Nolo 7 - BAEBOLO ANZƐƐ BULUKU NWUANZANWUANZA

Ɛbɛlabɔlɛ nwo adwenleadwenle

¹ Dumamɔlɛ kpalɛ le kpalɛ tɛla nwole evuanlɛ mɔɔ sonle bolɛ la; yɛɛ ewule kenle le kpalɛ tɛla awolɛ kenle.

² Ɔle kpalɛ kɛ ɛkɛhɔ awuke mɔɔ bɛlɛdi nyane nu la anu tɛla kɛ ɛkɛhɔ awuke mɔɔ bɛlɛto ɛkponle wɔ nu la anu, ɔluakɛ menli kɔsɔɔti awieleɛ ɛne, na anyewɔzoamra bava azie bɛ ti anu.

³ Nyanelilɛ le kpalɛ tɛla ɛzelekɛ, ɔluakɛ ɔmaa sonla nyunlu yɛ alɔbɔlɛ ɛdeɛ, noko ɔmaa wɔ ndelebɛbo yɛ kpole.

⁴ Nrɛlɛbɛvolɛ dwenle awuke mɔɔ nyanelilɛ wɔ nu la anwo. Koasea dwenle awuke mɔɔ fɛlɛkolilɛ wɔ nu la anwo.

⁵ Ɔle kpalɛ kɛ sonla kɛmaa nrɛlɛbɛvolɛma kɛhwi ɔ nyunlu tɛla kɛ ɔkɛdie ahoasea edwɛndolɛ.

⁶ Saa koasea sele a, ɔle kɛ mbowule ɛyɛne ɛlɛtite senle nu la. Ɛhye noko le debie mgbane.

⁷ Nɔhalɛ, nzisi maa nrɛlɛbɛvolɛ yɛ koasea, yɛɛ ndoloboa ɛlielɛ sɛkye subane.

⁸ Debie biala awieleɛ le kpalɛ tɛla ye mɔlebɛbo; yɛɛ abotanezilɛ le kpalɛ tɛla mgbanyizonleyɛlɛ.

⁹ Mmafa ɛya ndɛndɛ, ɔluakɛ koasea a fa ɛya sie ye nu a.

¹⁰ Mmabiza kɛ, “Duzu ati a mekɛ mɔɔ ɛze ɛhɔ la le kpalɛ tɛla adwuleso mekɛ ye ɛ?” Ɔluakɛ nrɛlɛbɛ biala ɛnle nu kɛ ɛkɛbiza ɛhye.

¹¹ Ɔle kpalɛ kɛ sonla mɔɔ lɛ agyadeɛ la kɛnwu nrɛlɛbɛ; ɔle nvasoɛ ɔmaa menli mɔɔ de ngoane nu la.

¹² Ɔluakɛ nrɛlɛbɛ kola bɔ sonla nwo bane kɛ ezukoa la. Yɛɛ adwenlebukelɛ nwo nvasoɛ a le kɛ nrɛlɛbɛ bɔ mɔɔ lɛ ye la anwo bane.

¹³ Dwenle mɔɔ Nyamenle ɛyɛ la anwo. Nwane a kɛhola mɔɔ yehyeɛhyea ye la tenrɛdenrɛ a?

¹⁴ Wɔ ɛkpazilɛ mekɛ nu, di fɛlɛko, yɛɛ saa ehyia to wɔ a, dwenle na kakye kɛ Nyamenle a maa gyinlabelɛ nwiɔ ne ba a, amaa sonla annwu debie biala mɔɔ bazi ɔ nzi la.

¹⁵ Wɔ me ɛbɛla mekɛ mgbane ɛhye anu, menwu debie biala; sonla tenlene wu ye tenleneyɛlɛ nu, yɛɛ amumuyɛnli ngoane wa wɔ ye munzule ɛbɛlabɔlɛ nu.

¹⁶ Yemɔti mmayɛ kpalɛ somasoma, yɛɛ mmanwu nrɛlɛbɛ somasoma; duzu ati a ɛkɛzɛkye ɛ nwo a?

¹⁷ Mmayɛ amumuyɛ somasoma, yɛɛ mmayɛ koasea. Duzu ati a ɛkɛhu ɛ nwo na wɔ ewule mekɛ adwu a?

¹⁸ Saa ɛsɔ debie ɛhye anu a, mmagyakyi ko ne anu, ɔluakɛ sonla mɔɔ sulo Nyamenle la bavi ɔ muala anu.

¹⁹ Nrɛlɛbɛ maa nrɛlɛbɛvolɛ anwosesebɛ tɛla menli bulu mɔɔ sie suakpole ko la.

²⁰ Nɔhalɛ, tenlenenli biala ɛnle azɛlɛ ye azo mɔɔ kpalɛ ngome ala a ɔyɛ na ɔnyɛ ɛtane ɛlɛ a.

²¹ Mmafa wɔ adwenle ɛkɔ edwɛkɛ kɔsɔɔti mɔɔ menli ka la azo anrɛɛ ɛkɛde kɛ wɔ sonvolɛ ɛlɛbɔ wɔ sasa;

²² ɛze ye wienyi kɛ mekɛ dɔɔnwo ne ala ɛdawɔ wɔbɔ menli sasa.

²³ Meva nrɛlɛbɛ mezɔ ɛhye mɔ amuala menlea. Menganle kɛ, “Menyɛle kɛ meyɛ nrɛlɛbɛvolɛ, noko meannwu nrɛlɛbɛ.”

²⁴ Mɔɔ wɔ ɛkɛ la, wɔ moa, yɛɛ mɔɔ le kuma la, le kuma kuloonwu; nwane a kɛhola kɛde ɔ bo a?

²⁵ Menyɛle me adwenle kɛ menea, meavedevede nu na meakpondɛ nrɛlɛbɛ yɛɛ ninyɛne kɔsɔɔti abo, na meanwu atisesebɛ mɔɔ le ngoaseadeyɛlɛ nee koaseayɛlɛ mɔɔ le ɛzɛlɛde la.

²⁶ Menwunle debie mɔɔ yɛ ɛzulolɛ tɛla ewule la; yemɔ a le raalɛ mɔɔ ye ɛhulolɛ le kɛ ɛhane anzɛɛ avonle, na ɔ sa mɔɔ ɔfa ɔbɛla ye kulovolɛ la le kɛ nwɔnzɔnwɔnzɔ la. Sonla mɔɔ sɔ Nyamenle anye la kola die ɔ nwo; na ɛtanevolɛ ɛdeɛ ɔkye ye.

²⁷ Bɛdie, kɛ Nolobɔvo ne se la ɛne, menwunle ɛhye ngyikyi ngyikyi wɔ mekɛ mɔɔ ɛnee melɛkpondɛ bɛ nyelebɛnloa la.

²⁸ Mekpondɛkpondɛ nyelebɛnloa fofolɛ, noko metɛnyianle bie. Menwunle nrenya ko wɔ mrenya apenle avinli mɔɔ medi ye eni a, na wɔ mraalɛ ne mɔ avinli, meannyia bie.

²⁹ Debie mɔɔ mezukoa la ala ɛne: Nyamenle bɔle sonla fɔɔnwo, na sonla ɛbɔ adwenle dɔɔnwo ɛmaa ɛbɛla ɛyɛ kpomgbondee.