Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 5 - BAEBOLO ANZƐƐ BULUKU NWUANZANWUANZA

Menli mɔɔ anwo ɛnde la

¹ Ɛdɛnkɛma zele Mosisi kɛ,

² “Ka kile Yizilayɛma kɛ, bɛye kokobɛvolɛ biala, awie biala mɔɔ anwo twihwi, yɛɛ awie biala mɔɔ ɔluakɛ yeva ɔ sa yeha funli la ati evinli ɛha ye la bɛvi bɛ avinli wɔ azokoɛleɛ ɛkɛ.

³ Bɛye bɛ, mrenya nee mraalɛ kɔsɔɔti, na bɛva bɛ bɛhɔ azokoɛleɛ ne kandiba, amaa bɛanva evinli bɛanga azokoɛleɛ ye, mɔɔ medame mede me menli avinli la.”

⁴ Na Yizilayɛma yele menli ɛhye mɔ vile bɛ avinli, kɛmɔ Ɛdɛnkɛma zele Mosisi la.

Ɛtaneyɛlɛ abo zo ɛzielɛ

⁵ Ɛdɛnkɛma zele Mosisi kɛ,

⁶ “Ka kile Yizilayɛma kɛ, saa nrenya anzɛɛ raalɛ anli nɔhalɛ ammaa Ɛdɛnkɛma na ɔyɛ ɛtane ɔtia awie a,

⁷ ɔwɔ kɛ sonla zɔhane ka ye ɛtane ne mɔɔ yeyɛ la, na ɔsie ɔ bo zo, na eza ɔfa deɛ ne mɔɔ ɔzɛkyele ye la ngyɛnu nnu ɛkpɔ ko ɔboka nwolɛ ɔfa ɔmaa ahenle mɔɔ ɔvonle ye la.

⁸ Na saa ahenle ne mɔɔ ɔvonle ye la ɛwu, na ɔ nwo sonla fɔɔnwo biala ɛnle ɛkɛ a, ɔwɔ kɛ deɛ ne mɔɔ ɔfa yeazie ɔ bo zo la yɛ Ɛdɛnkɛma ɛdeɛ na bɛfa bɛkɔmaa sɛlɛvolɛ ne. Ɔwɔ kɛ ɔfa abozozielɛ deɛ ne ɔboka boane nyinli mɔɔ bɛbava bɛayɛ mgbɔdalɛ nzɛlɛlɛ bɛamaa ye la anwo.

⁹ Eza Yizilayɛma azubɔdeɛ biala nee ninyɛne nwuanzanwuanza mɔɔ bɛkɛva bɛkɛrɛlɛ sɛlɛvolɛ ne la le ye ɛdeɛ.

¹⁰ Debie biala mɔɔ awie biala kɛva kɛrɛlɛ sɛlɛvolɛ ne la le ye ɛdeɛ.”

Nrenya mɔɔ atiakunlu ɛngya ɔ ye anwo la

¹¹ Ɛdɛnkɛma zele Mosisi kɛ

^12-14 ɔva ngyehyɛlɛ ɛhye mɔ ɔmaa Yizilayɛma, “Saa awie aye wulowula ɔ sa aze na ɔnli nɔhalɛ ɔmaa ɔ hu, saa awie nee ye da, na ɔ hu ɛnze, na kɛmɔ awie angye ye nee nrenya la ati, ɔ hu ɛnlɛ daselɛ biala, noko nrenya ɛva ye; saa nrenya ne ati akunlu ɛngya kɛ ɔ ye ɛva nrenya, anzɛɛ saa nrenya ne ati akunlu ɛngya na ye adwenle yɛ ye kɛ ɔ ye ɛva nrenya, noko ɔtɛfale nrenya bɔbɔ a,

¹⁵ nrenya ne ɛva ɔ ye ne ɛhɔ sɛlɛvolɛ ne ɛkɛ. Akee ɔva baale esamo azubɔdeɛ kilo ko, ɔmmafa ɔlivi nwole ɔgua nu, yɛɛ ɔmmafa ɛyɛlɛ ɔto zolɛ, ɔboalekɛ ɔle nungule ma azubɔdeɛ kɛ ɔfa yeamaa nɔhalɛ ne ala ali.

