Edwɛkpa ne kɛmɔ Mateyu hɛlɛle la 27 - BAEBOLO ANZƐƐ BULUKU NWUANZANWUANZA

Bɛva Gyisɛse bɛhɔmaa Paelɛte

¹ Aleɛ hyenle nwonlomɔ mangyee ne la, sɛlɛvolɛ mgbanyinli ne mɔ amuala nee Dwuu mgbanyima ne mɔ bɔle kpɔkɛ kɛ bɛmaa bɛahu Gyisɛse.

² Bɛguale ye anga na bɛvale ye bɛhɔmanle Paelɛte mɔɔ le Wulomu amɛnlado ne.

Dwudase ewule

³ Mɔɔ Dwudase mɔɔ yele ye manle la nwunle kɛ bɛbu Gyisɛse ewule fɔlɛ la, ɔnlunle ɔ nwo na ɔvale dwɛtɛ fufule abulasa ne ɔhɔmanle sɛlɛvolɛ mgbanyinli ne nee mgbanyima ne mɔ

⁴ na ɔzele bɛ kɛ, “Meyɛ ɛtane kɛ meye sonla mɔɔ ɛnze nwolɛ bie la memaa kɛ bɛhu ye a!” Bɛbuale ye kɛ, “Na ɛhye fane yɛ nwo ɔ? Ɛdawɔ wɔ edwɛkɛ ɔ!”

⁵ Dwudase vuandinle ezukoa ne guale Ɛzonlenlɛ Sua ne anu na ɔhɔle ɔhɔzɔle ɔ kɔme nyɛma.

⁶ Sɛlɛvolɛ mgbanyinli ne mɔ sesale ezukoa ne na bɛhanle kɛ, “Ɛhye le mogya ezukoa, yɛɛ ɔtia yɛ mɛla ne kɛ yɛkɛva yɛkɛgua Ɛzonlenlɛ Sua ne gya ne anu.”

⁷ Yemɔti bɛdwenlenle nwolɛ na bɛvale ezukoa ne bɛhɔdɔle azɛlɛ mɔɔ awie bie nwo ye mbuakɛ nee ɛyɛba wɔ zo la, bɛvale bɛyɛle nyɛvolɛ azie.

⁸ Na ɛnɛ nee ɛnɛ ala, bɛfɛlɛ ye “Mogya Azɛlɛ.”

⁹ Ɛhye manle edwɛkɛ ne mɔɔ Nyamenle kpɔmanvolɛ Gyɛlɛmaya hanle la yɛle nɔhalɛ kɛ, “Bɛvale dwɛtɛ fufule abulasa ne, mɔɔ le ɔ ti ezukoa ne, mɔɔ Yizilayɛma bie mɔ ɛkponle zo ɛva ɛdɔ ye la

¹⁰ bɛdɔle azɛlɛ bɛvile awie bie mɔɔ nwo mbuakɛ nee ɛyɛba wɔ zo la ɛkɛ, kɛmɔ Awulae hanle hilele me ala la.”

Paelɛte bizebiza Gyisɛse edwɛkɛ

¹¹ Bɛvale Gyisɛse bɛraziele amɛnlado ne anyunlu na amɛnlado ne bizale ye kɛ, “Wɔmɔ a ɛle Dwuuma belemgbunli ne la ɔ?” Gyisɛse buale ye kɛ, “Yemɔ ne ala a wɔha la.”

¹² Na mɔɔ sɛlɛvolɛ mgbanyinli ne nee mgbanyima ne mɔ toɔdoa ye la, yeandɛ ɔ nloa anu.

¹³ Yemɔti Paelɛte zele ye kɛ, “Ɛnde mɔɔ bɛlɛkeha bɛatia wɔ la ɔ?”

¹⁴ Na Gyisɛse ambua ye, yɛɛ yeanye ndoanlɛ ko bɔbɔ anloa, na ɔzinle amɛnlado ne anwo kpole.

Bɛbu Gyisɛse ewule fɔlɛ

¹⁵ Akpabɛnwo Ɛvoyia ne dwu zo a, amɛnlado ne ta ye pilizanli ko mɔɔ menli ne kɛbiza la maa bɛ.

¹⁶ Mekɛ ne anu ɛnee pilizanli maamɔvo ko wɔ ɛkɛ ne. Bɛfɛlɛ ye Gyisɛse Balabase.

