Sɛlɛ 13 - BAEBOLO ANZƐƐ BULUKU NWUANZANWUANZA

Nwonane nu ewule nwo mɛla

¹ Ɛdɛnkɛma zele Mosisi nee Aalɔn kɛ,

² “Saa debie nwu awie, anzɛɛ hanlɛ tu ye anzɛɛ saa nyila bie nwu ye na ɔkakyi kokobɛ wɔ ahenle anwo a, ɔwɔ kɛ bɛfa ye bɛkɔ Aalɔn anzɛɛ ɔ mra sɛlɛvolɛma ne mɔ bie ɛkɛ,

³ bɛmaa sɛlɛvolɛ ne nea ewule ne mɔɔ ɛha ahenle ne la Saa ɔba ye kɛ enrinli ne mɔɔ wɔ ɛleka mɔɔ ewule ne wɔ la ɛyɛ fufule, na ye hanlɛ ne anyunlu ɛyɛ kuma a, ɛnee kokobɛ ɔ; sɛlɛvolɛ ne neɛnlea ye wie a, ɔto duma kɛ ahenle ne anwo ɛnde.

⁴ Na saa ɛleka mɔɔ ewule ne wɔ la le fufule na hanlɛ ne ɛnle kuma, eza enrinli mɔɔ wɔ nu la ɛtɛyɛle fufule a, sɛlɛvolɛ ne bamaa bɛawula sonla ne mɔɔ ewule ne ɛha ye la sua nu kenle nsuu.

⁵ Kenle nsuu ne dwu a, sɛlɛvolɛ ne banleɛnlea ahenle ne anwo bieko; saa sɛlɛvolɛ ne nea na ewule ne anloa ɛha aze na ɔtɛtɛlɛle a, eza ɔbamaa bɛawula ahenle ne sua nu kenle nsuu bieko.

⁶ Kenle nsuu ɛhye noko dwu a, sɛlɛvolɛ ne banleɛnlea wuleravolɛ ne anwo bieko; saa deɛ ne mɔɔ yɛle ahenle la anyunlu ɛbulubulu na ɔtɛtɛlɛle a, sɛlɛvolɛ ne bado duma kɛ ahenle anwo te na debie ala a nwunle ye a. Ahenle ne bakpo ye adɛladeɛ ne mɔ, ɛnee ɔ nwo ɛde.

⁷ Na saa deɛ ne mɔɔ nwunle ahenle la tɛlɛ nzinlii, wɔ mekɛ mɔɔ ɔvale ɔ nwo ɔhilele sɛlɛvolɛ ne la anzi a, eza ɔwɔ kɛ ɔfa ɔ nwo ɔkɔkile sɛlɛvolɛ ne bieko.

⁸ Sɛlɛvolɛ ne banleɛnlea ɔ nwo bieko na saa deɛ ne mɔɔ ɛyɛ ye la ɛdɛlɛ a, sɛlɛvolɛ ne bado duma kɛ ahenle ne anwo ɛnde; kokobɛ ɛdila ye.

⁹ “Kokobɛ tila awie a, ɔwɔ kɛ bɛfa ahenle ne bɛkɔ sɛlɛvolɛ ne ɛkɛ.

¹⁰ Sɛlɛvolɛ ne banleɛnlea ahenle anwo kpalɛ, na saa debie fufule bie ɛnwu ahenle anwo, ɛmaa ye enrinli ne ɛyɛ fufule, na hanlɛ ne kpolo nzule a,

¹¹ ɛnee ɔle kokobɛ kokolabi wɔ ahenle anwo. Sɛlɛvolɛ ne bado duma kɛ ahenle ne anwo ɛnde. Ɔngyia kɛ ɔkɛmaa bɛkɛwula ahenle sua nu, ɔluakɛ ɔ nwo ɛnde.

¹² Na saa kokobɛ ne mɔɔ ɛdila ahenle la ɛkponde ɔ nwo, ɛmaa ewule ne ɛgua ye, ɛbɔ ye ɔ ti zo toonwo yedwu ɔ gyakɛ taboa ne anwo, mɔɔ sɛlɛvolɛ ne kola nwu ye la a,

¹³ sɛlɛvolɛ ne banleɛnlea nu kpalɛ. Saa ɔba ye kɛ ewule ne ɛva ɔ nwo amuala a, sɛlɛvolɛ ne bado duma kɛ ahenle ne anwo te wɔ ewule ne anwo, ɔluakɛ ɔ muala ɛyɛ fufule; ɔ nwo te.

¹⁴ Na saa hanlɛ mɔɔ kpolo nzule la bie wɔ ahenle ne ɛleka bie a, ɛnee ɔ nwo ɛnde.

