Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 14 - BAEBOLO ANZƐƐ BULUKU NWUANZANWUANZA

Menli ne ka bɛ nyane

¹ Nɔe ne kɔsɔɔti menli ne vale arɛlebɔlɛ nee nyane zunle.

² Yizilayɛma ne kɔsɔɔti dendɛle tiale Mosisi nee Aalɔn hanle kɛ, “Ɔle kpalɛ kɛ anrɛɛ yɛwule Yigyibiti azɛlɛ zo! Anzɛɛ ɔle kpalɛ kɛ anrɛɛ yɛwule fienemgbole ɛhye anu!

³ Duzu ati bɔbɔ yɛɛ Ɛdɛnkɛma kɛva yɛ kɛra azɛlɛ ɛhye azo, kɛ yɛrawu dadeɛ nloa ɛ? Yɛ mraalɛ nee yɛ mra badɔ donvula. Duzu ati a yɛnrɛzia yɛnrɛhɔ Yigyibiti a?”

⁴ Yemɔti bɛhanle bɛhilele bɛ nwo ngoko kɛ, “Bɛmaa yɛye safohyenle ɛli yɛ ti na yɛzia yɛhɔ Yigyibiti.”

⁵ Mosisi nee Aalɔn dule guale Yizilayɛma ne anyunlu.

⁶ Na Nɛn ara nrenya Dwɔhyua nee Gyɛfɛni ara nrenya Kalɛbe, mɔɔ boka busiama mɔɔ hɔkpɔlale azɛlɛ ne la, vale nyane ngome suosuanle adɛladeɛ mɔɔ bɛwula la anu,

⁷ na bɛhanle bɛhilele Yizilayɛma ne kɛ, “Azɛlɛ ne mɔɔ yɛhɔkpɔlale la le azɛlɛ kɛnlɛma kpalɛ.

⁸ Saa Ɛdɛnkɛma ɔdaye ɔkulo yɛ ɛdeɛ a, ɔ nee yɛ bahɔ azɛlɛ ne azo. Ɔle azɛlɛ mɔɔ kye aleɛ na ninyɛne kpalɛ wɔ zo a.

⁹ Bɛmmate Ɛdɛnkɛma anwo atua; yɛɛ bɛmmasulo menli mɔɔ de azɛlɛ ne azo la, ɔluakɛ bɛnle ɛhwee wɔ yɛ nye zo. Bɛ nwo banebɔlɛ ne ɛbubu, yɛɛ Ɛdɛnkɛma nee yɛ lua; bɛmmasulo, yɛbaza bɛ yɛalie bɛ debie biala.”

¹⁰ Na menli ne kɔsɔɔti yɛle kɛ bɛsi bɛ awolɛ bɛahu bɛ. Na Ɛdɛnkɛma anyunlunyia ne dale Ɛdɛnkɛma Ndanlɛ Sua ne azo wɔ Yizilayɛma kɔsɔɔti anyunlu ɛkɛ ne.

Mosisi sɛlɛ amaa menli ne

¹¹ Na Ɛdɛnkɛma zele Mosisi kɛ, “Fane nyɛ yɛɛ menli ɛhye mɔ kɛkpo me a? Meyɛ nwanwane ninyɛne dɔɔnwo memaa bɛ, na kenlenzu bɔbɔ yɛɛ bɛkɛlie me bɛkɛli a?

¹² Memaa ewulenzane aradɔ bɛ avinli azɛkye bɛ, na meayɛ wɔ maanle mɔɔ le kpole na ɔ nwo yɛ se kpalɛ tɛla menli ɛhye mɔ la.”

¹³ Na Mosisi hanle hilele Ɛdɛnkɛma kɛ, “Yigyibitima bade ɛhye, ɔluakɛ ɛdawɔ yɛɛ ɛvale wɔ tumi ɛyele bɛ ɛvile Yigyibiti a. Saa Yigyibitima te mɔɔ wɔva wɔyɛ wɔ menli ne la a,

¹⁴ bɛbaha bɛahile menli mɔɔ wɔ azɛlɛ ye azo la. O Ɛdɛnkɛma, bɛde kɛ ɛwɔ wɔ menli ne avinli, yɛɛ wɔ amungu ne keda bɛ nwo zo. Ɛbikye bɛ kpalɛ kpalɛ. Ewiazo ɛle amungu mpila ɛdumua bɛ nyunlu na nɔɔzo wɔayɛ senle mpila wɔalumua bɛ nyunlu.