¹⁷ Yemɔti mɔɔ menli ne yiale la, Paelɛte bizale bɛ kɛ, “Boni a bɛkulo kɛ meye ye memaa bɛ a, Gyisɛse Balabase anzɛɛ Gyisɛse ne mɔɔ bɛfɛlɛ ye Kelaese ne la?”

¹⁸ Ɔluakɛ Paelɛte ze ye wienyi kɛ ɛkpɔlɛ ti yɛɛ menli ne ɛva Gyisɛse ɛrɛlɛ ye a.

¹⁹ Eza mɔɔ ɛnee Paelɛte de ye ndɛnebualɛ ebia ne anu la, ɔ ye dole ye nrɛlaleɛ kɛ, “Mmayɛ nrenya ne ɛhwee na ɔnze nwolɛ bie. Ɔlua yemɔ ɔ ti, menwu ɛzulolɛ kpole ɛnɛ nɔe wɔ ɛlalɛ nu.”

²⁰ Sɛlɛvolɛ mgbanyinli ne nee mgbanyima ne mɔ lile wulale menli ne kɛ bɛbiza bɛlie Balabase na bɛmaa bɛhu Gyisɛse.

²¹ Paelɛte bizale bɛ bieko kɛ, “Menli nwiɔ ɛhye, boni a bɛkulo kɛ meye ye memaa bɛ a?” Bɛbuale ye kɛ, “Balabase ɔ!”

²² Paelɛte bizale bɛ kɛ, “Na kɛ menyɛ Gyisɛse ne mɔɔ bɛfɛlɛ ye Kelaese ne la ɛ?” Na bɛ muala bɛhanle kɛ, “Bɔ ye meanubaka nu!”

²³ Paelɛte bizale bɛ kɛ, “Kɛmɔti ɛ, duzu ɛtane a yeyɛ a?” Na bɛdeɛdeanle nuhua kpole kɛ, “Bɔ ye meanubaka nu!”

²⁴ Mɔɔ Paelɛte nwunle kɛ ɔyɛ nwolɛ bie ala a ɔnrɛyɛ boɛ, na ɔlua zo nzaka kpondɛ ara la, ɔvale nzule ɔnrinzinle ɔ sa anwo wɔ menli ne amuala anyunlu ɛkɛ ne na ɔzele kɛ, “Menze sonla ɛhye ewule ne anwo bie; menli nwolɛ ɛzonle! Bɛdabɛ bɛ edwɛkɛ ɔ!”

²⁵ Na bɛ muala bɛdeanle nu bɛzele kɛ, “Maa ye mogya ɛgua yɛdayɛ nee yɛ mra ati zo!”

²⁶ Akee Paelɛte yele Balabase manle bɛ; ɔmanle bɛbilale Gyisɛse empele na ɔyele ye ɔmanle bɛ kɛ bɛhɔbɔ ye meanubaka nu.

Sogyama golo Gyisɛse anwo

²⁷ Paelɛte sogyama ne vale Gyisɛse hɔle amɛnlado ne suakunlu ɛkɛ ne, na bɛvɛlɛle bɛ ekpunli ne anu amra bɛmanle bɛrayiale.

²⁸ Bɛkpolokpolole ye adɛladeɛ ɛdeɛ ne mɔ na bɛvale tɛladeɛ kɔkɔlɛ bie mɔɔ arelemgbunli ala a wula la bɛwulale ye.

²⁹ Bɛvale evileni bɛnwonle abɔtile bɛkpolole ɔ ti, na bɛvale baka bɛwulale ɔ sa fema ne anu; akee bɛhotole ɔ nyunlu ɛkɛ ne na bɛzile ye amgbu bɛhanle kɛ, “Dwuuma Belemgbunli, nyi kyɛ!”

³⁰ Bɛtotole nyɛlɛ ɔ nyunlu na bɛliele baka ne ɔ sa nu bɛvale bɛbɔle ɔ ti zo.

³¹ Bɛgolole ɔ nwo bɛwiele la, bɛyele arelemgbunli tɛladeɛ kɔkɔlɛ ne ɔ nwo na bɛvale ye adɛladeɛ ɛdeɛ ne mɔ bɛwulale ye na akee bɛvale ye bɛhɔle kɛ bɛkabɔ ye meanubaka nu.

