Edwɛkpa ne kɛmɔ Mateyu hɛlɛle la 24 - BAEBOLO ANZƐƐ BULUKU NWUANZANWUANZA

Gyisɛse ka Ɛzonlenlɛ Sua ne ɛzɛkyelɛ nwo edwɛkɛ

¹ Mɔɔ Gyisɛse vi Ɛzonlenlɛ Sua ne anu ɛlɛkɔ la, ye ɛdoavolɛma ne rale ɔ nwo ɛkɛ kɛ bɛbahilehile ye Ɛzonlenlɛ Sua ne azua ne mɔ.

² Na ɔbizale bɛ kɛ, “Bɛnwu ninyɛne ɛhye mɔ ɔ? Nɔhalɛ, meka meahile bɛ kɛ bolɛ ko bɔbɔ ɛnrɛla bolɛ zo mɔɔ bɛnrɛdwula ye aze a.”

Ngyegyelɛ nee Kpɔdekpɔdeyɛlɛ

³ Mɔɔ Gyisɛse wɔ Ɔlivi Boka ne azo la, ye ɛdoavolɛma ne rale ɔ nwo ɛkɛ ne ahane rabizale ye kɛ, “Ka mekɛ mɔɔ ɛhye mɔ kɛzi la kile yɛ, na ka debie mɔɔ bazi ahile kɛ wɔ ɛralɛ ne ɛdwu na ewiade ɛhye ɛlɛba awieleɛ la kile yɛ?”

⁴ Gyisɛse buale bɛ kɛ, “Bɛnlea boɛ na awie ambɛlɛbɛla bɛ amminli bɛ.

⁵ Ɔboalekɛ menli dɔɔnwo balua me duma nu ara na bɛaha kɛ, ‘Mame a mele Mɛzaya ne!’ na bɛaminli menli dɔɔnwo diedi.

⁶ Bɛbade kɛ konle ɛzi na ɔbikye bɛ yɛɛ bɛbade kɛ bie noko ɛzi moa moa maanle bie anu, na bɛmmamaa bɛ ahonle tu. Ɔwɔ kɛ ninyɛne ɛhye mɔ sisi, noko ɛnee awieleɛ ne ɛtɛnyianle ɛtɛbale.

⁷ Maanle nee maanle baho atia bɛ nwo, arelemgbunli badwazo arelemgbunli nwo zo, sane bara, yɛɛ azɛlɛ bakpusu ɛleka muala.

⁸ Ɛhye mɔ amuala le kɛ awolɛ nyane ɛdelɛ bo ɛbɔlɛ.

⁹ “Akee bɛbahye bɛ na bɛahɔye bɛ bɛamaa bɛadea bɛ na bɛahu bɛ. Aleɛabo amra amuala bakpɔ bɛ wɔ me ti.

¹⁰ Mekɛ ne anu menli dɔɔnwo bakpo aze wɔ diedi nu, bɛbaye bɛ nwo ngoko ngoko bɛamaa, na bɛakpɔ bɛ nwo ngoko ngoko.

¹¹ Akee Nyamenle kpɔmanvolɛma adalɛ bara araminli menli dɔɔnwo diedi.

¹² Munzule mɔɔ bara ewiade la bayɛ kpole kpalɛ la ati, menli dɔɔnwo baminli bɛ ɛhulolɛ mɔɔ bɛlɛ ye wɔ Nyamenle anwo la.

¹³ Noko sonla mɔɔ kɛgyinla kpundii kɛhɔ awieleɛ la banyia ngoane mɔɔ ɛnlɛ awieleɛ.

¹⁴ Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra kolaa na awieleɛ ne ara.

Munzudeɛ mɔɔ bɔ maanle

¹⁵ “Saa bɛnwu ‘Munzudeɛ ne mɔɔ bɔ maanle’, mɔɔ Nyamenle kpɔmanvolɛ Daneɛle hanle nwolɛ edwɛkɛ la kɛ ɔgyi ɛleka nwuanzanwuanza ne a, (Kengavolɛ, te ɛhye abo!)

¹⁶ ɛnee bɛdabɛ mɔɔ bɛwɔ Dwudiya la ɛnriandi ɛhɔ awoka ne mɔ azo.

