Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 19 - BAEBOLO ANZƐƐ BULUKU NWUANZANWUANZA

Ɛnlankɛ belɛ kɔkɔlɛ ne nzonle

¹ Ɛdɛnkɛma zele Mosisi nee Aalɔn kɛ,

² “Mɛla mɔɔ medame Ɛdɛnkɛma mehyehyɛ la ɛne: Bɛha bɛhile Yizilayɛma kɛ bɛva ɛnlankɛ belɛ kɔkɔlɛ mɔɔ anwo ɛnlɛ dɛne yɛɛ bɛtɛfale bɛtɛyɛle gyima biala la

³ bɛmaa Sɛlɛvolɛ Ɛlieza; bɛva ye bɛhɔ azokoɛleɛ ne anzi lɔ na bɛhu ye wɔ Sɛlɛvolɛ Ɛlieza anyunlu ɛkɛ.

⁴ Akee Ɛlieza ɛva ɔ sa ɛrɛlɛsɛka ɛbɔ ye mogya ne anu na ɔkponde ye wɔ Ndanlɛ Sua ne anyunlu fɔɔnwo fane nsuu.

⁵ Ɔwɔ kɛ bɛyela ɛnlankɛ ne wɔ sɛlɛvolɛ ne anye zo ɛkɛ; bɛyela ye nwoma ne, ye nane ne, ye mogya ne, yɛɛ ɔ kunlu ninyɛne ne amuala.

⁶ Sɛlɛvolɛ ne bava sida baka, nyinlanyinla nee nyɛma kɔkɔlɛ avuandi agua senle ne mɔɔ ɛnlankɛ ne la nu la anu.

⁷ Ɔyɛ ɛhye ɔwie a akee ɔkpo ye adɛladeɛ ne mɔ, ɔbia ɔ nwo na ɔzia ɔhɔ azokoɛleɛ ne bieko, noko ɛnee ɔtɛbɔ evinli nu, kyesɛ nɔsolɛ nu kolaa na yeawie ye evinli ne tu.

⁸ Ɔwɔ kɛ ahenle ne mɔɔ yelale ɛnlankɛ ne la ɔdaye noko ɔkpo ye adɛladeɛ ne mɔ, ɔbia ɔ nwo, noko ɛnee ɔtɛbɔ evinli nu, kyesɛ nɔsolɛ nu kolaa na yeawie ye evinli ne tu.

⁹ Akee sonla mɔɔ evinli ɛnle ɔ nwo la kuohua nzonle ne anloa na ɔfa ɔsie ɛleka gyɛlɛɛnye wɔ azokoɛleɛ ne anzi. Bɛfa bɛsie na Yizilayɛma ava akpoto nzule mɔɔ bɛfa bɛanlua evinli la anu.

¹⁰ Ɔwɔ kɛ ahenle mɔɔ kɛhuohua nzonle ne anloa la kpo ye adɛladeɛ ne mɔ, noko akee ɛnee evinli tɛbɔ ɔ nwo, kyesɛ nɔsolɛ nu kolaa na yeawie ye evinli ne tu. Mɛla ɛhye gyi ɛkɛ maa Yizilayɛma nee nyɛvolɛ mɔɔ de bɛ avinli la, wɔ mekɛ biala anu.

Saa awie anwo ka funli a

¹¹ “Awie biala mɔɔ kɛva ɔ sa kɛha funli la ɛnee evinli ɛha ye toonwo kenle nsuu.

¹² Ɔwɔ kɛ ɔfa nzule ɔbia ɔ nwo wɔ kenle nsa ne nee kenle nsuu ne azo kolaa na ɔ nwo evinli ne adu. Na saa kenle nsa ne nee kenle nsuu ne azo yeanva nzule yeambia ɔ nwo a, evinli ne ɛnrɛdu.

¹³ Awie biala mɔɔ kɛva ɔ sa kɛha funli na yeambia ɔ nwo la anwo ɛnde. Ɔgua Ɛdɛnkɛma Ndanlɛ Sua ne anwo evinli, yɛɛ ɔnle kɛ ɔboa Nyamenle menli ne mɔ avinli, ɔboalekɛ bɛtɛwolale nzule ne mɔɔ bɛfa bɛnua evinli la bie bɛtɛguale ɔ nwo.

¹⁴ “Saa awie wu ndanlɛ sua nu a, awie mɔɔ ye ewule nu ɔwɔ ɛkɛ ne anzɛɛ awie mɔɔ kɛwolo ndanlɛ sua ne anu la ɛnee evinli ɛha ye toonwo kenle nsuu.

¹⁵ Dwora anzɛɛ buakɛ biala mɔɔ ɛnlɛ ɔ ti na ɔwɔ ndanlɛ sua ne anu la ɛnee evinli ɛha ye.

¹⁶ Saa awie fa ɔ sa ka sonla mɔɔ bɛhu ye anzɛɛ ɛwu ɔ ti anwo ewule wɔ ɛbɔ nu anzɛɛ saa awie fa ɔ sa ka sonla funli bowule anzɛɛ ɔfa ɔ sa ɔka sɛka a, ɛnee evinli ɛha ye toonwo kenle nsuu.

¹⁷ “Saa bɛtu evinli ne a, bɛva ɛtane azubɔdeɛ ne mɔɔ bɛyelale la nzonle ne bie bɛgua buakɛ nu, na bɛza nzule mɔɔ se la bɛgua nu.

¹⁸ Akee sonla mɔɔ evinli ɛnle ɔ nwo la ɛva nyinlanyinla ɛbɔ nzule ne anu ɛkponde ndanlɛ sua ne nee ninyɛne mɔɔ bɛva bɛziezie nu, menli mɔɔ wɔ ɛkɛ, yɛɛ ahenle ne mɔɔ vale ɔ sa hanle sonla funli bowule ne, anzɛɛ sonla ne mɔɔ bɛhunle ye, anzɛɛ funli ne, anzɛɛ sɛka ne la kɔsɔɔti anwo.

¹⁹ Kenle nsa ne nee kenle nsuu ne azo yɛɛ awie mɔɔ evinli ɛnle ɔ nwo la fa nzule ne kponde ahenle ne mɔɔ evinli ɛha ye la anwo a. Ye kenle nsuu ne azo, ɔnua ye na ahenle ne kpo ye adɛladeɛ na ɔbia ɔ nwo. Ye nɔsolɛ nu ɛnee ɔ nwo evinli ne ɛdu.

²⁰ “Awie biala mɔɔ evinli ɛha ye, na ɔtɛnuanle ɔ nwo la tɛbɔ evinli nu. Bɛnva ye kɛ ɔle Nyamenle menli ne mɔ ko, ɔluakɛ yegua Ɛdɛnkɛma Ndanlɛ Sua ne anwo evinli.

²¹ Bɛli mɛla ɛhye mɔ kɔsɔɔti azo wɔ melɛ tendenle mɔɔ bara la amuala. Ahenle ne mɔɔ kponde ɛnluanlɛ nzule ne la, ɔdaye noko ɔwɔ kɛ ɔkpo ye adɛladeɛ ne mɔ, awie biala mɔɔ kɛva ɔ sa kɛha nzule ne la ɛnee evinli ɛha ye toonwo ɔkɔdwu nɔsolɛ.

²² Debie biala mɔɔ sonla mɔɔ evinli ɛha ye la kɛzɔ nu la ɛnee evinli ɛha ye, yɛɛ awie mɔɔ kɛva ɔ sa kɛha deɛ ne la anwo ɛnde toonwo ɔkɔdwu nɔsolɛ.”