Edwɛkpa ne kɛmɔ Mateyu hɛlɛle la 8 - BAEBOLO ANZƐƐ BULUKU NWUANZANWUANZA

Gyisɛse yɛ nrenya bie ayile

¹ Gyisɛse vi boka ne azo dwule la, menli dɔɔnwo doale ye.

² Na nea, kokobɛvolɛ bie rahotole ɔ nyunlu ɛkɛ ne na ɔzele ye kɛ, “Yɛmenle, saa ɔyɛ wɔ ɛhulolɛ a, ɛkola ɛmaa me nwo sa.”

³ Gyisɛse denrɛle ɔ sa zɔle ye na ɔbuale ye kɛ, “Mekulo! Ɛ nwo ɛza!” Na ɛkɛ ne ala ye kokobɛ ne hɔle bɔkɔɔ.

⁴ Na Gyisɛse bɔle ɔ nloa kɛ, “Nea, mmabɔ zo ɛkile awie biala. Kɔ na kɔva ɛ nwo kile sɛlɛvolɛ ne maa ɔnleɛnlea ɛ nwo, na bɔ azu ne mɔɔ Mosisi hyehyɛle dole ɛkɛ ne la maa awie biala ɛnwu kɛ ɛ nwo ɛza.”

Gyisɛse yɛ Wulomu sogya kpanyinli bie sonvolɛ ayile

⁵ Mɔɔ Gyisɛse dwule Kapɛnayɛm la, Wulomu sogya kpanyinli bie rayiale ye na ɔbodole ye kɛ ɔboa ye. Ɔse,

⁶ “Yɛmenle, me sonvolɛ ko la ɛkpa zo mɔɔ ye ewule ne yɛ se kpalɛ a. Yedwidwe na ɔlɛnwu amaneɛ somaa.”

⁷ Gyisɛse zele ye kɛ, “Mebara mearayɛ ye ayile.”

⁸ Sogya kpanyinli ne buale ye kɛ, “Yɛmenle, kyɛkyɛ! Menfɛta kɛ ɛkɛra me sua nu. Wɔmɔ ka ɛ nloa edwɛkɛ ne ala na me sonvolɛ ne kɛde kpɔkɛ.

⁹ Melɛ ɛlɔnema wɔ me bo suzuamgba, meka mekile bie kɛ, ‘kɔ’ a, ɔkɔ; meka mekile bie noko kɛ, ‘bɛla’ a, ɔba; yɛɛ meka mekile me akɛlɛ kɛ, ‘yɛ ɛhye’ a, ɔyɛ. Noko medame mele sonla mɔɔ mewɔ menlenlɛ bo a.”

¹⁰ Gyisɛse dele ɛhye la ɔzinle ɔ nwo, na ɔzele bɛdabɛ mɔɔ bɛdoa ye la kɛ, “Nɔhalɛ, metɛnwunle awie mɔɔ lɛ diedi zɛhae bie la ɛlɛ, bɔbɔ wɔ Yizilayɛma avinli.

¹¹ Bɛhakye ɛhye: Menli dɔɔnwo vi aduduleɛ nee adɔleɛ bara bɛ nee bɛ nlenya mɔ Ebileham nee Ayezeke nee Gyekɔbo aradɛnla ɛkponle nwo wɔ Anwuma Belemgbunlililɛ nu.

¹² Na bɛbavuandi bɛdabɛ mɔɔ bɛfɛlɛ bɛ nwo kɛ bɛle Anwuma Belemgbunlililɛ ne anwo nlɔnra la bɛagua awozinli ne anu; na ɛkɛ ne, bɛbazu bɛadedɛ bɛ nwo bonrane nu.”

¹³ Akee Gyisɛse zele sogya kpanyinli ne kɛ, “Kɔ sua nu na wɔ diedi ne mɔɔ ɛlɛ la ɛyɛ zɔhane ɛmaa wɔ.” Na sogya kpanyinli ne sonvolɛ ne dele kpɔkɛ wɔ mekɛ ne anu ala.

Gyisɛse yɛ menli dɔɔnwo ayile

¹⁴ Gyisɛse hɔle Pita sua nu, na ɔhɔdole kɛ Pita aye ne ɔ nli ne anwo ɛdo ye na ɛyɛlɛyɛlɛ gyi ɔ nwo.

¹⁵ Ɔzɔle ɔ sa, na ɛkɛ ne ala ɔdele kpɔkɛ, na ɔdwazole ɔkpondɛle debie ɔmanle bɛ.

¹⁶ Ye nɔsolɛ nu, bɛvale menli dɔɔnwo mɔɔ sunsum ɛtane ɛva bɛ la bɛrɛlɛle ye na ɔvale ɔ nloa edwɛkɛ ɔdudule bɛ, na ɔyɛle wuleravolɛma dɔɔnwo noko ayile.