Bɛbɔ Gyisɛse meanubaka nu

³² Bɛzile nu mɔɔ bɛkɔ la, bɛ nee nrenya bie mɔɔ bɛfɛlɛ ye Saemɔn mɔɔ vi Saelini maanle nu la yiale, na bɛhyele ye mialera nu bɛmanle ɔzoale Gyisɛse meanubaka ne.

³³ Bɛrale ɛleka bie mɔɔ bɛfɛlɛ ye Hibulu aneɛ nu “Gɔlogɔta” la; (ɔ bo a le Etile Kanrɛlɛ Ɛleka)

³⁴ bɛvale nwanye mɔɔ bɛva bɔnyema bɛkpoto nu la bɛmanle ye kɛ ɔnlo; na ɔbɔle zolɛ la, yeanno.

³⁵ Bɛbɔle ye meanubaka nu na akee bɛguale nzeleba bɛhyɛle ye adɛladeɛ ne mɔ bɛvale.

³⁶ Nzinlii bɛdɛnlanle aze na bɛzinzale ye.

³⁷ Bɛhɛlɛle deɛ mɔɔ ɔlua zo mɔɔ yemɔti bɛhunle ye la bɛbɔle ye meanubaka ne azo anwuma kɛ, “Ɛhye a le Gyisɛse, Dwuuma Belemgbunli ne.”

³⁸ Bɛbɔle nwule nwiɔ noko meanubaka nu bɛbokale Gyisɛse anwo; ko wɔ ye fema zo yɛɛ ko wɔ ye bɛne zo.

³⁹ Bɛdabɛ mɔɔ bɛpɛle nuhua ɛkɛ ne la zile Gyisɛse amgbu, bɛyɛle ye aholoba kɛ,

⁴⁰ “Wɔmɔ ɛdawɔ ɛse ɛkola ɛbubu Ɛzonlenlɛ Sua ne na ɛfa kenle nsa ɛsi! Saa wɔmɔ a ɛle Nyamenle Ara ne a, die ɛ nwo ɛ! Ɛvi meanubaka ne azo dwu aze!”

⁴¹ Sɛlɛvolɛ mgbanyinli ne nee mɛla kilehilevolɛma ne nee mgbanyima ne mɔ noko zile ye amgbu kɛ,

⁴² “Ɔdie awie mɔ ngoane, noko ɔngola ɔnlie ɔ nwo ngoane! Tɛ yemɔ a ɔle Yizilayɛma belemgbunli ne la ɔ? Ɔvi meanubaka ne azo ɔdwu aze kɛkala na yɛkɛlie ye yɛkɛli.

⁴³ Ɔfa ɔ rɛle ɔwula Nyamenle nu na ɔka kɛ ɔle Nyamenle Ara. Akee bɛmaa yɛnlea saa Nyamenle kɛlie ye ngoane kɛkala a!”

⁴⁴ Nwule ne mɔ mɔɔ bɛbɔle bɛ nee ye meanubaka nu la, bɛdabɛ bɛyɛle ye aholoba zɔhane ala.

Gyisɛse ewule

⁴⁵ Mɔɔ ɔdwule sɛnzɛngyinla la awozinli vale azɛlɛ ye kɔsɔɔti azo toonwo dɔnehwele nsa.

⁴⁶ Mɔɔ dɔne nsa asɛɛ ɛbɔ la, Gyisɛse deanle nuhua hanle ye Hibulu aneɛ nu kɛ, “Yilae, Yilae, lɛma sabaketani?” Ɔ bo a le, “Me Nyamenle, me Nyamenle, duzu ati a wɔkpo me ɛ?”

⁴⁷ Menli mɔɔ gyigyi ɛkɛ ne la bie mɔ dele na bɛzele kɛ, “Ɔlɛfɛlɛ Yilaegya!”

⁴⁸ Ɛkɛ ne ala bɛ nuhua ko nriandile hɔvale emiane bɔle nza nvinli nu vale duale baka ti na ɔvale ɔmanle ye kɛ ɔnlo.

⁴⁹ Na bie mɔ zele kɛ, “Bɛgyinla, bɛmaa yɛnlea, saa Yilaegya kɛralie ye a!” [Na ko noko vale atwɛ wɔle ɔ nvenle, na ɔhwinle mogyanzule.]

⁵⁰ Na Gyisɛse deanle nu kpole bieko na ɔwule.