¹⁵ Sɛlɛvolɛ ne banlea hanlɛ ne mɔɔ kpolo nzule la na yeado duma kɛ ahenle anwo ɛnde. Hanlɛ mɔɔ kpolo nzule la ɛnle debie kpalɛ, ɔle kokobɛ.

¹⁶ Na saa hanlɛ ne mɔɔ kpolo nzule la anyunlu to na ɔyɛ fufule a, ɛnee ɔwɔ kɛ ahenle kɔ sɛlɛvolɛ ne ɛkɛ.

¹⁷ Sɛlɛvolɛ ne banleɛnlea ahenle ne anwo, na saa ewule ne anyunlu ɛyɛ fufule a, sɛlɛvolɛ ne bado duma kɛ ahenle anwo te; ɔ nwo te bɔkɔɔ.

¹⁸ “Saa nyila nwu awie na ye hanlɛ ne kɔ,

¹⁹ na saa debie fufule nwu ɔ bo zo ne anzɛɛ hanlɛ anyunlu kɔkɔlɛ nee fufule tu ɔ bo zo ne a, bɛva bɛhɔhile sɛlɛvolɛ ne.

²⁰ Sɛlɛvolɛ ne banleɛnlea ahenle ne hanlɛ ne kpalɛ, na saa hanlɛ ne ɛyɛ kuma na enrinli mɔɔ wɔ nu la ɛyɛ fufule a, sɛlɛvolɛ ne bado duma kɛ ahenle ne anwo ɛnde; kokobɛ ɛdila ye na yevinde hanlɛ ne anu.

²¹ Na saa sɛlɛvolɛ ne neɛnlea ye na ɔnwu kɛ enrinli mɔɔ gyigyi nu la ɛnle fufule yɛɛ hanlɛ ne ɛnle kuma, na eza ɔ nyunlu ɛbulubulu a, sɛlɛvolɛ ne bamaa bɛawula ye sua nu kenle nsuu.

²² Saa hanlɛ ne tɛlɛ a, sɛlɛvolɛ ne bado duma kɛ ɔ nwo ɛnde; ewule ɛha ye.

²³ Na saa hanlɛ ne andɛlɛ a, ɛnee deɛ ne mɔɔ nwunle ye la abo zo hanlɛ ɔ. Sɛlɛvolɛ ne bado duma kɛ ɔ nwo te.

²⁴ “Saa awie yelɛyela na ye ɛyelalɛ nganlɛ ne mɔ mɔɔ ɛlɛtwi nzule la anyunlu yɛ fufule anzɛɛ kɔkɔlɛ nee fufule a,

²⁵ sɛlɛvolɛ ne ɛnleɛnlea ye. Saa enrinli ne mɔ mɔɔ wɔ nganlɛ ne anu la ɛyɛ fufule na hanlɛ ne anyunlu le kuma a, ɛnee kokobɛ ɔ; ɛyelalɛ hanlɛ ne a ɛhakyi a. Na sɛlɛvolɛ ne bado duma kɛ ahenle anwo ɛnde; ɔle ewule kokobɛ.

²⁶ Na saa sɛlɛvolɛ ne neɛnlea ye na ɔnwu kɛ enrinli ne mɔ ɛtɛyɛle fufule, nganlɛ ne mɔ anyunlu ɛnle kuma na bɛ nyunlu ɛbulubulu a, sɛlɛvolɛ ne bamaa bɛawula ye sua nu kenle nsuu.

²⁷ Kenle nsuu ne dwu a, sɛlɛvolɛ ne eza banleɛnlea ye bieko. Saa nganlɛ ne mɔ ɛlɛtɛlɛdɛlɛ a, sɛlɛvolɛ ne bado duma kɛ ahenle anwo ɛnde; kokobɛ ɛdila ye.

²⁸ Na saa nganlɛ ne mɔ andɛlɛdɛlɛ na bɛ nyunlu ɛbulubulu a, ɛnee ɛyelalɛ nganlɛ ne mɔ yɛɛ ɛnwunwu a. Sɛlɛvolɛ ne bado duma kɛ ahenle anwo te, ɔluakɛ ɛnee ɛyelalɛ nganlɛ ne mɔ ahapenle ɔ.

²⁹ “Saa nrenya anzɛɛ raalɛ nyia ewule wɔ ɔ ti zo anzɛɛ ɔ kɛsa anu a,

³⁰ sɛlɛvolɛ ne banleɛnlea ewule ne, na saa ye nganlɛ ne mɔ anyunlu le kuma na enrinli mɔɔ gyigyi nu la le akɔlɛnlome, na bɛle ndenrɛndenra a, sɛlɛvolɛ ne bado duma kɛ ahenle anwo ɛnde. Azenra ɛdila ye, na ɔle ewule kokobɛ mɔɔ ɛdila ɔ ti anzɛɛ ɔ kɛsa a.