¹⁷ Ɔyɛle ɛhye amaa mɔɔ Nyamenle kpɔmanvolɛ Ayezaya hanle la ayɛ nɔhalɛ kɛ, “Ɔdaye mumua ne ɔzoale yɛ anwondolɛ nee yɛ nwo ewule ɔhɔle.”

Menli mɔɔ bayɛ Gyisɛse ɛdoavolɛma la

¹⁸ Gyisɛse nwunle kɛ menli dɔɔnwo ɛbɔ ɛyia ye, na ɔzele ye ɛdoavolɛma ne kɛ bɛmaa bɛpɛ bɛhɔ tandane ne anzi lɔ.

¹⁹ Mɛla kilehilevolɛ bie rale ɔ nwo ɛkɛ ne razele ye kɛ, “Kilehilevolɛ, ɛleka biala mɔɔ ɛkɔ la me nee wɔ kɛhɔ.”

²⁰ Gyisɛse zele ye kɛ, “Ɛzonlɛ lɛ bɛ mbɔne, yɛɛ nloma lɛ bɛ sane, na mame, Sonla Ra, menlɛ ɛleka mɔɔ meto me ti a.”

²¹ Ɛdoavolɛma ne mɔ ko zele Gyisɛse kɛ, “Awulae, maa menlumua mengɔnzie egya kolaa na meara.”

²² Gyisɛse zele ye kɛ, “Wɔmɔ maa yɛhɔ, na gyakyi bɛdabɛ mɔɔ bɛwu la maa bɛzie bɛ avunli.”

Gyisɛse maa ahumu agua

²³ Gyisɛse vole ɛlɛne nu, na ye ɛdoavolɛma ne mɔ vole bie na bɛzile nu kɛ bɛkɔ.

²⁴ Ahumu kpole bie dule tandane ne anye manle azɛlɛkye ne hedale ɛlɛne ne azo; na ɛnee Gyisɛse ɛlafe.

²⁵ Ɛdoavolɛma ne hɔdunwuele ye na bɛzele kɛ, “Awulae, die yɛ na yɛwie wu!”

²⁶ Gyisɛse zele bɛ kɛ, “Duzu ati a bɛle avoanvoanle zɛhae ɛ? Bɛ diedi le ekyi somaa!” Akee ɔdwazole na ɔdeanle anwoma ne nee azɛlɛkye ne mɔ nu na bɛguale diinyi.

²⁷ Ɛhye zinle menli ne mɔ anwo na bɛzele kɛ, “Duzu sonla a le ɛhye, mɔɔ anwoma nee nyevile bɔbɔ tie ye a?”

Gyisɛse tu menli nwiɔ anwo sunsum ɛtane

²⁸ Mɔɔ Gyisɛse dwule tandane ne anzi lɔ wɔ Gadala maanzinli nu la, menli nwiɔ mɔɔ sunsum ɛtane ɛva bɛ la vi azie ne azo rayiale ye. Sunsum ɛtane ne mɔ ɛmaa menli ɛhye mɔ ɛbɔ ɛlane, na awie biala ɛngola ɛmpɛ nu adenle ne anu.

²⁹ Na bɛdeanle nu kɛ, “Wɔmɔ Nyamenle Ara, duzu yɛɛ ɛkpondɛ wɔ yɛ ɛkɛ ne a? Wɔra kɛ ɛbadea yɛ kolaa na kenle ne adwu ɔ?”

³⁰ Ɛnee agbolike kpolane bie bikye ɛkɛ ne na bɛlɛdidi,

³¹ yemɔti sunsum ɛtane ne mɔ bodole Gyisɛse kɛ, “Saa ɛtu yɛ a, ɛnee maa yɛhɔwolo agbolike ne mɔ.”

³² Gyisɛse zele bɛ kɛ, “Bɛhɔ ɛ!” Na sunsum ɛtane ne mɔ vile menli ne mɔ anwo dule na bɛhɔwolole agbolike ne mɔ. Na agbolike kpolane ne amuala dule twi hɔguale tandane ne anu na bɛwule.

³³ Menli mɔɔ ɛlɛnea agbolike ne mɔ la nriandile hɔle suakpole ne azo hɔhanle mɔɔ ɛzi la amuala, nee mɔɔ ɛzi menli ne mɔɔ sunsum ɛtane ne mɔ vale bɛ la anwo zo la noko.

³⁴ Yemɔti suakpole ne azo amra amuala rayiale Gyisɛse; na mɔɔ bɛnwunle ye la bɛzɛlɛle ye kɛ ɔvi bɛ maanle ne anu ɔhɔ.