Edwɛkpa ne kɛmɔ Mateyu hɛlɛle la 3 - BAEBOLO ANZƐƐ BULUKU NWUANZANWUANZA

Dwɔn Sɔnevolɛ ne bɔ nolo

¹ Mekɛ ne anu Dwɔn Sɔnevolɛ ne rale Dwudiya fienemgbole ne anu na ɔbɔle nolo kɛ,

² “Bɛnlu bɛ nwo na Anwuma Belemgbunlililɛ ne ɛbikye!”

³ Dwɔn ɛhye a Nyamenle kpɔmanvolɛ Ayezaya hanle ɔ nwo edwɛkɛ kɛ, “Awie ɛlɛtea nu wɔ fienemgbole ne anu kɛ, ‘Bɛziezie Awulae adenle ne, bɛdenrɛdenrɛ ye ndenle ne mɔ.’ ”

⁴ Dwɔn wula tɛladeɛ mɔɔ bɛva afunlumu enrinli a bɛnwo la, na yeva nwoma akyeso yehye ɔ nze zo, yɛɛ ye aleɛ a le abɛbɛ nee wolɛ.

⁵ Menli dɔɔnwo vi suakpole Gyɛlusalɛm azo, nee Dwudiya maanzinli ne anu amuala, yɛɛ azua mɔɔ gua Azule Dwɔdan ne anloa la amuala azo rale Dwɔn anwo ɛkɛ ne;

⁶ bɛrahanle bɛ ɛtane na ɔzɔnenle bɛ wɔ Azule Dwɔdan ne anu.

⁷ Dwɔn nwunle kɛ menli dɔɔnwo vi Falasiima nee Sadusiima fane ne mɔ anu ɛlɛba bɛamaa bɛazɔne bɛ la, ɔzele bɛ kɛ, “Bɛmɛ nwɔlɛ! Nwane a zele bɛ kɛ bɛnriandi bɛvi Nyamenle ndeanlɛ ne mɔɔ bara la anwo ɛ?

⁸ Bɛbɔ ɛbɛla kpalɛ mɔɔ kile kɛ bɛnlu bɛ nwo la.

⁹ Bɛmmadwenle bɛka kɛ, ‘Yɛmɛ yɛ nlenya a le Ebileham.’ Meka meahile bɛ kɛ Nyamenle kola maa awolɛ ɛhye mɔ dwazo yɛ Ebileham nlɔnra.

¹⁰ Bɛzi akuma mɔɔ bɛfa bɛadudu mbaka wɔ bɛ ndinli bo a. Ɛhye ati baka biala mɔɔ anzo ma kpalɛ la bɛkɛdu ye bɛkɛdo na bɛkɛvuandi ye bɛkɛdo senle nu.

¹¹ Mame mefa nzule a mesɔne bɛ a, amaa bɛanwu kɛ bɛnlu bɛ nwo, na awie bie vi me nzi ɛlɛba mɔɔ yemɔ ɔle kpole ɔtɛla me a. Menfɛta kɛ menwɔzoa ye mgbɔlaboa bɔbɔ. Na yemɔ, ɔbava Sunsum Nwuanzanwuanza ne nee ndɛnebualɛ senle ne a yeazɔne a.

¹² Ɔlɛ ye akegyebɛ ɔ sa nu; ɔbava yeahegye ma ne amuala; ɔbaboɔboa kpalɛ ne anloa yeahɔgua ye bonwolo ne azo na yeayela abonle ne wɔ senle mɔɔ ɛnnu ɛlɛ la anu.”

Gyisɛse ɛzɔnenlɛ ne

¹³ Gyisɛse vi Galeli maanzinli nu rale Azule Dwɔdan ne anloa wɔ Dwɔn anwo ɛkɛ ne kɛ ɔzɔne ye.

¹⁴ Na Dwɔn hanle kɛ, “Menfɛta kɛ menwɔzɔne wɔ. Wɔmɔ a ɔwɔ kɛ ɛsɔne me a, na duzu ati a wɔra kɛ menzɔne wɔ ɛ?”

¹⁵ Gyisɛse buale kɛ, “Maa ɔyɛ zɔhane kɛkala. Ɔluakɛ ɔle kpalɛ kɛ yɛfa zɛhae adenle zo yɛyɛ mɔɔ Nyamenle kpondɛ kɛ yɛyɛ la.” Zɔhane ati Dwɔn kponlenle zolɛ na ɔzɔnenle ye.

¹⁶ Mɔɔ bɛzɔnenle Gyisɛse bɛwiele la, ɔvi azule ne anu ɔvole file zo ndɛndɛ ne ala. Anwuma bukele na ɔnwunle kɛ Nyamenle Sunsum ne ɛlɛdwu kɛ abubule la na ɔrazinzele ɔ nwo zo.

¹⁷ Na ɛnelɛ bie vi anwuma zele kɛ, “Ɛhye a le me Ra mɔɔ mekulo ye la. Me nye die ɔ nwo kpole.”