Sɛlɛ 10 - BAEBOLO ANZƐƐ BULUKU NWUANZANWUANZA

Needabe nee Abaehu ɛtane ne mɔɔ bɛyɛle la

¹ Na Aalɔn amra mrenya ne mɔ nwiɔ, Needabe nee Abaehu vale bɛ dwora ne mɔ mɔɔ bɛfa bɛkpu ɛyɛlɛ la na bɛguale senle nu, bɛvulale ɛyɛlɛ bɛguale nu, na bɛvale senle mɔɔ ɛnle nwuanzanwuanza la bɛvindele Ɛdɛnkɛma anyunlu, wɔ mekɛ mɔɔ bɛanze bɛ zɔhane la.

² Na senle vi Ɛdɛnkɛma ɛkɛ ne rayelale bɛ, na bɛwule ɛkɛ ne ala wɔ Ɛdɛnkɛma anyunlu.

³ Na Mosisi zele Aalɔn kɛ, “Ɛdɛnkɛma se, ‘Mekile meamaa menli mɔɔ bikye me la anwu kɛ mele nwuanzanwuanza, na meamaa menli ne amuala anwu me anyunlunyia ne.’ ” Na Aalɔn andɛ ɔ nloa anu.

⁴ Mosisi vɛlɛle Aalɔn awuvuanyi Ɛzeɛle amra Maehyeeyɛle nee Ɛlezeefan na ɔzele bɛ kɛ, “Bɛrɛla bɛraye bɛ mediema ne mɔ bɛvi ɛleka nwuanzanwuanza ye bɛhɔ azokoɛleɛ ne anzi lɔ.”

⁵ Yemɔti bɛrale na bɛravale bɛ wɔ bɛ adɛladeɛ ne mɔ anu bɛvindele azokoɛleɛ ne anzi lɔ, kɛmɔ Mosisi ɛha la.

⁶ Na Mosisi zele Aalɔn nee ɔ mra mrenya Ɛlieza nee Yetamaa kɛ, “Bɛmmamaa bɛ ti enrinli kendɛhenda nwolɛ yɛɛ bɛmmasuosua bɛ adɛladeɛ nu bɛkile kɛ bɛlɛdi nyane, anrɛɛ bɛkɛwu, na bɛkɛmaa bɛkɛva menli mɔɔ ɛrayia ɛke la amuala anwo ɛya. Noko bɛ mediema Yizilayɛma amuala kola su bɛ wɔ senle ɛhye mɔɔ Ɛdɛnkɛma ɛva ɛyela bɛ la ati.

⁷ Eza bɛmmabɔ Ɛdɛnkɛma Ndanlɛ Sua ye anuhɔlɛ ne bɛtɛla, anrɛɛ bɛkɛwu, ɔluakɛ Ɛdɛnkɛma nwole ne mɔɔ ɔvale ɔkpokpale bɛ la wɔ bɛ nwo.” Na bɛyɛle, kɛmɔ Mosisi hanle la.

Sɛlɛvolɛma mɛla

⁸ Na Ɛdɛnkɛma dendɛle hilele Aalɔn kɛ,

⁹ “Mmano nza nwanye anzɛɛ nza ɛsesebɛ. Ɛdawɔ o, anzɛɛ ɛ mra mrenya ne mɔ o, bɛmmano nza kolaa na bɛahɔ Ɛdɛnkɛma Ndanlɛ Sua ne anu, anrɛɛ bɛkɛwu. Ɛhye bayɛ mɛla ala ɛkɛ dahuu amaa wɔ awolɛndoazo kɔsɔɔti.

¹⁰ Ɔwɔ kɛ bɛnwu mɔɔ le nwuanzanwuanza la na bɛnwu mɔɔ anwo ɛngyia la; ɔwɔ kɛ bɛnwu mɔɔ anwo te la na bɛnwu mɔɔ anwo ɛnde la.

¹¹ Eza ɔwɔ kɛ bɛkilehile Yizilayɛma mɛla ne mɔ mɔɔ Ɛdɛnkɛma ɛlua Mosisi anwo zo ɛva ɛmaa bɛ la amuala.”

