Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 24 - BAEBOLO ANZƐƐ BULUKU NWUANZANWUANZA

¹ Mɔɔ Beelam nwunle ye wienyi kɛ Ɛdɛnkɛma anye die kɛ ɔyila Yizilayɛma la, yeangɔ yeangɔmbiza, kɛmɔ ɔyɛ ye dɛba ne la. Ɔhakyile ɔ nye fienemgbole ne anu, ɔmanle ɔ nye zo

² na ɔnwunle kɛ Yizilayɛma wɔ azokoɛleɛ lɔ, bɛgua ye mbusua ekpunli ekpunli. Nyamenle Sunsum ne dwule ɔ nwo zo,

³ na ɔkpakyele nu ɔhanle Nyamenle nrɛlaleɛ ɛhye: “Biyɔ ara nrenya Beelam Nyamenle nrɛlaleɛ ne ɛne, Sonla ne mɔɔ nwu debie wienyi la edwɛkɛ ne ɛne,

⁴ Yemɔ a ɔte Nyamenle edwɛkɛ, Na ɔnwu Tumivolɛ ne ɛnyelɛzodeɛnwunlɛ ne la, Yedɔ aze, noko ɔ nye ɛtɛkedale.

⁵ Yizilayɛma ndanlɛ azua ne mɔ le ngɛnlɛma, O Yizilayɛma, bɛ azokoɛleɛ le kɛnlɛma.

⁶ Bɛle kɛ mbɔnza mɔɔ tɛlɛ Anzɛɛ tola mɔɔ bɛhye ye azudenle nloa, Bɛle kɛ ‘alo’ mbaka mɔɔ Ɛdɛnkɛma ɛlua, Anzɛɛ sida mbaka mɔɔ gyigyi nzule nloa.

⁷ Bɛbanyia ezule molozo Bɛalua bɛ ma wɔ azɛlɛ fɔtɔfɔtɔ zo. Bɛ belemgbunli bayɛ kpole adɛla Agage, Na ye belemgbunlililɛ bayɛ kpole.

⁸ Nyamenle yele bɛ vile Yigyibiti; Ɔko ɔmaa bɛ kɛ ɛnlankɛ kokonyinli, Ɔbazɛkye ye kpɔvolɛ maanle maanle ne mɔ, Yeabubu bɛ mbowule nu dwɔkɔdwɔkɔ, Yeatoto ye ɛda ne mɔ yeawowɔ bɛ.

⁹ Ɔkɔ nzia a, ɔda kɛ awenade, Awenade belɛ, ɔda a awie ɛndunwue ye. Mɔɔ kɛyila wɔ la, bɛkɛyila ye, Yɛɛ mɔɔ kɛwa wɔ amonle la, bɛkɛwa ye amonle.”

¹⁰ Beelake vale Beelam anwo ɛya kpole, na ɔbɔle ɔ sa botokuma ɔfinle ɔ sa ko anu, na ɔhanle ɔhilele Beelam kɛ, “Menvɛlɛle wɔ kɛ ɛrahye me kpɔvolɛma ne sili, na ye fane nsa ɛne, ɛyilalɛ ala a wɔyila bɛ a.

¹¹ Yemɔti maa ɔyɛ ndɛ nriandi kɔ wɔ sua zo! Membɔle ɛwɔkɛ kɛ menwɔhyɛ wɔ ahyɛlɛdeɛ kpole bie, na kɛkala, Ɛdɛnkɛma ɛmaa yekpa ɛ ti.”

¹² Beelam buale ye kɛ, “Menganle mengilele wɔ sonvolɛma mɔɔ rale la kɛ,

¹³ kanza ɛfa dwɛtɛ fufule nee ezukoa nvutuke kɔsɔɔti mɔɔ wɔ wɔ suakunlu ɛkɛ ne la ɛmaa me a, menrɛdu Ɛdɛnkɛma anloa menrɛdo na menrɛyɛ mɔɔ medame mekulo la. Mɔɔ Ɛdɛnkɛma kɛha kɛhile me la, yemɔ ala yɛɛ mebaha a.”

Beelam Nyamenle nrɛlaleɛ ɛhanlɛ mɔɔ li amozi

¹⁴ Beelam hanle hilele Beelake kɛ, “Melɛsia meahɔ me menli ne mɔ anwo lɔ; bɛla maa menga mɔɔ kenle bie Yizilayɛma bava ayɛ wɔ menli ne la mengile wɔ.”

¹⁵ Na ɔhanle Nyamenle nrɛlaleɛ ɛhye: “Biyɔ ara nrenya Beelam Nyamenle nrɛlaleɛ ne ɛne, Sonla ne mɔɔ nwu debie wienyi la edwɛkɛ ne ɛne,

¹⁶ Yemɔ a ɔte mɔɔ Nyamenle ɛlɛka la, Na ɔze mɔɔ de Anwuma Anwuma lɔ la adwenle. Yemɔ a ɔnwu Tumivolɛ ne ɛnyelɛzodeɛnwunlɛ ne, Yedɔ aze, noko ɔ nye ɛtɛkedale.

¹⁷ Menwu ye, na tɛ kɛkala ɔ; Me nye gyi nwo, noko ɔmbikye. Belemgbunli bavinde Yizilayɛ, Tumi kpole badwazo Yizilayɛ. Ɔbali Mowabe mgbanyima anwo zo konim Na yeabɛlɛ Sɛte abo zo amra aze.

¹⁸ Ɔbava Yidɔm azɛlɛ ne yeayɛ ye ɛdeɛ, Na yeava ye kpɔvolɛma, Siyɛ, azɛlɛ ne yeayɛ ye ɛdeɛ, Mekɛ mɔɔ ɛnee Yizilayɛ ɛlɛdi konim la.

¹⁹ Ɔbalua Yizilayɛ anwo zo yeahile ye tumi, Na yeazɛkye azuamgbole mɔɔ kɛha la.”

²⁰ Akee wɔ ye ɛnyelɛzodeɛnwunlɛ ne anu, Beelam nwunle Amalɛkema na ɔhanle Nyamenle nrɛlaleɛ ɛhye: “Ɛnee Amalɛke a le maanle mɔɔ te kpɔkɛ kpalɛ kpalɛ a, Na awieleɛ ne, ɔbabɔ bɔkɔɔ.”

²¹ Wɔ ye ɛnyelɛzodeɛnwunlɛ ne anu, ɔnwunle Kinama na ɔhanle Nyamenle nrɛlaleɛ ɛhye: “Ɛleka mɔɔ bɛde la, bɛ nwo kɔlɔnwo, Kɔlɔnwo kɛ anloma sane mɔɔ vea bodane nu.

²² Noko bɛmɛ Kinama, bɛbazɛkye bɛ. Aseleama barahye bɛ nuokɛ.”

²³ Beelam hanle Nyamenle nrɛlaleɛ ɛhye: “Saa Nyamenle yɛ ɛhye a, nwane a kɛnyia ngoane a?

²⁴ Ɛlɔnema bava menli vi Saepelɛse arava bɛ aze. Bɛbali Aselea nee Yibɛ anwo zo konim, Na Saepelɛsema noko abo zo abɔ bɔkɔɔ.”

²⁵ Akee Beelam boɔboale ɔ nwo na ɔziale ɔhɔle ye sua zo. Beelake ɔdaye ɔhɔle ye ɛleka bie.