¹⁶ “Sɛlɛvolɛ ne bava raalɛ ne ahɔgyinla Ɛdɛnkɛma anyunlu.

¹⁷ Akee ɔbawola nzule nwuanzanwuanza yeagua dwora nu, yeade ndɛtɛlɛ ne mɔɔ wɔ Ɛdɛnkɛma Ndanlɛ Sua ne anu la bie yeagua nzule ne anu.

¹⁸ Akee sɛlɛvolɛ ne ɛmaa raalɛ ne ɛtulutulu ɔ ti enrinli ne na ɔva ma azubɔdeɛ ne ɔwula ɔ sa nu. Sɛlɛvolɛ ne ɛlɛ dwora ne mɔɔ amonle nzule ɛnwonle ne wɔ nu la ɔ sa nu.

¹⁹ Akee sɛlɛvolɛ ne ɛgenga amonle ne ɛmaa raalɛ ne kɛ: Saa nrenya gyɛne ɛtɛfale wɔ, yɛɛ sumunli kɛ ɛ hu gyale wɔ la ɛtɛwulowulale ɛ sa aze a, amonle ɛhye ɛndo wɔ.

²⁰ Na saa ɛ hu gyale wɔ la wɔwulowula ɛ sa aze wɔmaa nrenya gyɛne ɛva wɔ a,

²¹ (Sɛlɛvolɛ ne ɛmaa raalɛ ne ɛli amonle ne na ɔha ɔhile raalɛ ne kɛ) ɛnee Ɛdɛnkɛma ɛmaa bɛhyi wɔ, wɔ wɔ menli avinli, ɔmaa wɔ awodeɛ ɛnwoso na ɛwulowula.

²² Amonle ɛhye ɛdenrɛ ɛ kunlu na ɔmaa ɛwulowula, na wɔ awodeɛ ɛnwoso. “Raalɛ ne ɛlie zolɛ kɛ, ‘Amen, mekponle zolɛ.’

²³ “Akee sɛlɛvolɛ ne ɛhɛlɛ amonle ne debie zo na ɔwowo ɔgua kanrɛlɛ ne mɔɔ nzule ɛnwonle ne wɔ nu la anu.

²⁴ Ɔmaa raalɛ ne ɛnlo nzule ɛnwonle ne, mɔɔ wɔannea ye boɛ a ɔbamaa yeade nyane kpole wɔ ɔ kunlu la.

²⁵ Sɛlɛvolɛ ne ɛlie ma azubɔdeɛ ne wɔ raalɛ ne asa anu, ɔdo ye ehono wɔ Ɛdɛnkɛma anyunlu, na ɔva ɔzie azukponle ne azo.

²⁶ Akee ɔvula ma azubɔdeɛ ne ɔ sa tukuu ko ɔyɛ ngakyedeɛ ɔyela ye wɔ azukponle ne azo, na ɔmaa raalɛ ne ɛnlo nzule ne.

²⁷ Saa nrenya gyɛne ɛva ye yɛɛ yeanli nɔhalɛ yeammaa ɔ hu a, amonle ne bamaa yeade nyane kpole, yeamaa yeawulowula, ye awodeɛ anwoso, na bɛahyi ye wɔ ye menli ne avinli.

²⁸ Na saa ɔtɛyɛle ɛtane biala a, amonle ne ɛndo ye, yɛɛ ɔnyia ɛkolɛ ɔbɔ ɛdane.

^29-30 “Saa nrenya twe nungule, ye adwenle ɛngya ɔ ye anwo a, ɛnee mɛla mɔɔ wɔ nwolɛ la ɛne. Bɛmaa raalɛ ne gyinla azukponle ne anyunlu na sɛlɛvolɛ ne noa ye amonle ne.

³¹ Kunli ne ɛnli ɛhye anwo fɔlɛ. Na saa raalɛ ne di fɔlɛ ɛdeɛ a, ɛnee ɔdaye ye ɛtane zo ye.”