³¹ Na saa sɛlɛvolɛ ne neɛnlea ewule ne na nganlɛ ne mɔ anyunlu ɛnle kuma na enrinli bile ɛngyigyi nu a, sɛlɛvolɛ ne bamaa bɛawula ahenle mɔɔ azenra ne ɛdila ye la sua nu kenle nsuu.

³² Kenle nsuu ne azo sɛlɛvolɛ ne eza banleɛnlea ewule ne na saa azenra ne mɔ ɛtɛtɛlɛdɛlɛle, na enrinli mɔɔ gyigyi nu la ɛtɛyɛle akɔlɛnlome, na azenra ne mɔ anyunlu ɛnle kuma a,

³³ sɛlɛvolɛ ne bamaa ahenle akpa ɔ ti na bɛawula ye sua nu kenle nsuu bieko; ɛleka mɔɔ azenra ne mɔ bie wɔ la, bɛnrɛkpa ɛkɛ ne enrinli ne.

³⁴ Kenle nsuu ne dwu a, sɛlɛvolɛ ne banleɛnlea azenra ne mɔ, na saa azenra ne mɔ ɛtɛtɛlɛdɛlɛle na bɛ nyunlu ɛnle kuma a, ɔbado duma kɛ ahenle ne anwo te. Ɔbakpo ye adɛladeɛ ne mɔ ala, ɛnee ɔ nwo ɛde.

³⁵ Na saa azenra ne mɔ tɛlɛdɛlɛ mekɛ mɔɔ ɛnee yenlua ɔ nwo yewie la a,

³⁶ sɛlɛvolɛ ne banleɛnlea ye, na saa azenra ne mɔ ɛdɛlɛdɛlɛ a, ɛnee ɔngyia kɛ sɛlɛvolɛ ne kɛkpondɛ kɛnwu kɛ enrinli akɔlɛnlome gyi nu; ahenle anwo ɛnde.

³⁷ Na saa ɔdaye ɔnea na azenra ne mɔ anyunlu ɛnwosonwoso, na enrinli bile ɛfifi zolɛ a, ɛnee azenra ne mɔ ɛhɔ, ahenle anwo te. Yemɔti sɛlɛvolɛ ne bado duma kɛ ahenle anwo te.

³⁸ “Saa debie fufule pepe raalɛ anzɛɛ nrenya nwo a,

³⁹ sɛlɛvolɛ ne banleɛnlea deɛ zɔhane na saa deɛ ne mɔɔ ɛpepe ahenle anwo la ɛnle fufule nwohyee kpalɛ a, ɛnee ahenle anwo yɛɛ ɛnyia dɛne a, na ɔ nwo te.

⁴⁰ “Saa nrenya bie ati avinli enrinli tu a, ɛnee ɔ ti zo a ɛdu a na ɔ nwo te.

⁴¹ Saa ɔ nwoma azo enrinli ne tudu kɔ a, ɛnee ɔ nwoma azo a ɛdu a na ɔ nwo te.

⁴² Na saa ewule kɔkɔlɛ nee fufule bie finde ɛleka mɔɔ ɛdu la a, ɔ ti avinli o, ɔ nwoma azo o, ɛnee kokobɛ yɛɛ ɛlɛfinde ahenle ati zo anzɛɛ ɔ nwoma azo a.

⁴³ Sɛlɛvolɛ ne banleɛnlea, na saa ewule ne mɔɔ ɛvinde ɔ ti zo ɛleka mɔɔ ɛdu anzɛɛ ɔ nwoma azo ɛleka mɔɔ ɛdu la le kɔkɔlɛ nee fufule kɛ asɛɛ kokobɛ ɛlɛfinde ɔ nwo la a,

⁴⁴ ɛnee ɔle kokobɛvolɛ; ɔ nwo ɛnde. Ɔwɔ kɛ sɛlɛvolɛ ne to duma kɛ ɔ nwo ɛnde, ye ewule ne wɔ ɔ ti zo.

⁴⁵ “Awie mɔɔ kokobɛ kɛdila ye la, ɔwɔ kɛ ɔwula adɛladeɛ mɔɔ ɛtete la na ɔgyakyi ɔ ti enrinli ne ɔgua zolɛ, mɔɔ ɔntoli nu a. Ɔwɔ kɛ ɔkeda ɔ nloa sɔlɔ ne azo na ɔlua a, ɔtea nuhua kɛ, ‘Me nwo ɛnde o, me nwo ɛnde!’

