Nolo 1 - BAEBOLO ANZƐƐ BULUKU NWUANZANWUANZA

Ɛbɛlabɔlɛ le mgbane

¹ Nolobɔvo ne, Devidi ara nrenya ne, mɔɔ le Gyɛlusalɛm belemgbunli ne edwɛkɛ ne ɛne.

² Nolobɔvo ne se, ɔle mgbane, mgbane, ɛbɛlabɔlɛ le mgbane, ɔ muala le mgbane.

³ Duzu nvasoɛ a sonla nyia ye wɔ ɛvɛlɛ kpole ye mɔɔ ɔfɛ aleɛabo la anwo a?

⁴ Awolɛndoazo ko kɔ, awolɛndoazo ko ba, noko kɛ ewiade ne de ala la a ɔde a.

⁵ Sɛnzɛne ne tudu, sɛnzɛne ne tɔ, na ɔka ɔ nwo waa ɔkɔ ɛleka mɔɔ ɔtudu la.

⁶ Anwoma ne bɔ kɔ nyiakɛ, ɔpɛne ɔ nwo ɔkɔdi sɔlɔ; ɔpɛnepɛne ɔ nwo toonwo na eza ɔbadua ɔ bo zo ne bieko.

⁷ Azule kɔsɔɔti se gua nyevile nu, noko nyevile ne ɛnyi ɛlɛ; bɛsia bɛkɔ ɛleka mɔɔ bɛbɔ bɛ bo la, na bɛbɔ ɔ bo bɛse bieko.

⁸ Ninyɛne kɔsɔɔti wie ɛvɛlɛ, ɛvɛlɛ mɔɔ dasanli ɛnrɛhola ye ka a. Ɛnyelɛ nea a ɔnvɛ, yɛɛ ɛnzonlɛ tie a ɔnyi.

⁹ Mɔɔ ɛzi la yɛɛ bazi a, yɛɛ mɔɔ bɛyɛ la yɛɛ bɛbayɛ a; debie fofolɛ biala ɛnle aleɛabo.

¹⁰ Asoo debie wɔ ɛkɛ ne mɔɔ bɛha kɛ, “Bɛnlea, ɛhye le fofolɛ” ɔ? Ɔwɔ ɛkɛ ne dɛbadɛba kolaa na bɛawo yɛ.

¹¹ Awie biala ɛngakye mɔɔ ɛze ɛhɔ la, yɛɛ awie biala ɛnrɛhakye ninyɛne mɔɔ nzinlii basisi menli mɔɔ bara la mekɛ zo la.

Adwenlekilevo ne anwubielɛ

¹² Medame Nolobɔvo, medɛnla Gyɛlusalɛm meli Yizilayɛ belemgbunli.

¹³ Membɔle mɔdenle kɛ mefa nrɛlɛbɛ meavedevede ninyɛne nu meazukoa debie biala mɔɔ bɛyɛ ye ewiade ye anu la. Na menwunle kɛ ɔle gyima mɔɔ ye ɛyɛlɛ ɛnyɛ fɛ na Nyamenle ɛva ɛmaa menli kɛ bɛyɛ a.

¹⁴ Menwu debie biala mɔɔ bɛyɛ ye aleɛabo la, na nea, ɔ muala le mgbane. Ɔle kɛ ɛlɛkye anwoma la.

¹⁵ Debie mɔɔ kyea la bɛtenrɛ ye a ɔndenrɛ, yɛɛ debie mɔɔ ɛnle ɛkɛ la bɛndia.

¹⁶ Menganle mengilele me nwo kɛ, “Menwu nrɛlɛbɛ kpole kpalɛ medɛla belemgbunli biala mɔɔ ɛli ebia wɔ Gyɛlusalɛm la; yɛɛ me ti ɛdi nrɛlɛbɛ nee adwenle nu.”

¹⁷ Membɔle mɔdenle kɛ menea ngakyile mɔɔ wɔ nrɛlɛbɛ, ɛzɛlɛde, yɛɛ ngoaseade nu la. Na menwunle kɛ ɛhye noko le kɛ ɛlɛkye anwoma la.

¹⁸ Ɔluakɛ nrɛlɛbɛ dɔɔnwo nee abodelɛ dɔɔnwo a lua a, yɛɛ awie biala mɔɔ ye adwenle kɛbuke dɔɔnwo la twehwe nyanelilɛ dɔɔnwo maa ɔ nwo.