⁵¹ Ɛkɛ ne ala Ɛzonlenlɛ Sua ne anu mgbɛnu ɛdanlɛ ne dele ebule nwiɔ, ɔvi anwuma ɔpenle aze. Azɛlɛ kpusule, awolɛ kpukekpukele,

⁵² sɛka zo bukebukele, na bɛdwazole Nyamenle menli ne mɔɔ ɛwu la anu dɔɔnwo bɛrale ngoane nu.

⁵³ Mɔɔ Nyamenle dwazole Gyisɛse vile ewule nu la, bɛdabɛ noko bɛvile bɛ nla ne mɔ anu bɛvindele na bɛhɔle Suakpole Nwuanzanwuanza Gyɛlusalɛm azo, na bɛyele bɛ nwo bɛhilele menli dɔɔnwo.

⁵⁴ Mɔɔ sogyama ne nee bɛ kpanyinli ne mɔɔ ɛnee ɛlɛsinza Gyisɛse la nwunle azɛlɛ ɛkpusulɛ ne nee ninyɛne mɔɔ sisile la, bɛzulole kpole na bɛzele kɛ, “Amgba, nrenya ne le Nyamenle Ara!”

⁵⁵ Ɛnee mraalɛ dɔɔnwo bie wɔ ɛkɛ ne, bɛgyinlanle amozi moa moa na bɛnleanle mɔɔ ɛlɛkɔ zolɛ la. Bɛdoale Gyisɛse bɛ nee ye vi Galeli na bɛzonlenle ye.

⁵⁶ Bɛ nuhua bie mɔ a le Mɛle mɔɔ vi Magedala la, Mɛle mɔɔ le Gyemise nee Dwosefi bɛ nli ne, yɛɛ Zɛbɛdi amra ne mɔ bɛ nli ne.

Gyisɛse ɛzielɛ

⁵⁷ Mɔɔ aleɛ ne hɔle bie la, sukoavolɛ bie mɔɔ vi Arelematia la rale; bɛfɛlɛ ye Dwosefi, na ɔdaye noko ɔle Gyisɛse ɛdoavolɛ.

⁵⁸ Ɔhɔle Paelɛte anyunlu ɔhɔzɛlɛle Gyisɛse funli ne. Na Paelɛte manle bɛhɔyele funle ne bɛmanle ye.

⁵⁹ Yemɔti Dwosefi vale funli ne, ɔkyekyele ye wɔ kisane nu,

⁶⁰ na ɔziele ye wɔ ɔdaye ye nla fofolɛ mɔɔ yemaa bɛpɛ wɔ bolɛ bie anu la anu. Akee ɔhundole bolɛ kpole bie ɔnyinle nla ne anloa na ɔhɔle.

⁶¹ Mɛle mɔɔ vi Magedala la nee Mɛle ɛhendeɛ ne wɔ ɛkɛ ne bie, bɛdede aze na bɛ nye gyi sɛka ne anwo.

Gyisɛse sɛka ne anwo sinzavolɛma

⁶² Aleɛ hyenle la, kenle ne le Ɛnwomenlelielɛ Kenle, sɛlɛvolɛ mgbanyinli ne nee Falasiima ne mɔ yiale Paelɛte,

⁶³ na bɛzele ye kɛ, “Yɛmenle, yɛkakye kɛ mekɛ mɔɔ adalɛ ne de aze la, ɔhanle kɛ, ‘Ye kenle nsa ne azo bɛbadwazo me bɛara ngoane nu.’

⁶⁴ Yemɔti maa adenle maa bɛzinza sɛka ne kpalɛ ɔhɔkpula kenle nsa ne, amaa ye ɛdoavolɛma ne angɔnwua ye, na bɛaraha bɛahile menli kɛ, ‘Bɛdwazo ye bɛvi ewule nu.’ Saa ɛhye si a, adalɛ ɛhye kɛdɛla alumua ɛdeɛ ne bɔkɔɔ.”

⁶⁵ Paelɛte zele bɛ kɛ, “Bɛva sinzavolɛma bɛmaa bɛhɔzinza sɛka ne, kɛmɔ bɛdabɛ bɛkpondɛ la.”

⁶⁶ Yemɔti bɛhɔle bɛhɔzɔle nla ne anloa na bɛmanle sogyama zinzale.