Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 12 - BAEBOLO ANZƐƐ BULUKU NWUANZANWUANZA

Bɛhwe Meleam anzo

¹ Ɛnee Mosisi ɛgya Kɛhye raalɛ, na Meleam nee Aalɔn dendɛle tiale ye wɔ nwolɛ.

² Bɛhanle kɛ, “Na Mosisi angomekye ala a Ɛdɛnkɛma ɛlua ɔ nwo zo ɛdendɛ a? Na ɔtɛduale yɛdayɛ noko yɛ nwo zo ɔtɛtendɛle ɔ?” Na Ɛdɛnkɛma dele mɔɔ bɛhanle la.

³ (Nɔhalɛ nu, Mosisi le bɛlɛvolɛ. Ɔle bɛlɛvolɛ ɔtɛla dasanli biala mɔɔ wɔ aleɛabo la.)

⁴ Arɛlevilɛ nu, Ɛdɛnkɛma zele Mosisi, Aalɔn nee Meleam kɛ, “Mekpondɛ bɛdabɛ menli nsa ye wɔ Ɛdɛnkɛma Ndanlɛ Sua ne anu.” Na bɛmɛ nsa ne bɛhɔle.

⁵ Na Ɛdɛnkɛma luale amungu mpila nu dwule aze. Ɔragyinlanle Ndanlɛ Sua ne anlenkɛ ne anloa na ɔvɛlɛle Aalɔn nee Meleam kɛ bɛ mu nwiɔ bɛrɛla bɛ nyunlu.

⁶ Na Ɛdɛnkɛma zele bɛ kɛ, “Bɛdie mɔɔ meka la! Saa Nyamenle kpɔmanvolɛ ba bɛ avinli a, medame Ɛdɛnkɛma a meye me nwo mekile ye wɔ ɛnyelɛzodeɛnwunlɛ nu, na metendɛ mekile ye wɔ ɛlalɛ nu a.

⁷ Na me sonvolɛ Mosisi ɛdeɛ, asolo ye, meva ye mezie me menli Yizilayɛma kɔsɔɔti anloa.

⁸ Yemɔti meye me nwo ali me nee ye yɛ mu nwiɔ yɛtendɛ bɔkɔɔ mɔɔ mendo ye agyiba biala a. Yenwu medame Ɛdɛnkɛma me sɔhovolɛ bɔbɔ. Duzu ati bɔbɔ yɛɛ ɔwɔ kɛ bɛtendɛ bɛtia me sonvolɛ Mosisi a?”

⁹ Ɛdɛnkɛma vale bɛ nwo ɛya na ɔgyakyile bɛ ɔhɔle.

¹⁰ Na mɔɔ amungu ne hwenle ɔ nwo vile Ndanlɛ Sua ne anu la, ɛnee nwonane nu ewule ɛzulolɛ bie ɛdila Meleam ɛmaa ɔ nwo ɛyɛ nwohyee kɛ ezukɔtweaba. Aalɔn dole ɔ nye nleanle Meleam, na ɔnwunle kɛ nwonane nu ewule ɛzulolɛ bie ɛdila ye.

¹¹ Na ɔhanle ɔhilele Mosisi kɛ, “O me menle, yɛli ngoaseasɛm, yɛyɛ ɛtane bɔbɔ ɛdeɛ, noko mmamaa yɛnwu amaneɛ ɛhye.

¹² Mmamaa Meleam yɛ kɛ sonla mɔɔ bɛkawo ye la ɛnee yewu bɛ kunlu na ye foa ko ɛnrinzi ɛhɔ la.”

¹³ Na Mosisi zunle vɛlɛle Ɛdɛnkɛma kɛ, “O Nyamenle, mebodo wɔ, yɛ ye ayile.”

¹⁴ Na Ɛdɛnkɛma zele Mosisi kɛ, “Saa ɔ ze a dole nyɛlɛ ɔ nyunlu a, anrɛɛ ye anyiemgba ɛnrɛdoa ye toonwo kenle nsuu ɔ? Bɛye ye azokoɛleɛ ɛkɛ bɛmaa ɔdɛnla kandiba nehane kenle nsuu; kenle nsuu ne dwu a, bɛmaa ɔrɛla azokoɛleɛ ne bieko.”

¹⁵ Yemɔti bɛyele Meleam bɛhɔle azokoɛleɛ ne kandiba na ɔlale lɔ toonwo kenle nsuu. Na menli ne andu bɛ bo toonwo bɛvale Meleam bɛrale azokoɛleɛ ɛkɛ ne bieko.

¹⁶ Nzinlii bɛdule bɛ bo bɛvile Hazilo na bɛhɔyɛle azokoɛleɛ wɔ Pɛlan fienemgbole ne anu.