Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 28 - BAEBOLO ANZƐƐ BULUKU NWUANZANWUANZA

Dahudahu azubɔdeɛ ne mɔ

¹ Ɛdɛnkɛma zele Mosisi kɛ,

² “Ka kile Yizilayɛma kɛ, ‘Me azubɔlɛ ne, aleɛ mɔɔ bɛfa bɛabɔ ɛyelalɛ azu mɔɔ sɔ me nye bɛamaa me la, bɛyɛ bɛ wɔ bɛ mekɛ nloa.’

³ “Ka kile bɛ kɛ, ɛyelalɛ azubɔdeɛ ɛhye mɔ a bɛva bɛrɛlɛ Ɛdɛnkɛma a: Kenle ko biala bɛva mboane mralɛ nyinli nwiɔ mɔɔ ɛli ɛvolɛ ngoko, mɔɔ anwo ɛnlɛ dɛne la bɛbɔ azu.

⁴ Bɛva ko bɛbɔ azu nwonlomɔ, na bɛva ko ne noko bɛbɔ azu nɔsolɛ.

⁵ Eza bɛva esamo kilo ko mɔɔ bɛva ɔlivi nwole kɛnlɛma litili ko bɛfɔtɔ la bɛyɛ ma azubɔdeɛ.

⁶ Ɛhye le dahuu ɛyelalɛ azubɔdeɛ mɔɔ bɛhyehyɛle wɔ Saenae Boka, mɔɔ ye evuanlɛ sɔ Ɛdɛnkɛma anye a.

⁷ Boane ko biala, fa nza anu ɛsesebɛ litili ko yɛ azubɔdeɛ gua ye aze wɔ ɛleka nwuanzanwuanza ne maa Ɛdɛnkɛma.

⁸ Nɔsolɛ nu noko fa boane ko ne nee nwolɛ nza azubɔdeɛ ne bɔ azu, kɛmɔ ɛyɛle ye nwonlomɔ ne ala la. Eza ɔle ɛyelalɛ azubɔdeɛ mɔɔ ye evuanlɛ sɔ Ɛdɛnkɛma anye a.

Ɛnwomenlelielɛ Kenle ne azubɔdeɛ

⁹ “Wɔ Ɛnwomenlelielɛ Kenle ne, bɛva mboane mralɛ mɔɔ ɛli ɛvolɛ ngoko na bɛ nwo ɛnlɛ dɛne la nwiɔ, na bɛva esamo mɔɔ bɛva ɔlivi nwole bɛfɔtɔ la kilo nwiɔ bɛyɛ ma azubɔdeɛ, yɛɛ nwanye azubɔdeɛ.

¹⁰ Bɛbɔ Ɛnwomenlelielɛ Kenle ne ɛyelalɛ azu ɛhye bɛboka dahudahu azubɔlɛ ne nee nwolɛ nwanye azubɔlɛ ne anwo.

Kenle ne mɔɔ lumua siane ne anu la azubɔdeɛ ne

¹¹ “Siane biala mɔlebɛbo, bɛbɔ ɛyelalɛ azu bɛmaa Ɛdɛnkɛma. Bɛva nlankɛ ndonrandonra nwiɔ, boane nyinli ko, mboane nyinli ndonrandonra mɔɔ ɛli ɛvolɛ ngoko mɔɔ bɛ nwo ɛnlɛ dɛne la nsuu bɛyɛ ɛyelalɛ azubɔdeɛ bɛmaa Ɛdɛnkɛma.

¹² Eza bɛva esamo kilo nsa, mɔɔ bɛva ɔlivi nwole bɛfɔtɔ la bɛyɛ ma azubɔdeɛ bɛboka ɛnlankɛ nyinli ko biala anwo; yɛɛ boane nyinli ko biala, bɛva esamo kilo ko bɛyɛ ma azubɔdeɛ;

¹³ yɛɛ boane edonraa ko biala, bɛva esamo kilo ko bɛyɛ ma azubɔdeɛ. Ɛyelalɛ azubɔdeɛ ɛhye mɔ evuanlɛ sɔ Ɛdɛnkɛma anye.

¹⁴ Ɛyelalɛ azubɔdeɛ ɛhye mɔ anwo nwanye azubɔdeɛ ne mɔ ɛne: ɛnlankɛ nyinli ko biala, bɛva nwanye litili nwiɔ, boane nyinli ko biala, bɛva nwanye litili ko. Ɛhye a le ɛvolɛ ne anu siane biala ɛyelalɛ azubɔdeɛ nwo ngyehyɛlɛ a.