¹² Mosisi zele Aalɔn nee ɔ mra mrenya nwiɔ ne mɔɔ ɛha la, Ɛlieza nee Yetamaa kɛ, “Bɛva ma azubɔdeɛ ne mɔɔ bɛyelale bɛbɔle azu bɛmanle Ɛdɛnkɛma la abo ne mɔɔ ɛha la, bɛmmafa mgbɔvonle bɛwula nu, na bɛli wɔ azukponle ne anwo ɛkɛ, ɔluakɛ ɔle nwuanzanwuanza kpalɛ kpalɛ.

¹³ Ɔwɔ kɛ bɛdi ye wɔ ɛleka mɔɔ te la, ɔboalekɛ ɔle ɛdawɔ nee ɛ mra mrenya ne mɔ afoa nu ɛdeɛ, mɔɔ vi ɛyelalɛ azubɔdeɛ ne mɔɔ bɛvale bɛmanle Ɛdɛnkɛma la anu. Ɔluakɛ zɔhane yɛɛ bɛze me a.

¹⁴ Na nane ne akɛnra azo ne mɔɔ bɛdo ye ehono la nee ye ɛzɔlɛ ne mɔɔ bɛva bɛbɔ azu ne la, bɛli wɔ ɛleka mɔɔ te la Ɛdawɔ, ɛ mra ne mɔ, yɛɛ ɛ mra mraalɛ ne mɔ a ɔwɔ kɛ di a Ɔluakɛ bɛva bɛmaa kɛ ɛdawɔ nee ɛ mra mrenya ne mɔ afoa nu ɛdeɛ mɔɔ vi Yizilayɛma anzonudwolɛ azubɔdeɛ azubɔlɛ ne anu la

¹⁵ Nane ɛzɔlɛ ne mɔɔ bɛfa bɛabɔ azu ne nee nane ne akɛnra azo ne mɔɔ bɛdo ye ehono la, ɔwɔ kɛ bɛfa bɛboka ɛnlome ne mɔɔ bɛyela la anwo bɛto ye ehono, kɛ ehono azubɔdeɛ wɔ Ɛdɛnkɛma anyunlu, na akee yeayɛ ɛdawɔ nee ɛ mra ne mɔ ɛdeɛ dahuu, kɛmɔ Ɛdɛnkɛma zele la.”

¹⁶ Akee Mosisi bizebizale abɔnkye ne mɔɔ bɛvale bɛyɛle ɛtane azubɔdeɛ ne la anwo edwɛkɛ kpalɛ, na ɔnwunle kɛ bɛyelale ye. Ɔvale Aalɔn amra mrenya ne mɔ mɔɔ ɛha la, Ɛlieza nee Yetamaa anwo ɛya na ɔbizale bɛ kɛ,

¹⁷ “Duzu ati a bɛanli ɛtane azubɔdeɛ ne wɔ ɛleka nwuanzanwuanza ne ɛ? Ɔboalekɛ ɔle debie nwuanzanwuanza kpalɛ kpalɛ mɔɔ bɛvale bɛmanle bɛ, amaa bɛazoa menli ne ɛtane ne mɔ na bɛahɔyɛ nwolɛ mgbɔdalɛ nzɛlɛlɛ wɔ Ɛdɛnkɛma anyunlu.

¹⁸ Bɛnlea, bɛanva ye mogya ne bɛamba ɛleka nwuanzanwuanza ne akunlu. Yemɔti anrɛɛ ɔwɔ kɛ bɛdi ye wɔ ɛleka nwuanzanwuanza ne, kɛmɔ menzele la.”

¹⁹ Aalɔn buale Mosisi kɛ, “Nea, ɛnɛ bɔbɔ mɔɔ bɛva bɛ ɛtane azubɔdeɛ nee bɛ ɛyelalɛ azubɔdeɛ bɛra Ɛdɛnkɛma anyunlu la, nea mɔɔ ɛzi me nwo zo la. Saa menlile ɛtane azubɔdeɛ ne ɛnɛ a, anrɛɛ ɛnee ɛnea a, ɔkɛzɔ Ɛdɛnkɛma anye ɔ?”

²⁰ Mɔɔ Mosisi dele ɛhye la, ɔ kunlu dwole.