔ ra nrenya anzɛɛ raalɛ, ɔ diema nrenya

³ anzɛɛ ɔ diema raalɛ mɔɔ ɛtɛkɔle agyalɛ na ɔnze nrenya la, yemɔ, ɔkola ɔkɔ nwolɛ.

⁴ Saa ɔle kunli bɔbɔ a ɔnle kɛ ɔgua ɔ nwo evinli wɔ ye menli ne anyunlu.

⁵ “Ɔnle kɛ bɛkpa bɛ ti anzɛɛ bɛ kɛsa, yɛɛ ɔnle kɛ bɛbobɔ ngonlɛ biala.

⁶ Ɔwɔ kɛ bɛmaa bɛ nwo te maa bɛ Nyamenle; ɔnle kɛ bɛgua bɛ Nyamenle ne anwo evinli. Ɔluakɛ bɛmɛ yɛɛ bɛbɔ ɛyelalɛ azu bɛmaa Ɛdɛnkɛma na eza bɛbɔ aleɛ azu bɛmaa bɛ Nyamenle ne a. Yemɔti ɔwɔ kɛ bɛmaa bɛ nwo te.

⁷ Ɔnle kɛ bɛgya raalɛ tuutuunli anzɛɛ raalɛ mɔɔ awie ɛva ye ɛlɛ la. Eza ɔnle kɛ bɛgya raalɛ mɔɔ ɔ hu ɛbɔ ye ewole la, ɔluakɛ sɛlɛvolɛ biala anwo te maa ye Nyamenle ne.

⁸ Ɔwɔ kɛ ɛtu ye ɛsie ahane ɛmaa Nyamenle, ɔluakɛ ɔdaye a ɔfa aleɛ ɔbɔ azu ɔmaa wɔ Nyamenle ne a; ɔwɔ kɛ ɔ nwo te maa wɔ, ɔluakɛ medame, Ɛdɛnkɛma, mɔɔ mete ɛ nwo la, mele nwuanzanwuanza.

⁹ Sɛlɛvolɛ ara raalɛ biala mɔɔ kɛzɛkye ɔ nwo kɛbɔ tuutuu ɛbɛla biala la ɛgua ɔ ze anyunlu aze. Ɔwɔ kɛ bɛto ye senle nu bɛyela ye.

¹⁰ “Sɛlɛvolɛ ne mɔɔ bɛkɛgua nwole ɔ ti zo kɛ yemɔ a ɔle kpanyinli wɔ ɔ mediema ne mɔ anu, na bɛdu ye bɛzie ahane bɛmaa Nyamenle kɛ yemɔ a ɔwɔ kɛ ɔwula Sɛlɛvolɛ Kpanyinli adɛladeɛ ne mɔ la, ɔnle kɛ ɔgyakyi ɔ ti enrinli ɔgua zolɛ mɔɔ ɔntoli a, yɛɛ ɔnle kɛ ɔsuosua ye adɛladeɛ nu ɔkile kɛ ɔlɛdi nyane.

^11-12 Bɛdu ye bɛzie ahane bɛmaa ye Nyamenle ne, yemɔti ɔnle kɛ ɔfi me ndanlɛ sua nwuanzanwuanza ne anu ɔfinde ɔkɔ ɛleka mɔɔ funli wɔ la ɔkɔgua ɔ nwo evinli ɔmaa bie ka ye Nyamenle ne ɛleka nwuanzanwuanza ne. Saa ɔ ze anzɛɛ ɔ nli bɔbɔ a wule a, ɔnle kɛ ɔkɔ ɛkɛ; medame a mele Ɛdɛnkɛma a.

¹³ Ɔwɔ kɛ ɔgya raalɛ mɔɔ ɛnze nrenya la.

¹⁴ Saa ɔkagya raalɛ a ɔnle kɛ ɔgya raalɛ mɔɔ le kunlanvolɛ anzɛɛ ɔ hu ɛbɔ ye ewole, anzɛɛ raalɛ mɔɔ awie ɛva ye ɛlɛ, anzɛɛ tuutuunli. Ɔwɔ kɛ ɔgya ɔdaye ye abusua ekpunli ne anu amra ne mɔ bie mɔɔ ɛnze nrenya fee la.

¹⁵ Saa yeanyɛ ye zɔhane a ɔ mra mɔɔ ɔbawo bɛ la, biala anwo ɛnrɛde, ɔluakɛ medame a mele Ɛdɛnkɛma mɔɔ mete ɔ nwo a.”

¹⁶ Ɛdɛnkɛma zele Mosisi kɛ,

¹⁷ “Ka kile Aalɔn kɛ ɔvi ɛnɛ mɔɔ kɔ la, wɔ bɛ awolɛndoazo ne mɔ amuala anu, ɔ bo zo amra ne anu biala mɔɔ anwo lɛ dɛne la ɛnle kɛ bikye me kɛ ɔfa aleɛ yeabɔ azu yeamaa ye Nyamenle.

¹⁸ Ɔluakɛ awie biala mɔɔ anwo lɛ dɛne la, ɔnle kɛ ɔbikye me; anyenzinliravolɛ anzɛɛ abubura, anzɛɛ sonla mɔɔ anahɛlɛ ɛtete ye, anzɛɛ ye agbɔkɛ ne mɔ bie wale bo zolɛ,

¹⁹ anzɛɛ nrenya mɔɔ agyakɛ anzɛɛ asa ɛbu,

²⁰ awie mɔɔ le afu, anzɛɛ ɔle adwola kɛ motia, anzɛɛ awie mɔɔ anye ɛyɛ na ɔnnwu aze kpalɛ, anzɛɛ mɔɔ senra, nzɔlɔsɔlɔ anzɛɛ fonvoamgbɔde ɛgua ye anzɛɛ bɛza ye,

²¹ na ɔle Sɛlɛvolɛ Aalɔn abo zo amra ne bie la anwo lɛ dɛne. Ɔnle kɛ ɔbikye me kɛ ɔbɔ ɛyelalɛ azu yeamaa Ɛdɛnkɛma Suzuamgba ala mɔɔ ɔ nwo lɛ dɛne la, ɔnle kɛ ɔbikye me kɛ ɔfa aleɛ yeabɔ azu yeamaa ye Nyamenle ne.

²² Ɔkola ɔdi ye Nyamenle ne aleɛ nwuanzanwuanza nee aleɛ nwuanzanwuanza kpalɛ ne bie,

²³ noko ɔnle kɛ ɔbikye mgbɛnu ɛdanlɛ ne anzɛɛ azukponle ne, ɔboalekɛ ɔ nwo lɛ dɛne. Ɔyɛ ye zɔhane a ɛnee yeva evinli yeha ɛleka nwuanzanwuanza ne, ɔluakɛ medame a mele Ɛdɛnkɛma mɔɔ memaa bɛ nwo te a.”

²⁴ Yemɔti Mosisi dendɛle hilele Aalɔn nee ɔ mra mrenya ne mɔ nee Yizilayɛma amuala.