¹⁵ Saa ɛye dahudahu ɛyelalɛ azubɔdeɛ nee ye nwanye azubɔdeɛ azubɔlɛ ne ɛsie ahane a, eza bɛva abɔnkye nyinli ko bɛyɛ ɛtane azubɔdeɛ bɛmaa Ɛdɛnkɛma.

Angye Ɛvoyia ne azubɔdeɛ ne mɔ

¹⁶ “Siane ne mɔɔ lumua la, ye kenle bulu nee nna ne le Ɛdɛnkɛma Akpabɛnwo Ɛvoyia.

¹⁷ Ye kenle bulu nee nnu ne yɛɛ bɛbɔ ɛvoyia ne ɛlilɛ bo a, yɛɛ bɛli kpanwo mɔɔ mgbɔvonle ɛnle nu la toonwo kenle nsuu.

¹⁸ Kenle ne mɔɔ lumua ɛvoyialilɛ ne anyunlu la, ɔwɔ kɛ bɛyia nu bɛyɛ nzɛlɛlɛ, ɔnle kɛ bɛyɛ gyima ɛsesebɛ biala.

¹⁹ Bɛva nlankɛ nyinli ndonrandonra nwiɔ, boane nyinli ko, yɛɛ mboane nyinli ndonrandonra nsuu mɔɔ ɛli ɛvolɛ ngoko na bɛ nwo ɛnlɛ dɛne la bɛbɔ ɛyelalɛ azu bɛmaa Ɛdɛnkɛma.

²⁰ Eza bɛva esamo mɔɔ bɛva ɔlivi nwole bɛfɔtɔ la bɛyɛ ma azubɔdeɛ bɛmaa Ɛdɛnkɛma: ɛnlankɛ nyinli ko biala, bɛva esamo kilo nsa, boane nyinli ko biala, bɛva esamo kilo nwiɔ,

²¹ yɛɛ boane edonraa ko biala, bɛva esamo kilo ko.

²² Eza bɛbɔ menli ne ati bɛva abɔnkye nyinli ko bɛyɛ ɛtane azubɔdeɛ bɛyɛ mgbɔdalɛ nzɛlɛlɛ bɛmaa bɛ.

²³ Bɛva ɛhye mɔ bɛboka nwonlomɔ dahudahu ɛyelalɛ azubɔdeɛ ne anwo.

²⁴ Zɔhane ala yɛɛ bɛbɔ aleɛ ɛyelalɛ azu mɔɔ ye evuanlɛ sɔ Ɛdɛnkɛma anye la bɛmaa ye toonwo kenle nsuu a. Bɛyɛ ɛhye bɛboka dahudahu ɛyelalɛ azu ne nee nwanye azubɔlɛ ne anwo.

²⁵ Ye kenle nsuu ne azo bɛyia nu bɛyɛ nzɛlɛlɛ; bɛmmayɛ gyima ɛsesebɛ biala.

Bɛyɔba Ɛvoyia ne azubɔdeɛ ne mɔ

²⁶ “Kenle ne mɔɔ lumua Bɛyɔba Ɛvoyia ne anyunlu la, saa bɛfa ma fofolɛ bɛarɛlɛ Ɛdɛnkɛma a, bɛlumua bɛyia nu bɛyɛ nzɛlɛlɛ, yɛɛ bɛmmayɛ gyima ɛsesebɛ biala.

²⁷ Bɛbɔ ɛyelalɛ azu mɔɔ ye evuanlɛ sɔ Ɛdɛnkɛma anye la bɛmaa Ɛdɛnkɛma. Bɛva nlankɛ nyinli ndonrandonra nwiɔ, boane nyinli ko, yɛɛ mboane nyinli ndonrandonra mɔɔ ɛli ɛvolɛ ngoko na bɛ nwo ɛnlɛ dɛne la nsuu.

²⁸ Bɛ ma azubɔdeɛ ne, bɛva esamo mɔɔ bɛva ɔlivi nwole bɛfɔtɔ la: ɛnlankɛ nyinli ko biala, bɛva esamo kilo nsa, boane nyinli ko biala, bɛva esamo kilo nwiɔ,

²⁹ yɛɛ boane edonraa ko biala, bɛva esamo kilo ko.

³⁰ Eza bɛbɔ menli ne ati bɛva abɔnkye nyinli ko bɛyɛ ɛtane azubɔdeɛ bɛyɛ mgbɔdalɛ nzɛlɛlɛ bɛmaa bɛ.

³¹ Bɛyɛ ɛhye mɔ nee nwanye azubɔdeɛ ne bɛboka dahudahu ɛyelalɛ azubɔdeɛ ne nee ma azubɔdeɛ ne anwo. Bɛnlea kɛ nane ne mɔ anwo ɛnlɛ dɛne.