Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 29 - BAEBOLO ANZƐƐ BULUKU NWUANZANWUANZA

Ɛvolɛ Fofolɛ Ɛvoyia azubɔdeɛ ne mɔ

¹ “Siane nsuu ne, ye kenle ne mɔɔ lumua la azo, ɔwɔ kɛ bɛyia nu bɛyɛ nzɛlɛlɛ, yɛɛ ɔnle kɛ bɛyɛ gyima ɛsesebɛ biala. Kenle zɔhane, ɔwɔ kɛ bɛwu aweɛne ndendenle ne mɔ anu.

² Bɛva ɛyelalɛ azubɔdeɛ mɔɔ ye evuanlɛ sɔ Ɛdɛnkɛma anye la bɛmaa ye. Bɛva ɛnlankɛ nyinli edonraa ko, boane nyinli ko, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la nsuu.

³ Bɛ ma azubɔdeɛ ne, bɛva esamo kpalɛ mɔɔ bɛva ɔlivi nwole bɛfɔtɔ la kilo nsa bɛzua ɛnlankɛ ne: boane nyinli ne, bɛva esamo kilo nwiɔ,

⁴ yɛɛ boane edonraa ko biala, bɛva esamo kilo ko.

⁵ Eza bɛbɔ menli ne ati bɛva abɔnkye nyinli ko bɛyɛ ɛtane azubɔdeɛ bɛyɛ mgbɔdalɛ nzɛlɛlɛ bɛmaa bɛ.

⁶ Bɛyɛ ɛhye mɔ bɛboka siane ne kenle mɔɔ lumua la ɛyelalɛ azubɔdeɛ ne nee nwolɛ ma azubɔdeɛ ne anwo, nee dahudahu ɛyelalɛ azubɔdeɛ ne, nee ma azubɔdeɛ ne nee nwanye azubɔdeɛ ne anwo, kɛmɔ bɛhyehyɛ la. Ɛyelalɛ azubɔdeɛ ɛhye mɔ evuanlɛ sɔ Ɛdɛnkɛma anye.

Mgbɔdalɛ Kenle azubɔdeɛ ne mɔ

⁷ “Siane nsuu ne, ye kenle bulu ne azo, bɛyia nu bɛyɛ nzɛlɛlɛ. Bɛmmadi debie yɛɛ bɛmmayɛ gyima biala.

⁸ Bɛbɔ ɛyelalɛ azu mɔɔ ye evuanlɛ sɔ Ɛdɛnkɛma anye la bɛmaa Ɛdɛnkɛma. Bɛva ɛnlankɛ nyinli edonraa ko, boane nyinli ko, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la nsuu.

⁹ Bɛ ma azubɔdeɛ ne, bɛva esamo mɔɔ bɛva ɔlivi nwole bɛfɔtɔ la: ɛnlankɛ nyinli ne, bɛva esamo kilo nsa, boane nyinli ne, bɛva esamo kilo nwiɔ,

¹⁰ yɛɛ boane edonraa biala, bɛva esamo kilo ko.

¹¹ Eza bɛva abɔnkye nyinli ko bɛyɛ ɛtane azubɔdeɛ bɛboka ɛtane azubɔdeɛ ne mɔɔ bɛvale bɛyɛle mgbɔdalɛ nzɛlɛlɛ ne la, nee dahudahu ɛyelalɛ azubɔdeɛ ne mɔ anwo.

Kpɔda Bo Ɛvoyia azubɔdeɛ ne mɔ

¹² “Siane nsuu ne, ye kenle bulu nee nnu ne azo, bɛyia bɛyɛ nzɛlɛlɛ. Bɛli ɛvoyia ɛhye bɛwula Ɛdɛnkɛma anyunlunyia toonwo kenle nsuu, eza bɛmmayɛ gyima ɛsesebɛ biala.

¹³ Kenle ne mɔɔ lumua la bɛva ɛyelalɛ azubɔdeɛ mɔɔ sɔ Ɛdɛnkɛma anye la bɛmaa ye. Bɛva nlankɛ nyinli ndonrandonra bulu nee nsa, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna.

¹⁴ Bɛ ma azubɔdeɛ ne, bɛva esamo kpalɛ mɔɔ bɛva ɔlivi nwole bɛfɔtɔ la: saa bɛfa ɛnlankɛ nyinli ko a, bɛva esamo kilo nwiɔ,

¹⁵ yɛɛ saa bɛfa boane edonraa ko a, bɛva esamo kilo ko nee nwolɛ nwanye azubɔdeɛ mɔɔ sa la.

¹⁶ Eza bɛva abɔnkye nyinli ko bɛyɛ ɛtane azubɔdeɛ. Bɛyɛ ɛhye mɔ bɛboka dahudahu ɛyelalɛ azubɔdeɛ ne nee ye ma azubɔdeɛ ne nee ye nwanye azubɔdeɛ ne mɔ anwo.

¹⁷ “Ye kenle nwiɔ ne azo, bɛva nlankɛ nyinli ndonrandonra bulu nee nwiɔ, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna.

^18-19 Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwolɛ nwanye azubɔdeɛ ne mɔ anwo.

²⁰ “Ye kenle nsa ne azo bɛva nlankɛ nyinli ndonrandonra bulu nee ko, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna.

^21-22 Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwanye azubɔdeɛ ne mɔ anwo.

²³ “Ye kenle nna ne azo bɛva nlankɛ nyinli ndonrandonra bulu, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna.

^24-25 Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwanye azubɔdeɛ ne mɔ anwo.

²⁶ “Ye kenle nnu ne azo bɛva nlankɛ nyinli ndonrandonra ngɔnla, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna.

^27-28 Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwolɛ nwanye azubɔdeɛ ne mɔ anwo.

²⁹ “Ye kenle nsia ne azo bɛva nlankɛ nyinli ndonrandonra mɔtwɛ, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna.

^30-31 Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwolɛ nwanye azubɔdeɛ ne mɔ anwo.

³² “Ye kenle nsuu ne azo bɛva nlankɛ nyinli ndonrandonra nsuu, mboane nyinli nwiɔ, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la bulu nee nna.

^33-34 Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwanye azubɔdeɛ ne mɔ anwo.

³⁵ “Ye kenle mɔtwɛ ne azo bɛyia nu na bɛyɛ nzɛlɛlɛ, eza bɛmmayɛ gyima ɛsesebɛ biala.

³⁶ Bɛva ɛnlankɛ edonraa ko, boane nyinli ko, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la nsuu bɛyɛ ɛyelalɛ azubɔdeɛ mɔɔ ye evuanlɛ sɔ Ɛdɛnkɛma anye la bɛmaa ye.

^37-38 Bɛsesa nwolɛ ma azubɔdeɛ ne mɔ, kɛmɔ bɛhyehyɛ la, na eza bɛva abɔnkye nyinli ko bɛyɛ ɛtane azubɔdeɛ bɛboka dahudahu ɛyelalɛ azubɔdeɛ ne nee ma azubɔdeɛ ne nee nwolɛ nwanye azubɔdeɛ ne mɔ anwo.

³⁹ “Saa ɛvoyialilɛ ne mɔ dwu zo a, bɛva bɛ azubɔdeɛ ɛhye mɔ bɛboka bɛ ɛwɔkɛyelɛ, ahunlunyele, ɛyelalɛ, ma nee nwanye, yɛɛ anzonudwolɛ azubɔdeɛ ne mɔ bɛmaa Ɛdɛnkɛma.”

⁴⁰ Yemɔti Mosisi hanle edwɛkɛ biala mɔɔ Ɛdɛnkɛma hanle hilele ye la hilele Yizilayɛma ne.