¹⁵ Saa ɛku wɔ menli ne kɔsɔɔti a, maanle maanle mɔɔ ɛde wɔ nganeɛ la baha

¹⁶ kɛ ɛhunle wɔ menli ne wɔ fienemgbole ne anu, ɔboalekɛ wɔangola bɛ fa kɔ azɛlɛ ne mɔɔ ɛvale ɛbɔle bɛ ɛwɔkɛ kɛ ɛbava wɔamaa bɛ la azo.

¹⁷ Yemɔti Ɛdɛnkɛma, mesɛlɛ wɔ, kile yɛ wɔ tumi ne na di wɔ ɛwɔkɛ mɔɔ ɛbɔle kɛ,

¹⁸ ‘Medame Ɛdɛnkɛma, menva ɛya mgbane mgbane, melɛ ɛhulolɛ kpole, na mefa ɛtane nee mɛladonlɛ mekyɛ. Noko menrɛbu me nye menrɛgua zolɛ kɛ menwɔdea mralɛ nee nlɔnra toonwo ɔkɛdwu awolɛndoazo nsa nee nna ne anwo zo wɔ bɛ ze mɔ ɛtane ne mɔ ati,’ la azo.

¹⁹ Ɛdɛnkɛma, ɔlua wɔ ɛhulolɛ kpundii ne mɔɔ ɛngakyi ɛlɛ la ati, mesɛlɛ wɔ, fa menli ɛhye mɔ ɛtane ne kyɛ bɛ, kɛmɔ sumunli kɛ bɛvile Yigyibiti la, wɔva wɔhyɛ bɛ toonwo yeradwu ɛnɛ la.”

²⁰ Na Ɛdɛnkɛma zele kɛ, “Kɛmɔ ɛdawɔ wɔha la, meva bɛ ɛtane mehyɛ bɛ.

²¹ Noko meka, meka kɛ, sumunli kenle ala mɔɔ bɛfɛlɛ me Tease, na me anyunlunyia bayi azɛlɛ ye tɛkɛɛ la,

²² menli ɛhye mɔ mɔɔ ɛnwu me anyunlunyia ne nee nwanwane ninyɛne mɔɔ menyɛle wɔ Yigyibiti nee fienemgbole ne anu, noko bɛzɔ me bɛnlea toonwo fane bulu, na bɛandie me aneɛ la,

²³ nuhua ko bɔbɔ anye ba ɛnrɛnwu azɛlɛ ne mɔɔ menvale membɔle bɛ ze mɔ ɛwɔkɛ la azo; yɛɛ bɛdabɛ mɔɔ bɛkpole me la, bɛ nuhua ko bɔbɔ anye ba ɛnrɛnwu azɛlɛ ne azo.

²⁴ Na me sonvolɛ Kalɛbe ɛdeɛ asolo ye sunsum ne na yeli nɔhalɛ yemaa me la ati, mebava ye meahɔ azɛlɛ ne mɔɔ ɔdaye ɔhɔkpɔlale la azo, na ɔ bo zo amra badɛnla zolɛ kpɔkpɔ.

²⁵ Na kɛmɔ Amalɛkema nee Keenama dede bɔnza ne mɔ anu la, ɛhyema bɛzia bɛ nzi bɛhɔva Akaba Ebolo bo wɔ fienemgbole ne anu lɔ.”

Ɛdɛnkɛma tea menli ne wɔ bɛ ngehanleɛ ɛtane nwo

²⁶ Ɛdɛnkɛma zele Mosisi nee Aalɔn kɛ,

²⁷ “Kenle nyɛ yɛɛ munzule menli ɛhye mɔ fa adendɛ atia me a? Mede Yizilayɛma ɛdendɛlɛ mɔɔ bɛtendɛ bɛtia me la.

²⁸ Se bɛ kɛ: ‘Meka, meka kɛ, sumunli kenle ala mɔɔ bɛfɛlɛ me Tease la, mebayɛ mɔɔ bɛbiza la meamaa bɛ. Medame Ɛdɛnkɛma a mese a.

²⁹ Bɛbawu, bɛ avunli akponde fienemgbole ye anu. Sumunli kenle ala mɔɔ bɛtendɛ bɛtia me la, bɛ nuhua ko biala mɔɔ ɛli ɛvolɛ abulanwiɔ mɔɔ kɔ la agyakɛ ba ɛnrɛtia azɛlɛ ne azo.

