Pɔɔlo Kɛlata mɔɔ ɔhɛlɛle ɔhɔmanle Faelimɔn la 1 - BAEBOLO ANZƐƐ BULUKU NWUANZANWUANZA

¹ Kɛlata ɛhye vi medame Pɔɔlo, mɔɔ ɔlua Kelaese Gyisɛse ati mela efiade nee adiema Temɔte ɛkɛ. Ɔdwu yɛ gɔnwo Faelimɔn, mɔɔ le yɛ diema gyimayɛvolɛ wɔ Nyamenle ɛzonlenlɛ ye anu la ɛkɛ;

² ɔdwu asɔnema mɔɔ yia wɔ sua nu ɛkɛ ne, yɛɛ adiema raalɛ Afea nee Aakepɛse mɔɔ le yɛ gɔnwo sogyanli ne la ɛkɛ:

³ Egya Nyamenle nee yɛ Awulae Gyisɛse Kelaese ɛlo bɛ na ɔmaa bɛ anzonudwolɛ.

Faelimɔn ɛhulolɛ nee ye diedi

⁴ Adiema Faelimɔn, mekɛ biala mesɛlɛ a, mebɔ wɔ duma na meyɛ Nyamenle mo.

⁵ Ɔluakɛ mete wɔ ɛhulolɛ mɔɔ ɛlɛ ye wɔ Nyamenle menli ne anwo nee diedi mɔɔ ɛlɛ ye wɔ Awulae Gyisɛse anu la nganeɛ.

⁶ Me nzɛlɛlɛ a le kɛ, wɔ diedi nu mediemayɛlɛ ne kɛva ndelebɛbo mɔɔ nuhua pi wɔ debie kpalɛ biala mɔɔ Kelaese ati ɔle yɛ ɛdeɛ la kɛra.

⁷ Adiema kulovolɛ, medi fɛlɛko kpole wɔ wɔ ɛhulolɛ mɔɔ ɛlɛ ye la anwo, na yemaa me akɛnrazilɛ! Wɔmaa Nyamenle menli muala anye ɛlie.

Onɛsemɛse ati kyɛlɛkpalɛ

⁸ Ɔlua ɛhye ati kɛmɔ Kelaese ati ɛle adiema la anrɛɛ mekola mese wɔ memaa ɛyɛ debie mɔɔ ɔwɔ kɛ ɛyɛ la,

⁹ na ɛ nwo ɛhulolɛ ti, mebazɛlɛ wɔ. Mame a mele Pɔɔlo mɔɔ megyi Kelaese Gyisɛse agyakɛ anu, na kɛkala ɔlua ɔ ti mela efiade la, noko akee mebiza ɛhye.

¹⁰ Mesɛlɛ wɔ meamaa me ra Onɛsemɛse. Ɔlua Kelaese ati, Onɛsemɛse ɛrayɛ me ra wɔ mekɛ mɔɔ mela efiade ye ala la.

¹¹ Mekɛ bie mɔɔ ɛraze ɛhɔ la ɛnee ɔ nwo ɛnlɛ nvasoɛ ɛmmaa wɔ; na kɛkala, ɔ nwo lɛ nvasoɛ maa wɔ nee medame.

¹² Melɛsiane ye meamaa yeara ɛ nwo lɔ bieko, na fa ye kɛ medame ɔ.

¹³ Anrɛɛ menwɔhulo kɛ ɔkɛdɛnla me nwo ɛke, na yeagyinla ɛ gyakɛ anu yeaboa me wɔ Edwɛkpa ne ɛkpondenlɛ nu, kɛmɔ mela efiade la.

¹⁴ Noko menrɛhulo kɛ menwɔyɛ debie mɔɔ ɛnze nu la wɔ ɛhye anwo, amaa yeanyɛ kɛ asɛɛ wɔ moalɛ ne ɛyɛ mialeranu debie; mekulo kɛ ɛdawɔ ɛfa wɔ ɛhulolɛ ɛyɛ.

¹⁵ Ɔkɛyɛ kɛ ɛhye ati a Onɛsemɛse vile ɛ nwo ɛkɛ ne mekɛ ekyi a, amaa saa ɔsia ɔba a yeaha ɛkɛ bɔkɔɔ,

¹⁶ tɛ kɛ ɔle wɔ kanranli angome ɔ, na kɛ Kelaese ati ɔle adiema kulovolɛ mɔɔ anwo hyia me kpole a. Na wɔ wɔ afoa nu, kɛmɔ ɔle kanranli nee adiema wɔ Kelaese ati la, wɔ ɛhulolɛ ɛdeɛ ne bo zolɛ.

¹⁷ Yemɔti saa ɛdie ɛto nu kɛ ɛ nee me a lua ɛdeɛ a, ɛnee die ye kɛ ɛkɛlie me ala la.

¹⁸ Saa yeyɛ ɛtane yetia wɔ anzɛɛ ɔtua wɔ kakɛ a, nea me ti na fa kyɛ ye.

¹⁹ Medame Pɔɔlo, me sa anloa a melɛ melɛkɛlɛ ɛhye a. MEDAME PƆƆLO, MEBADUA KAKƐ NE MEAMAA WƆ. Mengulo kɛ mekakye wɔ kɛ ɛdawɔ mumua ne ɛwɔ me sa nu.

²⁰ Yemɔti, me diema, ɔlua Awulae ati, gyakyi ɛhye anu maa me, kɛmɔ Kelaese ati ɛle me diema la, na maa me nye ɛlie.

²¹ Melɛkɛlɛ kɛlata ɛhye, ɔluakɛ medie medi kɛ ɛkɛyɛ mɔɔ melɛbiza la. Nɔhalɛ, meze kɛ ɛkola ɛyɛ ɛmaa ɔbo zolɛ.

²² Eza kpondɛ dabelɛ sie me, ɔboalekɛ melɛ anyelazo kɛ Nyamenle badie bɛ muala bɛ nzɛlɛlɛ amaa meazia me nee bɛ aradɛnla.

Ahyebizalɛ

²³ Ɛpafelase mɔɔ nee me yɛla efiade ɛke wɔ Kelaese Gyisɛse ati la biza wɔ ahye.

²⁴ Zɔhane ala yɛɛ me gɔnwo mɔ gyimayɛvoma Maake, Alesetaakɛse, Dimase, yɛɛ Luku bɛdabɛ bɛbiza wɔ ahye a.

²⁵ Awulae Gyisɛse Kelaese ɛlo wɔ na ɔ nee wɔ ɛdɛnla.