¹⁷ Mɔɔ wɔ ye sua ti zo anwuma la mmaka kɛ ɔdwu aze yearava ye ninyɛne wɔ ye sua ne anu.

¹⁸ Mɔɔ ɛhɔ ɛbɔ nu la mmasia ba sua zo kɛ ɔbava ye tɛladeɛ.

¹⁹ Mekɛ ne anu, nrenzɛvolɛma nee mraalɛ mɔɔ via mralɛ la, bɛ gyakɔ!

²⁰ Bɛzɛlɛ Nyamenle kɛ ɛhye ɛnrɛzi fɔsɛlɛ nu anzɛɛ Ɛnwomenlelielɛ Kenle ne!

²¹ Ɔluakɛ anwongyelelɛ mɔɔ bara mekɛ zɔhane ne anu la, ye ɛzulolɛ, sumunli kɛ ewiade bɔle ɔ bo dedee mɔɔ yeradwu ɛnɛ la, bie ɛtɛsile ɛlɛ, yɛɛ bie noko ɛnrɛzi ɛlɛ na aloa abɔ.

²² Na Awulae ɛnlea ye menli ne mɔɔ yekpa nu yeye bɛ la ati yede mekɛ ne azo, saa tɛ ye zɔhane a anrɛɛ sonla ko bɔbɔ ɛnrɛha.

²³ “Mekɛ ne anu saa awie se bɛ kɛ, ‘Nea, Mɛzaya ne ɛne!’ anzɛɛ ‘Yemɔ a wɔ lɔ la!’ a, bɛmmadie bɛdi.

²⁴ Ɔluakɛ Mɛzayama adalɛ nee Nyamenle kpɔmanvolɛma alane dɔɔnwo bara; bɛbayɛ nwanwane ninyɛne mgbole mɔɔ yɛ ɛzulolɛ la dɔɔnwo, na saa bɛyɛ na ɔkɛyɛ boɛ a, bɛava bɛabɛlɛbɛla Nyamenle menli ne mɔɔ di munli bɔbɔ la na bɛaminli menli dɔɔnwo diedi.

²⁵ Bɛdie! Kɛ mehakye bɛ ɛhye mɔ kolaa na mekɛ ne adwu ɛ!

²⁶ “Yemɔti, saa awie mɔ ka kile bɛ kɛ, ‘Bɛnlea, ɔwɔ fienemgbole nu lɔ!’ a, bɛmmakɔ lɔ; anzɛɛ saa bɛka kɛ, ‘Bɛnlea, ɔvea ɛke!’ a, bɛmmadie bɛdi.

²⁷ Ɔluakɛ medame Sonla Ra, mebara kɛ ɛsɛnlɛmanye mɔɔ kpakye anwomanyunlu la, ɔvi aduduleɛ yeahɔzi adɔleɛ.

²⁸ “Ɛleka mɔɔ debie funli la la, ɛkɛ ne a mgbɔtɛ kuohua bɛ nloa a.”

Sonla Ra ne ɛralɛ

²⁹ Gyisɛse hɔle zolɛ hilele nu kɛ, “Anwongyelelɛ mekɛ ne anzi, awozinli baheda sɛnzɛne ne azo, siane ne ɛnrɛda, nwɔlɔra badudu agua aze, na bɛbadudu anwumaneamra bɛavi bɛ ndenle ne mɔ azo.

³⁰ Na akee medame Sonla Ra, me nwo sɛkɛlɛneɛ bavinde anwomanyunlu; menli muala mɔɔ wɔ aleɛabo la bali nyane wɔ mekɛ mɔɔ bɛkɛnwu medame Sonla Ra kɛ melua amungu nu na melɛ tumi nee anyunlunyia kpole melɛba la.

³¹ Bɛbabɔ aweɛne kpole ne anu, na mebamaa me soanvolɛma ahɔ ewiade muleɛ ne amuala azo, bɛahɔhuohua Nyamenle menli ne mɔɔ yekpa nu yeye bɛ la anloa, ɔvi ewiade ye ati yeahɔdwu ɔ bo.

Feege baka ne anwo ɛzukoalɛdeɛ

³² “Bɛnlea feege baka ne na bɛzukoa nrɛlɛbɛ wɔ nwo. Mekɛ mɔɔ ye ngane ne mɔ kɛze kɛ bɛwula nya la, ɛnee bɛze kɛ wawaa ɛbikye.