³⁰ Menvale membɔle ɛwɔkɛ kɛ memaa bɛahɔdɛnla ɛkɛ, noko bɛ nuhua ko bɔbɔ agyakɛ ba ɛnrɛtia azɛlɛ ne azo, kyesɛ Gyɛfɛni ara nrenya Kalɛbe yɛɛ Nɛn ara nrenya Dwɔhyua ala.

³¹ Na bɛ mra ne mɔ mɔɔ bɛhanle kɛ bɛbadɔ donvula la, me nee bɛ bahɔ azɛlɛ ne mɔɔ bɛkpo la azo.

³² Na bɛmɛ, bɛbawu fienemgbole ye anu.

³³ Bɛ mra bahakyi mboaneneavolɛma, bɛaluolua fienemgbole ye anu toonwo ɛvolɛ abulanla. Nɔhalɛ mɔɔ bɛanli la ati, bɛbanwu amaneɛ toonwo kɔkpula kɛ bɛ bo kɛdu bɔkɔɔ la.

³⁴ Bɛbanwu bɛ ɛtane ne anwo amaneɛ toonwo ɛvolɛ abulanla, ɛvolɛ ko biala gyi ɛkɛ maa kenle ko wɔ kenle abulanla ne mɔɔ bɛvale bɛkpɔlale azɛlɛ ne la. Ɛhye bamaa bɛanwu kɛ me ɛyavalɛ si de la.

³⁵ Nɔhalɛ wienyi, bɛmɛ amumuyɛma mɔɔ bɛboɔboa bɛ nloa bɛho bɛtia me la, kɛ mebayɛ bɛ la ɛne. Bɛ nuhua ko biala bawu fienemgbole ye anu. Medame Ɛdɛnkɛma a mese a!’ ”

^36-37 Menli mɔɔ Mosisi zoanle bɛ manle bɛhɔkpɔlale azɛlɛ ne na bɛrabɔle nzekue bɛmanle ɛlɔne ne dendɛle tiale Ɛdɛnkɛma la, Ɛdɛnkɛma manle ewulenzane hunle bɛ wɔ ɔ nyunlu ɛkɛ ne ala.

³⁸ Busiama bulu nee nwiɔ ne, Dwɔhyua nee Kalɛbe ala a hale a.

Alumua mɔdenlebɔ kɛ bɛfa azɛlɛ ne

³⁹ Mɔɔ Mosisi hanle mɔɔ Ɛdɛnkɛma ɛha la hilele Yizilayɛma la, bɛzunle kpole kpalɛ.

⁴⁰ Ye aleɛbahye ne ala, bɛhɔle awoka ne mɔ azo kɛ bɛkaho bɛava azua mɔɔ gua zolɛ la. Bɛhanle kɛ, “Yɛboɔboa yɛ nwo yɛwie; yɛkɔ ɛleka ne mɔɔ Ɛdɛnkɛma ɛva ɛbɔ yɛ ɛwɔkɛ la, ɔluakɛ yɛyɛle ɛtane!”

⁴¹ Na Mosisi hanle kɛ, “Na ɛnee duzu ati yɛɛ akee bɛlɛbulu Ɛdɛnkɛma edwɛkɛ zo ɛ? Bɛnrɛli konim.

⁴² Bɛmmakɔ. Ɛdɛnkɛma nee bɛ ɛnlua, yemɔti bɛ kpɔvolɛma bali bɛ nwo zo konim.

⁴³ Saa bɛ nee Amalɛkema nee Keenama yia konle nu a, bɛ bie fee ɛnrɛha, ɔluakɛ bɛhakyi bɛ nzi bɛzi Ɛdɛnkɛma, yemɔti Ɛdɛnkɛma nee bɛ ɛnrɛhɔ.”

⁴⁴ Na bɛhehanle bɛ nwo kɛ bɛkɔ azua mɔɔ gua awoka ne mɔ azo lɔ la azo wɔ mekɛ mɔɔ Ɛdɛnkɛma Ngyekyeleɛ Ɛlɛka ne anzɛɛ Mosisi andu ɔ bo wɔ azokoɛleɛ ne la.

⁴⁵ Na Amalɛkema nee Keenama mɔɔ dede azua mɔɔ gua awoka ne mɔ azo la dwule aze ratetale bɛ lile bɛ nwo zo konim, na bɛvoanle bɛ toonwo bɛhɔdwule Hɔɔma.