⁴⁶ Saa ewule ne mɔɔ wɔ ɔ nwo la ɛtɛkɔle a, ɔ nwo ɛnrɛde ɛlɛ. Kɛmɔ ɔ nwo ɛnde la ati, ɔwɔ kɛ ɔte ɔ nwo ɔkɔtɛnla kpɔda bie abo wɔ azokoɛleɛ ne kandiba.

Debie mɔɔ kɛbɔ adubue la anwo mɛla

⁴⁷ “Saa tɛladeɛ mɔɔ bɛva dwɛsɛ nyɛma anzɛɛ mboane enrinli nyɛma bɛnwo la anu bɔ adubue,

⁴⁸ saa bɛnwu bie wɔ ndanlɛ nyɛma mɔɔ bɛzinlezinla la anu, anzɛɛ nwoma nu anzɛɛ debie biala mɔɔ bɛva nwoma bɛyɛ la anu,

⁴⁹ na saa adubue ne anye le asuomenle anzɛɛ kɔkɔlɛ wɔ ɛdanlɛ ne, nyɛma ne, nwoma ne anzɛɛ debie mɔɔ bɛva nwoma bɛyɛ la anu a, ɛnee ewule kokobɛ ɔ. Ɔwɔ kɛ bɛfa bɛkile sɛlɛvolɛ ne.

⁵⁰ Sɛlɛvolɛ ne banleɛnlea ewule ne, na yeamaa bɛawula deɛ ne mɔɔ ewule ne wɔ nu la sua nu kenle nsuu.

⁵¹ Kenle nsuu ne dwu a, eza yeanleɛnlea ewule ne na saa ewule ne ɛdɛlɛ tɛladeɛ ne, ndanlɛ nyɛma anzɛɛ nwoma ne anu, anzɛɛ debie biala mɔɔ bɛva nwoma bɛyɛ la anu a, ɛnee ewule ne le kokobɛ nzane; deɛ ne anwo ɛnde.

⁵² Sɛlɛvolɛ ne bamaa bɛayela tɛladeɛ ne. Saa ewule ne wɔ mboane enrinli anzɛɛ dwɛsɛ ɛdanlɛ nu o, ndanlɛ nyɛma nu o, nwoma nu o anzɛɛ debie biala mɔɔ bɛva nwoma bɛyɛ la anu o, ewule ne le kokobɛ nzane; ɔwɔ kɛ bɛgua ye senle nu bɛyela ye.

⁵³ “Na saa sɛlɛvolɛ ne neɛnlea ewule ne na ɔtɛtɛlɛdɛlɛle ɛdanlɛ anzɛɛ nwoma ne anu a,

⁵⁴ sɛlɛvolɛ ne bamaa bɛakpo deɛ ne mɔɔ ewule ne wɔ nu la na bɛawula ye sua nu kenle nsuu bieko.

⁵⁵ Kenle nsuu ne anzi, sɛlɛvolɛ ne banleɛnlea deɛ ne anu ɛleka mɔɔ anrɛɛ ewule ne wɔ la, na saa ɛleka mɔɔ anrɛɛ ewule ne wɔ la anye angakyi a, ɛnee ewule ne anzande bɔbɔ ɛdeɛ, noko deɛ ne anwo ɛnde. Saa kokobɛ ne abo zo ne tɛbɔ ɛdanlɛ ne anzɛɛ nwoma ne akunlu o, ɔ nzi o, bɛgua ye senle nu bɛyela ye.

⁵⁶ Na saa sɛlɛvolɛ ne neɛnlea deɛ ne anu ɛleka mɔɔ ewule ne woale a bɛkpole la na yedu a, ɔbapɛ ɛleka holɛ ko ne yeavi ɛdanlɛ, nwoma anzɛɛ ndanlɛ nyɛma ne anu.

⁵⁷ Saa ewule ne finde ɛleka fofolɛ a, ɛnee ɔkile kɛ ɔlɛtɛlɛ. Ɔwɔ kɛ bɛgua deɛ ne mɔɔ ewule ne wɔ nu la senle nu bɛyela ye.

⁵⁸ Tɛladeɛ, ndanlɛ nyɛma, anzɛɛ nwoma mɔɔ kɛbɔ adubue na bɛkɛkpo na adubue ne anzia amba bieko la, bɛkpo ye bieko, ɛnee deɛ ne anwo ɛde.”

⁵⁹ Ɛnee mɛla mɔɔ fane ewule kokobɛ mɔɔ wɔ dwɛsɛ anzɛɛ mboane enrinli ndanlɛ nu, ndanlɛ nyɛma, nwoma anzɛɛ debie biala mɔɔ bɛva nwoma bɛyɛ la anu, nee kɛ bɛkɛzi bɛkɛnwu kɛ deɛ ne anwo te anzɛɛ nwolɛ ɛnde la, yemɔ ɛne.