³³ Zɔhane ala yɛɛ mekɛ mɔɔ bɛkɛnwu kɛ ninyɛne ɛhye mɔ ɛbɔ ɔ bo kɛ bɛsisi la, ɛnee bɛhakye kɛ Kelaese ne ɛralɛ ɛbikye, na yedwu bɔbɔ asɛɛ.

³⁴ Na bɛhakye ɛhye, ninyɛne ɛhye mɔ bazi na menli mɔɔ kɛkala de aze la amuala awie wu.

³⁵ Anwuma nee aze bapɛ nu aze, na me nloa edwɛkɛ ɛnrɛpɛ nu ɛlɛ.

Awie ɛnze kenle ne nee mekɛ ne

³⁶ “Noko akee awie biala ɛnze kenle ne nee mekɛ ne; anwuma soanvolɛma nee Ralɛ ne bɔbɔ ɛnze. Selɛ ne angomekye a ze a.

³⁷ Sonla Ra ne ɛralɛ mekɛ ne bayɛ kɛ mɔɔ zile Nowa mekɛ zo la.

³⁸ Kɛmɔ azuyilɛ kpole ne bara na menli lile, nlonle, agyalɛ lielɛ ebia hɔkpulale kenle mɔɔ Nowa vole ye ɛlɛne ne anu,

³⁹ na bɛannwu mɔɔ ɛlɛba arazi la toonwo azuyilɛ kpole ne ravale bɛ muala la, zɔhane ala yɛɛ medame Sonla Ra, me ɛralɛ mekɛ ne bayɛ a.

⁴⁰ Mekɛ ne anu bɛbava menli nwiɔ mɔɔ wɔ bɛ ɛya nu la anu ko bɛahɔ na bɛagyakyi ko.

⁴¹ Bɛbava mraalɛ nwiɔ mɔɔ ɛlɛti abɛlɛ la anu ko bɛahɔ na bɛagyakyi ko.

⁴² “Yemɔti bɛzinza, ɔboalekɛ bɛnze kenle mɔɔ bɛ Awulae ne kɛra la.

⁴³ Bɛhakye ɛhye, saa awuke menle ze mekɛ mɔɔ awule ne kɛra la a anrɛɛ ɔbazi epe na awule ne ambanwua ye.

⁴⁴ Zɔhane ati ɔwɔ kɛ bɛdabɛ noko bɛsiezie bɛ nwo, ɔluakɛ medame Sonla Ra, mebara mekɛ mɔɔ bɛ nye ɛnla la.

Sonvolɛ nɔhavo ne anzɛɛ sonvolɛ adalɛ ne

^45-46 “Ɛnee akee, sonvolɛ nɔhavo mɔɔ ze nrɛlɛbɛ la a le boni? Yemɔ a le sonvolɛ ne mɔɔ ɔ menle ɛva ye kɛ ɔnlea sonvolɛma mɔɔ ɛha la anwo zo na ɔmaa bɛ aleɛ wɔ mekɛ ne anloa, na ɔ menle ne bato ye kɛ ɔlɛyɛ ye zɔhane la. Ɛhye le nyilalɛ kpole maa sonvolɛ ne.

⁴⁷ Nɔhalɛ, meka meahile bɛ, ɔ menle ne kɛmaa ɔkɛnlea ye agya ninyɛne ne mɔ amuala azo.

⁴⁸ Na saa sonvolɛ adalɛ ne se ɔ nwo kɛ, ‘Me menle bahyɛ na yeara,’

⁴⁹ na ɔbɔ ɔ bo kɛ ɔbo ɔ gɔnwo mɔ sonvolɛma ne, na ɔ nee nzama ali, anlo a, ɛnee ɔhakye kɛ

⁵⁰ ɔ menle ne bara kenle mɔɔ ɔdaye sonvolɛ ne ɔnze na eza ɔ nye ɛnla la.

⁵¹ Na ɔ menle ne kɛye ye ali kɛhɔboka nabalabama ne anwo. Ɛkɛ ne yɛɛ menli su dedɛ bɛ nwo bonrane nu a.”